61
Mec Anôtô ejop aêacŋa
1 O Anôtô, ôŋô ŋoc taŋi kapôêŋ.
Ôkeŋ taŋam ŋoc mec.
2 Gaŋgôŋ gêdêŋ nom ŋamadiŋ ma aoc gêjac aôm
gebe ŋoc ŋalêlôm ŋatutuc ŋasec.
Poc kapôêŋ tec kêkô, ma aê tauc oc japi jatôm atom.
Amboac tonaŋ aôm ôkam aê, go japi.
3 Gebe aê gaê lamu aômgeŋ.
Aôm kôtu ŋoc tuŋtêna gêdêŋ ŋacjo.
4 Ojae, jaŋgôŋ nêm beclêlôm endeŋ tôŋgeŋmaŋ.
Jaŋgôŋ nêm magêm ŋalabugeŋmaŋ.
5 Gebe aôm Anôtô kôkêŋ taŋam biŋ, taŋ gajac mata naŋ.
Aôm kôkêŋ aê gawê kaiŋ êsêac, taŋ têtêc aômnêm ŋaê naŋ, nêŋ gêŋlênsêm.
6 Ônac têku kiŋnê bêc wakuc-wakucgeŋ ênêc.
Ôkêŋ eŋ êmoa tojala-tojala ŋapaŋ.
7 Ôkêŋ eŋ êŋgôŋ nê lêpôŋ êŋgôŋ Anôtô laŋônêmŋageŋ.
Ôkêŋ nêm têmtac gêwiŋ teŋgeŋŋa to biŋ ŋaŋêŋ êkwa eŋ auc.
8 Amboac tonaŋ aoc êôc nêm ŋaê endeŋ tôŋgeŋ
ma jaŋgôm biŋ, taŋ gajac mata naŋ, ŋanô êsa êtôm bêcgeŋ.