1 Ma Anôtô taê gêjam Noa ma bôc saleŋŋa to malacŋa, taŋ sêmoa sêwiŋ eŋ sêmoa waŋ ŋalêlôm naŋ. Ma Anôtô kêkêŋ mu kêsêlêŋ aŋga nom ma bu tau kêtaiŋ su. 2 Ma bumata nom ŋalêlômŋa to katam umboŋŋa ŋajaŋa kêsa. Kom gêjac kêtiam atom 3 ma bu kêtaiŋ su aŋga nom. Bu kêpoac bêc 150, go kêtaiŋ su 4 ma gêdêŋ ajôŋ kêtu 7ŋa ŋabêc 17 waŋ jagêlôc lôc Ararat. 5 Bu kêtaiŋ-kêtaiŋ e gêdêŋ ajôŋ kêtu 10ŋa. Gêdêŋ ajôŋ tonaŋ ŋabêc ŋamataŋa lôc ŋagêdô ŋatêpôê mêŋkêpi.

6 Bêc 40 gêjaŋa, go Noa gêlêc waŋ ŋakatam sauŋ, taŋ eŋ kêmasaŋ naŋ, su 7 ma kêkêŋ aoco teŋ gêlôb kêsa gêja. Moc tonaŋ gêlôb gêja-gêmu, gêja-gêmu e bu kêpa aŋga nom. 8 Ma Noa kêsaê e bêc 7, go kêkêŋ balôsi teŋ gêlôb kêsa gêja gebe êlic bu oc kêtaiŋ su aŋga nom me masi. 9 Mago balôsi kêtap ŋamala êlêwaŋ tauŋa teŋ sa atom, tec gêlôb gêmu gêdêŋ eŋ gêja kêtiam, gebe bu gacgeŋ kêpoac gêjam nom samucgeŋ auc. Tec eŋ kêmêtôc lêma kêsa jakêkôc moc kêsô waŋ ŋalêlôm gêja gêwiŋ eŋ. 10 Go kêsaê bêc 7 kêtiam, go kêkêŋ balôsi tau gêlôb kêsa gêja kêtiam. 11 Gêdêŋ kêtulala moc gêmu gêdêŋ eŋ gêmêŋ ma keseŋeŋ katêkwi ŋalauŋ matac teŋ. Gêdêŋ tonaŋ Noa kêjala gebe bu kêtaiŋ su aŋga nom. 12 Eŋ kêsaê bêc 7 kêtiam ma kêkêŋ balôsi gêlôb kêsa gêja, mago gêmu gêdêŋ eŋ gêmêŋ kêtiam atom.

13 Gêdêŋ taŋ Noanê jala kêtu 601 ŋaajôŋ ŋamataŋa ŋabêc ŋamataŋa naŋ, bu kêpa aŋga nom. Tec Noa kêkac waŋ ŋasalôm su e gêlic nom ŋakeleŋ kêsa. 14 Gêdêŋ ajôŋ kêtu luagêcŋa ŋabêc 27 nom ŋakeleŋ kêsa samucgeŋ. 15 Go Anôtô kêsôm gêdêŋ Noa gebe 16 “Ôwi waŋ siŋ ôsa ôna, amagêc nêm awê ma latômi to lawamio wakuc sêwiŋ aôm, 17 ma bôc samob, taŋ sêwiŋ aôm naŋ, gêŋ mateŋ jaliŋa samob, moc to bôc ma gêŋ, taŋ sêgalabgeŋ sêmoa nom naŋ, samob, ôwi êsêac siŋ sêwiŋ aôm asa ana gebe seola nom auc ma sêsu ŋalatu e têtu taêsam aŋga nom.” 18 Ma Noa gêwiŋ nê latui to nê awê ma lawaio wakuc sêsa sêja 19 ma bôc saleŋŋa to malacŋa samob, moc samob to gêŋ, taŋ sêgalabgeŋ sêmoa nom naŋ, samob tokaiŋ-tokaiŋ sêsa aŋga waŋ sêja.

20 Ma Noa gêboa Apômtaunê altar teŋ sa ma kêkôc bôc selec ŋagêdô to moc selec ŋagêdô ma kêkêŋ kêtu daja gêsac altar ŋaô. 21 Ma Apômtau gêŋu ŋamalu ŋajam ma kêsôm gêdêŋ tau gebe “Aê gabe japuc boa nom êtu ŋamalacŋa êtiam atomanô gebe ŋamalacnêŋ geo ŋapalêgeŋŋa tec gêc. Aê gabe janseŋ gêŋ mateŋ jali êtiam amboac gagôm su nê atom. 22 Êtôm nom ŋatêm samob sêsê ŋawê ma sejoŋ ŋanô, malô to ŋandaŋ, ocêsa to komô, eleŋ to êmbêc êjô tau êjô tau.”