1 Tôbôm kapôêŋ kêkôniŋ gamêŋ tôŋ ŋanôgeŋ. 2 Êsêac seŋ polom, taŋ sêkôc aŋga Aiguptu naŋ, e gêbacnê su, go tameŋi kêsôm gêdêŋ êsêac gebe “Amu ana êtiam gebe anam ôli aêacnêŋ mo ŋagêdô.” 3 Tec Juda kêsôm gêdêŋ eŋ gebe “Ŋac tonaŋ kêjatu aêac ŋajaŋa ma kêsôm gebe ‘Amac alic aê laŋôc atom, e lasimi êwiŋ amac acgom.’ 4 Aôm embe ôsakiŋ lasiŋi êwiŋ aêac, go asêp naanam ôli nêm mo. 5 Embe ôsakiŋ eŋ êwiŋ atom, go aêac asêp atom gebe ŋac tau kêsôm gêgêŋ aêac gebe ‘Amac alic aê laŋôc atom, e lasimi êwiŋ amac acgom.’ ” 6 Israel kêsôm gebe “Amac agôm aê sec ma asôm lasimi ŋawae gêdêŋ ŋac tau kêtu asageŋŋa.” 7 Êsêac sêjô eŋ awa gebe “Ŋac tau kêkip aêac to ma gôlôac ŋam sa ŋapep ma kêsôm gebe ‘Tamemi gacgeŋ gêŋgôŋ mata jali me masi. Amacnêm lasitêwai teŋ gêŋgôŋ me masi.’ Biŋ, taŋ aêac ajac miŋ gêdêŋ eŋ naŋ, gêjô kênac tonaŋgeŋ. Aêac ajala biŋ, tê eŋ kêsôm kêdaguc gebe ‘Akôc lasimi andêŋ aê amêŋ’ nê, kwanaŋgeŋ amboac ondocgeŋ.” 8 Ma Juda kêsôm gêdêŋ tama Israel gebe “Ôsakiŋ ŋapalê tau êwiŋ aê, go andi ma asêlêŋ gebe tamoa mateŋ jali ma aôm to aêac ma nêŋ gôlôac ŋasec-ŋasec amboac tonaŋgeŋ, tamac êndu atom. 9 Aê jatu lautuc eŋ, ma eŋ ê lamu aê. Ôtu kênac eŋ êndêŋ aê lemoc. Aê embe jakôc eŋ jamu jawac to jakêŋ eŋ êkô aôm laŋômnêm atom, go jawê biŋ tonaŋ ŋakaiŋ endeŋ tôŋgeŋ. 10 Biŋŋanô, aêac embe tajaiŋ têm atom, oc aêac amu amêŋ wanêcgeŋ su.”

11 Go tameŋi Israel kêsôm gêdêŋ êsêac gebe “Embe amboac tonaŋ, naŋ aŋgôm amboac tec gebe Akôc gamêŋ tonecŋa ŋagêŋ mata êjamgeŋ êsêp nêm talu ma ajoŋ êndêŋ ŋac tônê awi siŋ êndêŋ eŋ ŋaômageŋ, amboac gêŋmalu ŋagec, to lêp ŋagec, ma ka ŋagêdô ŋatêkwi, ma kaŋa to lanip. 12 Ma akôc bôlêŋ luagêc êwiŋ tau. Bôlêŋ, taŋ sêkêŋ gêc nêm taluawa naŋ, akôc amu ana amboac tonaŋgeŋ. Oc moae sêgôm kêgôliŋ. 13 Akôc lasimi amboac tonaŋ ma andi amu andêŋ ŋac tau ana. 14 Embe akô ŋac tau laŋônêm, go ŋajaŋa ŋatau Anôtô taê walô amac gebe êsakiŋ nêm lasitêwai teŋ agêc Benjamin sêwiŋ amac sêmu sêmêŋ. Ma aêma nec embe jamoa togôlôacmêgeŋ, go jamoa amboac tonaŋ.” 15 Kêsôm su, go lau tau sêkôc gêŋ sêkêŋ ŋaômageŋŋa to sêkôc bôlêŋ luagêc gêwiŋ tau ma Benjamin gêwiŋ. Ac dêdi ma sêsêp Aiguptu sêja ma sêkô Josep laŋônêm.

