112
Embe tatêc Anôtô oc ênam aêac sa
1 Aleluja.
Aê aoc êôc ŋac, taŋ kêtêc Apômtau
to gêgôm ênê biŋsu ŋanô kêsa totêtac ŋajamgeŋ naŋ.
2 Ênê wakuc oc têtu gamêŋ ŋatau toŋaclai.
Ma Apômtau ênam mec lau mansaŋ nêŋ gôlôac.
3 Gêŋ masê to awa ênêc ênê andu
ma ênê biŋgêdêŋ oc ênêc endeŋ tôŋgeŋ.
4 Eŋ kêpô lau mansaŋ kêtôm ŋawê kêpô gamêŋ ŋakesec.
Eŋ ŋac gêdêŋ tec taê labu ma kêmoasiŋ lau.
5 Aê aoc êôc ŋac, taŋ taê walô lau to gêjam lau sawa sa naŋ,
ma êŋgôm nê gêŋ samob naêndêŋgeŋ.
6 Eŋ oc êkô ŋajaŋa êku atomanô
ma lau oc taêŋ ênam eŋ endeŋ tôŋgeŋ.
7-8 Gêŋwapac ŋawae oc êŋgôm eŋ êtêc tau atom.
Ênê ŋalêlôm ŋaŋêŋ ma taê êka Apômtau!
Eŋ têtac kêpa su ma kêtêc tau atom.
Êndêŋ ŋamu eŋ oc êku nê ŋacjo tulugeŋ.
9 Eŋ gêjac sam nê gêŋ gêjac ŋawaegeŋ gêdêŋ lau ŋalêlôm sawa amboac tonaŋgeŋ.
Ênê biŋgêdêŋ oc ênêc endeŋ tôŋgeŋ. Eŋ oc êtu apômtau towae.
10 Ŋac taŋ kêkac tau su aŋga Anôtônê naŋ, gêlic e kêtu môsi.
Eŋ gêmôêŋ luluŋ, mago ŋanô masi. Lau secwaga embe taêŋ êka biŋ teŋ oc ŋanô ênsuŋ tau êndêŋ êsêac atom.