1 Apômtau kêsôm gêdêŋ aê gebe 2 “o ŋamalac latu, ôsôm êndêŋ nêm lau gêŋ, taŋ ŋanô êsa êndêŋ noc, taŋ jakêŋ siŋ êsa gamêŋ êmêŋ. Lau gamêŋ tonaŋŋa sêjaliŋ nêŋ teŋ sa êtu dibwaga. 3 Eŋ embe êlic ŋacjo têdabiŋ, naŋ eŋ ênac dauc êtaŋ gebe êkêŋ puc lau samob. 4 Embe teŋ êŋô, mago êkêŋ taŋa atom e ŋacjo êô lasê ma ênac eŋ êndu, go eŋ tau êwê kaiŋ êmac êndu ŋatôp. 5 Eŋ êmac êndu ŋatôp ênêc eŋ tauŋa gebe eŋ kêkêŋ taŋa puc atom. Embe eŋ êkêŋ taŋa oc moac eŋ êtôm gebe êc siŋ su. 6 Mago dibwaga embe êlic ŋacjo sêmêŋ ma ênac dauc êtaŋ atom ma êkêŋ puc lau atom e ŋacjo sêô lasê ma sênac ŋac teŋ êndu, oc ŋac tau ênaŋa êtu nê secŋa, mago dibwaga êwê ênê dec ŋakaiŋ.

7 “O ŋamalac latu, aê jakêŋ aôm ôtu lau Israel nêŋ dibwaga. Êndêŋ taŋ ôŋô biŋ teŋ aŋga aêŋoc naŋ, ôkêŋ puc êsêac ônam aê laŋôc. 8 Aê embe jasôm êndêŋ ŋac sec gebe Aôm ômac êndu, mago aôm embe ôkêŋ puc eŋ gebe ênam nê lêŋ ôkwi gebe êmoa mata jali naŋ atom, go eŋ oc êmac êndu êtu nê secŋa, mago aôm ôwê ênê dec ŋakaiŋ. 9 Mago aôm embe ôkêŋ puc ŋac sec ma eŋ ênam tau ôkwi aŋga nê sec atom, oc êmac êndu êtu nê secŋa, mago aôm gôjam taôm katôm kêsi.

10 “Ma aôm ŋamalac latu, ôsôm êndêŋ lau Israel biŋ tau, taŋ êsêac sêsôm naŋ gebe ‘Gêŋ sec to geo, taŋ aêac agôm naŋ, kêkôniŋ aêac tôŋ e abêlê. Aêac amoa mateŋ jali amboac ondoc.’ 11 Aôm ôsôm êndêŋ êsêac gebe Apômtau Anôtô kêsôm gebe Aê gamoa matoc jali biŋŋanôgeŋ, tec jasôm êtu tôŋ gebe ŋac sec teŋ embe êmac êndu, oc aê têtac ŋajam atom. Ŋac sec teŋ embe ênam tau ôkwi to êmoa mata jali, aê oc têtac ŋajam êsa. O lau Israel, anam taôm ôkwimaŋ, amac abe amac êndu êtu ageŋŋa.

12 “Ma aôm, ŋamalac latu, ôsôm êndêŋ nêm lau gebe Ŋac gêdêŋ embe êŋgêli biŋsu, go êna lêŋ gêdêŋ ênam eŋ kêsi atom. Ma ŋac sec embe êwi nê sec siŋ, go nê sec êku eŋ tulu ênaŋa atom. Ŋac gêdêŋ, taŋ êŋgôm sec naŋ, oc êmoa mata jali atom. 13 Aê embe jasôm êndêŋ ŋac gêdêŋ gebe êmoa mata jali ma eŋ taê êka nê lêŋ gêdêŋ e êŋgôm sec, go aê taêc ênam ênê lêŋ gêdêŋ teŋ êtiam atom ma eŋ êmac êndu êtu nê secŋa. 14 Ma teŋ. Aê embe jasôm êndêŋ ŋac sec gebe amac êndu biŋŋanôgeŋ, mago eŋ embe ênam tau ôkwi aŋga nê lêŋ sec ma ejop ŋoc jatu to êsap biŋsu tôŋ 15 ma êŋgamiŋ kamaclauŋ atom to êjô gêŋ, taŋ kêjaŋgo su naŋ, ma êŋgôm biŋsu, taŋ kêtu aŋgôŋ matem jali ŋam naŋ, ŋanô êsa to êŋgôm sec atom, naŋ êmoa mata jali biŋŋanôgeŋ, eŋ êmac êndu atom. 16 Aê oc taêc ênam ênê sec, taŋ gêgôm naŋ, ŋateŋ êtiam atom. Eŋ gejob ŋoc jatu to kêsap biŋsu tôŋ, tec êmoa mata jali biŋŋanôgeŋ.

17 “Ma nêm lau sêsôm gebe ‘Apômtaunê lêŋ jagêdêŋ atom.’ Mago aê gabe êsêacnêŋ lêŋ jagêdêŋ atom. 18 Ŋac gêdêŋ embe êwi nê lêŋ gêdêŋ siŋ ma êŋgôm sec, oc êmac êndu êtu tonaŋŋa. 19 Ma ŋac sec embe êwi nê sec siŋ ma ejop ŋoc jatu to êsap biŋsu tôŋ, oc êmoa mata jali êtu tonaŋŋa. 20 Mago amac asôm gebe ‘Apômtaunê lêŋ jagêdêŋ atom.’ O lau Israel, aê oc jamêtôc amac samob êtôm nêm lêŋ êndêŋ-êndêŋgeŋ.”

