21
Falana lan Yerusalɛn suxu feen ma
1 Alatala yi falan ti Yeremi xa, Manga Sedeki to Malakiyaa dii xɛmɛn Pasaxuri rasiga a ma e nun saraxaraliin Sofoni, Maaseyaa dii xɛmɛna. E yi a fala Yeremi xa, e naxa, 2 “Alatala maxɔdin nxu xa, bayo Babilɔn mangan Nebukadanesari bata nxu yɛngɛ fɔlɔ. Waxatina nde Alatala nxu maliyɛ nɛn, a yi a kabanako fena ndee raba nxu xa, alogo yaxuni ito xa a masiga nxu ra.”
3 Yeremi yi e yabi, a naxa, “Ɛ a fala Sedeki xa, ɛ naxa, 4 ‘Alatala, Isirayilaa Ala ito nan falaxi, a naxa: Babilɔn mangan nun Babilɔn kaan naxanye ɛ taan makantan yinna rabilinxi yɛngɛni iki, ɛ ne yɛngɛma yɛngɛ so seen naxanye ra, n ne raxɛtɛma ɛ tan nan ma, n yi ɛ yaxuni itoe malan taani ito kui. 5 N tan yɛtɛna ɛ yɛngɛma nɛn, n fitinaxin yi n sɛnbɛn nun n fanga gbeen yita ɛ ra n ma xɔlɔn nun n ma bɔɲɛ teeni. 6 Naxanye birin taani ito yi, n ne ɲaxankatama nɛn, a muxune nun a xuruseene, e birin yi faxa fitina fureni. 7 Alatalaa falan ni ito ra! Na na dangu, naxanye na lu e nii ra fitina furen nun yɛngɛn nun fitina kamɛn xanbi ra, n ne birin sama nɛn Babilɔn mangan Nebukadanesari sagoni, Yuda mangan Sedeki nun a kuntigine nun taani ito muxune birin, n yi e lu e yaxune sagoni, naxanye waxi e faxa feni. A e faxama nɛn silanfanna ra, a mi kininkinin e ma, a mi hinan e ra sese ma.’ ”
8 “Yeremi, a fala yamani ito xa, i naxa, ‘Alatala ito nan falaxi, a naxa, “Ɛ a mato, n bata siimayaan kiraan nun sayaan kiraan yita ɛ ra. 9 Naxan yo na lu taani ito kui, silanfanna nun fitina kamɛn nun fitina furen nan na kanna faxama. Koni naxan na mini, a yi sa a yɛtɛ dɛntɛgɛ Babilɔn kaane xa, naxanye ɛ rabilinxi yɛngɛni, na kanna kisima nɛn, a tan yi lu a nii ra bɛtɛ. 10 Bayo n na n yɛɛ rafindima nɛn taani ito ma a ɲaxin na, a faɲin mi a ra. A sama nɛn Babilɔn mangan sagoni, a yi a gan.” Alatalaa falan nan na ra.’ ”
Alaa falana lan Yuda mangana denbayaan ma
11 “Yeremi, a fala Yuda mangana denbayaan xa,
i naxa, ‘Ɛ tuli mati Alatalaa falan na.
12 Dawuda bɔnsɔnna, Alatala ito nan falaxi,
a naxa: Ɛ kiti kɛndɛn sa xɔtɔn yo xɔtɔn,
ɛ yi muxu kansunxin ba ɲaxankata tiin yii,
alogo n ma xɔlɔn nama godo ɛ ma ɛ fe ɲaxine fe ra
alo tɛɛn naxan ɛ ganma
naxan mi nɔɛ ratuyɛ.
13 Alatalaa falan ni ito ra, a naxa:
N bata keli ɛ xili ma,
ɛ tan naxanye dɔxi lanbanni,
ɛ tan naxanye dɔxi fanyen ma fiila ma,
ɛ tan naxanye a falama, ɛ naxa,
“Nde nɔɛ fɛ nxu xili ma?
Nde nɔɛ soɛ nxu luxunden kui?”
14 N na ɛ saranma ɛ kɛwanle ra nɛn.
N tɛɛn soma nɛn ɛ fɔtɔnne ra,
a yi ɛ rabilinna birin gan.’
Alatalaa falan nan na ra.”