1 Lau Israel sêwi gamêŋ Aiguptuŋa siŋ e ŋaajôŋ kêtu têlêac, go sêô lasê gamêŋ sawa Sinaiŋa. 2 Êsêac dêdi aŋga Repidim ma sêsêlêŋ e sêô lasê gamêŋ sawa Sinaiŋa ma sê nêŋ bec aŋga gamêŋ sawa tonaŋ sêŋgôŋ sêkanôŋ lôc tau. 3 Ma Mose kêpi lôc gêdêŋ Anôtô gêja. Ma Apômtau awa gêjac eŋ aŋga lôc ma kêsôm gebe “Ôsôm biŋ amboac tonec êndêŋ Jakobnê gôlôac to ôkêŋ ŋawae êndêŋ lau Israel gebe 4 Amac taôm alic gêŋ, taŋ gagôm gêdêŋ lau Aiguptu. Amac alic, gebe aê kabalaŋ amac amboac momboaŋ kêbalaŋ ŋalatu sêŋgôŋ nê magê ŋaô, ma kajoŋ amac adêŋ aê amêŋ. 5 Amboac tonaŋ amac embe taŋem wamu aê aoc ma ajop ŋoc poac, go atu aê tauc ŋoc gêŋ aŋga lau nomŋa samob nêŋ, gebe nom samucgeŋ ŋatau aê. 6 Amac oc atu ŋoc gamêŋ kiŋŋa ŋadabuŋwaga to atu ŋoc lau dabuŋ m teŋ. Biŋ tau tonaŋ aôm ôsôm êndêŋ lau Israel.”

7 Amboac tonaŋ Mose gêdêŋ lau gêja ma gêmôêc êsêacnêŋ laumata ma kêkêŋ biŋ samob, taŋ Apômtau kêjatu eŋ naŋ, ŋawae gêdêŋ êsêac. 8 Go lau samob sêlôc seleŋgeŋ ma sêsôm gebe “Biŋ samob, taŋ Apômtau kêsôm naŋ, aêac abe aŋgôm ŋanô êsa.” Ma Mose gêjac miŋ launêŋ biŋ tonaŋ gêdêŋ Apômtau. 9 Ma Apômtau kêsôm gêdêŋ Mose gebe “Ôlic acgom, aê jandêŋ aôm jawac jamoa tao majaŋ ŋalêlôm. Ma embe jasôm biŋ êndêŋ aôm, go lau sêŋô ma sêkêŋ êwiŋ aôm endeŋ tôŋgeŋ.”

Ma Mose gêjac miŋ launêŋ biŋ gêdêŋ Apômtau. 10 Ma Apômtau kêsôm gêdêŋ Mose gebe “Ôndêŋ lau ôna ma ôsôm êndêŋ êsêac gebe sênam dabuŋ tauŋ êndêŋ galoc ma eleŋŋa. Êsêac sêkwasiŋ nêŋ ŋakwê, 11 ma êndêŋ bêc êtu têlêacŋa êsêac sêmansaŋ tauŋ e êmbacnê, gebe êndêŋ bêc êtu têlêacŋa tonaŋ aê Apômtau jasêp lôc Sinai jawac ma lau samob sêlic. 12 Ônac belo êŋgi lôc auc êtu madiŋ ma ôsôm êndêŋ lau gebe ‘Ajop taôm gebe api lôc tau atom ma amoasac ŋamadiŋ tau atom. Ŋac, taŋ êmoasac lôc naŋ, senseŋ eŋ su ênaŋa. 13 Lau teŋ lemeŋ sêmoasac eŋ atom. Êsêac oc têtuc eