71
Ŋamalacanô teŋ nê mec
1 O Apômtau, aê gaê lamu aômgeŋ.
Ôkêŋ aê jamoa tomajocgeŋ atom.
2 Ôŋgamboac aê to ônam aê sa êtu nêm biŋgêdêŋŋa.
Ôê taŋam aê ma ônam aê kêsi.
3 Ôtu ŋoc poclabu jaê lamuŋa to ŋoc laimôkê ônam aê saŋa.
Aôm tonaŋ kôtu ŋoc poclabu to ŋoc laimôkê.
4 O ŋoc Anôtô, ôjaŋgo aê su aŋga lau, taŋ sêkac tauŋ su aŋga aômnêm naŋ lemeŋ.
Ôjaŋgo aê su aŋga lau alôb-alôb to lêsutêna nêŋ.
5 O Apômtau, aê kakêŋ matoc aômgeŋ.
O Apômtau, aê ŋapalêgeŋ ma taêc kêka aôm.
6 Gêdêŋ tinoc kêkôc aê su ma gasuŋ tauc gêdêŋ aôm, kasa aŋga tinocnê e aôm gôlôm aêgeŋ,
amboac tonaŋ oc jalambiŋ aôm endeŋ tôŋgeŋ.
7 Lau samob sêlic aê amboac gêŋsêga teŋ,
mago aôm kôtu aêŋoc lamu ŋajaŋa.
8 Aocsuŋ kêsuŋ aômnêm lanem sa
ma gêgôm waem kêtu tapa kêtôm bêcgeŋ.
9 Aê katu ŋamalacanôgac, tec ôtiŋ aê su atom.
Ŋoc ŋaclai gêbacnê, tec ôwi aê siŋ atom.
10 Gebe ŋoc ŋacjo sêsôm biŋ kêpi aê
ma êsêac, taŋ sêkic ŋoc biŋ naŋ, sêjam biŋgalôm sêwiŋ tauŋ
11 ma sêsôm gebe “Anôtô gêwi eŋ siŋgac,
ajanda eŋ e naakam eŋ tôŋ gebe ênê kêsiwaga masi.”
12 O Anôtô, ômoa jaêc aê atom. O ŋoc Anôtô, ôlêtigeŋ mêŋônam aê sa.
13 Êsêac taŋ sêkêŋ kisa aê naŋ, majeŋ êsa e sênaŋa
ma sêsu êsêac, taŋ sebe sêkêŋ aê jandac gêŋwapac naŋ, susu e sêmoa toteŋbeleŋ ŋawapacgeŋ.
14 Aê gabe jakêŋ matoc aôm endeŋ tôŋgeŋ
ma jaŋgôm waem êsa êlêlêc su.
15 Aocsuŋ êsôm nêm biŋgêdêŋ to nêm ŋaclai ônam ŋamalac saŋa lasê êtôm bêcgeŋ.
Aê oc jasa moasiŋ tonaŋ sa êtôm atom.
16 Aê gabe jasa Apômtau Anôtô nê gêŋ ŋaclai sa.
Aê gabe jalambiŋ aôm taômgeŋ nêm biŋgêdêŋ.
17 O Anôtô, aê ŋapalêgeŋ ma aôm kôdôŋ aê,
tec gaoc nêm gêŋtalô lasê ŋapaŋ e gêdêŋ galoc.
18 O Anôtô, embe jatu ŋamalacanô e môdê ênam aê auc,
naŋ ôwi aê siŋ atom.
Gebe jasôm nêm ŋaclai êndêŋ lau wakuc,
taŋ mêŋsêsa êtu ŋamu naŋ.
19 O Anôtô, nêm ŋaclai to biŋgêdêŋ kêsuŋ kwandaŋ kêpi e jagêdêŋ undambê.
O Anôtô, taŋ gôgôm gêŋ ŋaclaisêga naŋ, asa oc êtôm aôm.
20 Aôm kôkêŋ gêŋwapac to gêŋ ŋandaŋ gêjam aê auc elêmê.
Mago aôm oc ôkêŋ aê tekoc saki êsa êtiam ma ôwê aê sa aŋga nom ŋalêlômsêga japi jamêŋ êtiam.
21 Aôm oc otoc aê sa êlêlêc
ma ônac aê têtac tôŋ.
22 O ŋoc Anôtô, amboac tonaŋ oc aoc êôc aôm ŋa gêŋ wêŋa
kêtu aôm ŋac ŋaŋêŋŋa.
O Israelnêŋ ŋac dabuŋ,
aê gabe jaŋgôm gêŋ wêŋa êtaŋ êndêŋ aôm.
23 Aê gêdôcôlic ênam lasê êtu têtac ŋajamŋa
ma katuc, taŋ gôjam kêsi naŋ, amboac tonaŋgeŋ.
24 Imbeloc oc êsôm nêm biŋgêdêŋ gêjam aê saŋa lasê êtôm bêcgeŋ
gebe êsêac, taŋ sebe sêkêŋ aê jandac gêŋwapac naŋ, majeŋ êsa e sêmoa toteŋbeleŋ ŋawapacgeŋ.