1 Go Apômtau kêsôm gêdêŋ Noa gebe “Ôsô waŋ ôna, aôm to nêm gôlôac samob gebe aê galic aôm amboac ŋac gêdêŋ gômoa aê laŋôcnêm aŋga lau tonaŋ ŋalêlôm. 2 Ôkôc bôc 7-7 aŋga bôc selec samob nêŋ, kapoac to têna. Mago ôkôc bôc luagêc-luagêc aŋga bôc, taŋ selec atom naŋ, kapoac teŋ ma têna teŋ. 3 Moc umboŋ ŋalabuŋa amboac tonaŋ. Ôkôc 7-7 êtômgeŋ, kapoac to têna gebe sênac ŋawê tôŋ aŋga nom. 4 Gebe bêc 7 ênaŋa acgom, go jakêŋ kom ênac êtôm eleŋŋa 40 to êmbêcauc 40 ma gabe janseŋ gêŋ mateŋ jali samob, taŋ kakêŋ naŋ, su aŋga nom.” 5 Ma Noa gêgôm gêŋ samob ŋanô kêsa kêtôm Apômtau kêjatu eŋ.

6 Noanê jala kêtu 600, go bu kêsuŋ ŋatêna kêtap nom sa. 7 Ma Noa to latui ma nê awê to lawaio wakuc sêsô waŋ sêja gebe sêc bu su. 8 Bôc selec to bôc selec atom ma moc to gêŋ, taŋ sêgalabgeŋ naŋ, aŋga nom samob, 9 kapoac teŋ to têna teŋ sêsô waŋ sêwiŋ Noa kêtôm Anôtô kêjatu naŋ.

10 Bêc 7 gêjaŋa, go bu kêsuŋ ŋatêna kêtap nom sa. 11 Gêdêŋ taŋ Noanê jala kêtu 600 naajôŋ luagêc ma ŋabêc 17 naŋ, bumata nom ŋalêlômŋa samob kêpulu kêpi ma katam umboŋŋa gêlêc su 12 ma kom kêsêwa kêsêp nom geleŋŋa 40 to gêbêcauc 40. 13 Gêdêŋ bêc tonaŋ Noa to latui Sem agêc Ham ma Japet ma nê awê to lawaio wakuc têlêac sêwiŋ êsêac sêsô waŋ sêja. 14 Êsêac ma bôc saleŋŋa tokaiŋ-tokaiŋ to bôc malacŋa tokaiŋ-tokaiŋ ma gêŋ, taŋ sêgalabgeŋ aŋga nom samob tokaiŋ-tokaiŋ to moc tokaiŋ-tokaiŋ, moc to gêŋ tomagê samob, 15 gêŋ samob tonaŋ ŋai sêsô waŋ sêwiŋ Noa, gêŋ mateŋ jaliŋa luagêc-luagêc. 16 Gêŋ mateŋ jaliŋa samob, kapoac teŋ to têna teŋ sêsô waŋ kêtôm Anôtô kêjatu eŋ. Ma Apômtau kêlai eŋ auc.

17 Bu kêsuŋ ŋatêna kêpoac nom gê tôŋgeŋ kêtôm bêc 40 ma bu kêsuŋ kapôêŋ ma kêsuŋ waŋ sa kêpigeŋ jakêpoac. 18 Ma bu kêsuŋ kêpi-kêpi e gêjam sêga aŋga nom ma waŋ kêpoac bu ŋaô. 19 Bu kêsuŋ ŋatêna e gênôm lôc baliŋ, taŋ kêkô umboŋ ŋalabu naŋ auc samucgeŋ. 20 Bu taŋ gênôm lôc ŋatêpôê auc naŋ e amboac saka samuc têlêac. 21 Tec gêŋ mateŋ jali, taŋ sêmoa nom naŋ, samob sêjaŋa, moc ma bôc malacŋa to bôc saleŋŋa ma gêŋ samob, taŋ sêgalab to sêlêgeŋ sêjam nom auc naŋ, ma ŋamalac amboac tonaŋgeŋ. 22 Gêŋ samob, taŋ sêsê aweŋ sêmoa masaŋgeŋ naŋ, sêmac êndu. 23 Amboac tonaŋ geseŋ gêŋ mateŋ jali, taŋ sêmoa nom naŋ su samob, ŋamalac to bôc ma gêŋ, taŋ sêgalab to sêlêgeŋ naŋ to moc aŋga umboŋ ŋalabu samobgeŋ sêjaŋa aŋga nom. Noa taugeŋ gêmoa to êsêac, taŋ sêwiŋ eŋ sêmoa waŋ ŋalêlôm. 24 Ma bu kêsuŋ ŋatêna kêpoac nom kêtôm bêc 150. * Lau Israel sêwa bôc toê-toê samob kêkôc gêja toŋ luagêc. Toŋ teŋ tec sêsam gebe Bôc selec, ma teŋ sesam gebe Bôc ŋatêmui. Bôc selec nêŋ ŋagêdô gebe domba to bulimakao. Bôc tonaŋ êsêac sêkêŋ têtu da, ma bôc selec tonaŋgeŋ êsêac seŋ kêtu nêŋ gwada. Bôc ŋatêmui amboac bôc susu êsêac sên atom ma sêkêŋ têtu da atom.