21 Gêdêŋ jala kêtu 12, taŋ aêac aŋgôŋ kapoacwalô naŋ, ŋaajôŋ kêtu 10 ŋabêc 5 ŋac teŋ, taŋ gêc siŋ aŋga Jerusalem gêmêŋ naŋ, mêŋgêô lasê aê ma kêsôm gebe “Êsêac sêku malac tulu.” 22 Gêdêŋ kêtula, taŋ gêmuŋ bêc ŋac tau gêô lasêŋa naŋ, Apômtau lêma gêsac aê ma eŋ kêkêŋ imbeloc kêtu goloŋ gêdêŋ bêc, taŋ ŋac tau gêô lasê naŋ, ma aê aocmê kêsa kêtiam atom.

23 Apômtau kêsôm biŋ gêdêŋ aê gebe 24 “O ŋamalac latu, lau taŋ sêŋgôŋ malac ŋapopoc aŋga lau Israel nêŋ gamêŋ naŋ, sêsôm gebe ‘Abraham eŋ ŋac tageŋ ma Anôtô kêkêŋ gamêŋ samucgeŋ gêdêŋ eŋ. Mago aêac lau taêsam, tec galoc gamêŋ tau kêtu aêacnêŋ gêŋgac.’

25 “Amboac tonaŋ ôsôm êndêŋ êsêac gebe Apômtau kêsôm gebe Aôm goeŋ dec gêwiŋ ŋamêsôm tau. Aôm gôjam sakiŋ gwam. Aôm gôjac lau êndu. Asageŋ kêkêŋ aôm taêm gêjam gebe gamêŋ tau kêtu amacnêm. 26 Aôm taêm kêka nêm siŋ. Amac agôm gêŋ alôb-alôb. Amac agôm mockaiŋ gêdêŋ nêm lau wacbaŋ amac nêŋ lauo. Asageŋ kêkêŋ amac taêm gêjam gebe gamêŋ tau kêtu amacnêm.

27 “Ôsôm êndêŋ êsêac gebe Apômtau kêsôm biŋ tonec gebe Aê gamoa matoc jali biŋŋanôgeŋ, tec jasôm êtu tôŋ gebe lau, taŋ sêŋgôŋ malac ŋapopoc naŋ, lau oc sênac êsêac êndu. Êsêac taŋ sêŋgôŋ gamêŋ ŋamagêŋa naŋ, bôcbôm oc sêndaŋgôŋ êsêac. Êsêac taŋ sêŋgôŋ malac ŋajaŋa me pocgêsuŋ naŋ, gêmac sec oc êŋgôm êsêac e sênaŋa. 28 Aê gabe jaŋgôm gamêŋ êtu gasaŋ. Nêŋ ŋaclai, taŋ êsêac tetoc tauŋ sa kêpi naŋ, oc êmbacnê. Ma gamêŋ Israel ŋalôc oc êtu gamêŋ sawa e ŋac teŋ êtôm gebe êsa lôc ŋaintêna êtiam atom. 29 Êndêŋ taŋ aê jaŋgôm gamêŋ êtu gasaŋ êtu sêgôm gêŋ alôb-alôb naŋŋa, êsêac oc sêjala gebe aê Apômtau tau.”

30 “O ŋamalac latu, nêm lau sêsôm biŋ kêpi aôm sêkô tuŋbôm ŋagala to andu ŋasacgêdô. Êsêac sêsôm gêdêŋ tauŋ gebe ‘Ajôc, tawac ma taŋô biŋ, taŋ galoc gêmêŋ aŋga Apômtaunê naŋ.’ 31 Amboac tonaŋ lau sêliŋ tauŋ japaŋ-japaŋ amboac lau sêgôm-sêgôm ma ŋoc lau sêŋgôŋ sic sêŋgôŋ aôm laŋômnêmŋa to sêŋô nêm biŋ, mago sêŋgôm ŋanô êsa atom gebe biŋdansaŋ gêc êsêac aweŋsuŋ ma nêŋ ŋalêlôm gêgôm mocsac awageŋ. 32 Ma êsêac sêlic aôm amboac ŋac, taŋ gêjam wê têtac gêwiŋŋa ŋajamgeŋ to gêjac gêŋ wêŋa naŋ. Êsêac sêŋô aômnêm biŋ samob, mago sêŋgôm ŋateŋ ŋanô êsa atomanô. 33 Ma êndêŋ naŋ nêm biŋ ŋanô êsa-ma oc ŋanô êsa biŋŋanôgeŋ-gocgo sêjala gebe propete teŋ gêmoa êsêac ŋalêlôm.” * Kamaclauŋ: 1. kêtu ŋabelo gebe tatap ŋanô tau sa êndêŋ ŋamu (Ep 1:14) † 2. ŋac teŋ embe ênam tôp teŋ, go êkêŋ gêŋ teŋ êtu ŋabelo gebe eŋ oc taê ênam nê tôp tonaŋ. ‡ Malôgeŋ embe ênac tôp tonaŋ, go êtap nê gêŋ tau sa êtiam.