18
1 Biŋ taŋ Apômtau kêsôm gedeŋ Jeremia naŋ, tonec gebe 2 “Ôndi, ôsêp ŋac-kêpac-kuwaga nê andu ôna. Aê gabe jasôm biŋ êndêŋ aôm ôŋô aŋga tônê.” 3 Tec aê kasêp ŋac-kêpac-kuwaga nê andu gaja ma ŋac tau gêjac ku gêmoa. 4 Ma ku, taŋ eŋ gêjac ŋa nom naŋ, kêtu sec aŋga eŋ lêma, tec eŋ gêjam nomku tau ôkwi kêtu ku wakuc teŋ kêtôm lau-sêpac-kuwaga nêŋ mêtê.
5 Ma Apômtaunê biŋ gêdêŋ aê gebe 6 “O gôlôac Israel, aê katôm gebe jaŋgôm amac êtôm ŋac-kêpac-kuwaga gêgôm nomku atom me.” Apômtau kêsôm gebe “O gôlôac Israel, alic acgom, amac asêp aê lemoc kêtôm nomku kêsêp ŋac-kêpac-kuwaga lêma. 7 Êndêŋ ŋasawa teŋ oc jasôm êtu tôŋ êpi lau-m teŋ me gamêŋ kiŋŋa teŋ, gebe jambuc êsêac sa to jakôniŋ êsêac ma janseŋ êsêac su. 8 Mago lau, taŋ kasôm biŋ kêpi naŋ, embe sêkac tauŋ su aŋga sec, go aê janam gêŋ sec, taŋ gabe jaŋgôm êndêŋ êsêac naŋ ôkwi. 9 Ma êndêŋ ŋasawa teŋ aê jasôm êtu tôŋ êpi lau-m teŋ me gamêŋ kiŋŋa teŋ gebe jakwê sa to jasê. 10 Mago êsêac embe sêŋgôm sec ênêc aê laŋôcnêmŋa ma sêkêŋ taŋeŋ aê aoc atom, go aê janam gêŋ ŋajam, taŋ gabe jaŋgôm êndêŋ êsêac naŋ ôkwi. 11 Amboac tonaŋ tec ôsôm êndêŋ lau Juda to êndêŋ êsêac, taŋ sêŋgôŋ Jerusalem naŋ, gebe ‘Apômtau kêsôm biŋ tonec gebe Alic acgom, aê kamasaŋ lêŋ gêŋwapac enseŋ amac suŋa ma taêc gêjam lêŋ janac amacŋa. Amboac tonaŋ amac samob anam taôm ôkwi aŋga nêm lêŋ sec to amêtôc nêm lêŋ to nêm kôm êtu solop acgom.’
12 “Mago êsêac oc sêsôm gebe ‘Biŋ tonaŋ ŋanô masi. Aêac oc andaŋguc tauŋ ma têntac gêwiŋ ma aêac samob oc aŋgôm biŋ, taŋ ma ŋalêlôm ŋadani êkac aêacŋa naŋ, ŋanô êsa.’ ”
13 Kêtu tonaŋŋa Apômtau kêsôm biŋ tonec gebe
“Atu kênac tenteŋlatu, êsêac oc sêŋô biŋ amboac tonaŋ me masi.
Awêtakiŋ Israel gêgôm gêŋ secsêga teŋ.
14 Lebanon ŋasno oc êwê e ênaŋa aŋga poctêna Sirion me.
Me bu lôcŋa, taŋ keseleŋ toŋalucgeŋ naŋ, oc êpa me.
15 Mago ŋoc lau sêliŋ aê siŋ.
Êsêac sêkêŋ da ŋamalu gêdêŋ anôtô dansaŋ.
Êsêac sêôc seso aŋga nêŋ intêna,
taŋ gêmuŋgeŋ sêjam naŋ,
ma sêsa intêna ŋamagêŋa, sêsa intênasêga atom.
16 Êsêac oc sêŋgôm nêŋ gamêŋ êtu gasaŋ
ma lau sêsu susu endeŋ tôŋgeŋ.
Ma lau samob, taŋ sêwê sêna sêmêŋ naŋ têtakê ma têdaiŋ gêsuŋ.
17 Aê janseŋ êsêac êliŋ-êliŋ aŋga ŋacjo laŋôŋnêmŋa
amboac mu kelelo ka ŋalauŋ êliŋ-êliŋ.
Êndêŋ têm gêŋwapacŋa naŋ,
aê oc jatôc laŋôcanô êndêŋ êsêac atom, jambuc dêmôêc êsêac.”
Lau sêkic Jeremianê biŋ
18 Go êsêac sêsôm gebe “Ajôc, takic Jeremianê biŋmaŋ gebe eŋ embe êmoa atom, mago dabuŋwaga oc êpô lêna biŋsu atom ma ŋac tokauc êpô lêna biŋ ênam lau saŋa atom ma propete êpô lêna biŋ eoc lasêŋa atom. Ajôc, takêŋ taŋeŋ ênê biŋ samob ŋapepgeŋ gebe tanac lakô eŋ ŋa tau nê biŋ.”
Jeremianê mec
19 O Apômtau ôkêŋ taŋam aê
ma ôŋô ŋoc taŋiboa.
20 Sec êjô ŋajam oc êtôm me.
Êsêac sêkwê sê kêtu aêŋa.
Taêm ênam gebe kakô aôm laŋômnêmŋa
gebe jasôm biŋ ŋajam êndêŋ aôm êtu êsêacŋa
gebe janam aôm têmtac ŋandaŋ ôkwi aŋga êsêacnêŋ.
21 Amboac tonaŋ ôkêŋ nêŋ gôlôac ŋasec-ŋasec sêôc tôbôm.
Ôkêŋ êsêac sêndêŋ siŋ ŋaŋaclai.
Ôkêŋ nêŋ lauo têtu lauo kapoac to awêtuc
ma nêŋ ŋacwaga têtap gêmac sec sa e sêmac êndu.
Ma nêŋ lau matac sênac siŋ e siŋ enseŋ êsêac su.
22 Êndêŋ taŋ aôm ôsakiŋ kêjaŋgowaga têtap êsêac sa sep tageŋ naŋ,
taŋiboa êpi aŋga nêŋ andu samob.
Gebe êsêac sêkwê sê gebe aê jasêp ma sêwa lakô gebe ênac aê.
23 O Apômtau, mago aôm kôjala nêŋ biŋ samob, taŋ sêkic kêtu aêŋa naŋ.
Ôsuc êsêacnêŋ keso ôkwi atom
to ômbuŋ êsêacnêŋ sec su aŋga laŋômnêmŋa atom.
Ôkêŋ nêŋ ŋacjo sêku êsêac tulu sênêc aôm laŋômnêmŋa.
Sêndac aôm êndêŋ têm têmtac ŋandaŋŋa.