16 Josep gêlic Benjamin gêwiŋ êsêac, tec kêsôm gêdêŋ gejobwaga anduŋa gebe “Ôwê lau tonec sêsô andu sêna. Ôŋguŋ bôc teŋ ma ono gebe lau tonec sêniŋ gêŋ sêwiŋ aê êndêŋ ocsalô tonec.” 17 Ŋac tau gêgôm kêtôm Josep kêjatu naŋ ma gêwê lau sêsô Josepnê andu sêja. 18 Ac sêkêŋ lau tau sêsô Josepnê andu, tec têtêc tauŋ ma sêsôm gebe “Êsêac sêkôc aêac tasô tonec kêtu ŋaôli, taŋ sêkêŋ kêsêp aêacnêŋ talu gêdêŋ tamêŋ kêtu ŋamata naŋŋa. Êsêac sebe sênac siŋ êndêŋ aêac e sêku aêac tulu ma sêkôniŋ aêac tatu gêŋôma to sêjaŋgo aêacnêŋ doŋki su.” 19 Ma êsêac têtu gasuc dêdêŋ ŋac, taŋ gejob Josepnê andu naŋ, ma sêjam biŋgalôm sêwiŋ eŋ sêkô andu ŋasacgêdô 20 ma sêsôm gebe “O ma apômtau, aêac asêp amêŋ têm teŋ sugac gebe anam ôli mo. 21 Gêdêŋ taŋ aêac aô lasê gamêŋ aniŋ aweŋŋa ma ajac ma talu lêtêŋ naŋ, atap ma bôlêŋ sa tomalageŋ gêc taluawa gêdêŋ-gêdêŋgeŋ. Tec aêac akôc gêŋ tau amu amêŋ kêtiam. 22 Ma aêac akôc bôlêŋ ŋagêdô gêwiŋ amboac tonaŋ abe anam ôli mo. Aêac ajam kauc ŋac, taŋ kêkêŋ ma bôlêŋ kêsêp ma talu.” 23 Eŋ gêjô êsêac aweŋ gebe “Atêc taôm atom. Nêm Anôtô to tameminê Anôtô oc kêkêŋ awa kêsêp nêm talu. Aê tec katap nêm bôlêŋ sa sugac.” Ma eŋ kêkôc Simeon gêdêŋ êsêac gêja. 24 Go eŋ gêwê lau tau sêsô Josepnê andu sêja ma kêkêŋ bu gêdêŋ êsêac gebe sêkwasiŋ eŋkaiŋ ma kêkêŋ gêŋ gêdêŋ nêŋ doŋki seŋ. 25 Êsêac sêŋô ŋawae gebe sêniŋ gêŋ aŋga tônê, tec sêmasaŋ gêŋ, taŋ sebe sêkêŋ ŋaômageŋ naŋ, ma sêsaê Josep gebe êô lasê êndêŋ ocsalô.

26 Gêdêŋ taŋ Josep gêô lasê nê andu naŋ, êsêac sêkôc gêŋ, taŋ sêmasaŋ naŋ, jasêsô dêdêŋ eŋ ma têtap labôc sêc eŋ akaiŋŋa. 27 Mago eŋ awa gêjac êsêac ma kêsôm gebe “Tamemi laŋgwa, taŋ ajac ênê miŋ gêdêŋ aê naŋ, gêmoa ŋajam me masi. Eŋ gêmoa mata jali me masi.” 28 Êsêac sêjô eŋ awa gebe “Aômnêm sakiŋwaga, aêac tamemai gêmoa ŋajam. Eŋ gêŋgôŋ mata jaligeŋ.” Ma êsêac sewec to têtap labôc. 29 Eŋ mata gedec ma gêlic lasi Benjamin, eŋ tau tênanê latu teŋ ma kêsôm gebe “Lasimi sauŋ, taŋ ajac ênê miŋ gêdêŋ aê naŋ, tau tonec me.” Go kêsôm gêdêŋ eŋ gebe “Latucenec, Anôtô êmoasiŋ aôm.” 30 Go Josep kêkacgeŋ gebe êwi êsêac siŋ gebe nê ŋalêlôm gêjam awa su lasi ma kêdabiŋ gebe êtaŋ lasê. Eŋ jakêsô nê balêm teŋ ma kêtaŋ gêmoa tônê. 31 Eŋ kêkwasiŋ laŋôanô su, go kêsa gêja. Eŋ kêpuc tau tôŋ ma kêsôm gebe “Akôc gêŋ taniŋŋa amêŋmaŋ.” 32 Êsêac sêjam sakiŋ eŋ tauŋa to êsêac tauŋŋa ma lau Aiguptu, taŋ seŋ gêŋ sêwiŋ eŋ naŋ, tauŋŋa amboac tonaŋgeŋ, gebe lau Aiguptu nêŋ jao kêkô gebe sêniŋ gêŋ sêwiŋ lau Ebolai atom. Gêŋ tonaŋ lau Aiguptu sêlic amboac gêŋ alôb-alôb. 33 Ma Josep têwai to lasi sêŋgôŋ eŋ nêmŋa. Ŋacsêga gêŋgôŋ mala, taŋ gêjac eŋ ŋawae naŋ, ma ŋac sauŋ gêŋgôŋ mala, taŋ gêjac eŋ ŋawae. Ma lau tau sêsala tauŋ e sêŋac lemeŋ. 34 Sêkêŋ gêŋ taniŋŋa gêdêŋ êsêac aŋga Josepnê tebo, mago sêkêŋ gêŋ taniŋŋa gêdêŋ Benjamin kêlêlêc êsêac ŋagêdô nêŋ su. Êsêac ŋagêdô têtap laclu tageŋ sa ma Benjamin kêtap nê laclu lemeŋ teŋ sa. Ma êsêac sênôm sêwiŋ eŋ e têntac ŋajam kêsa.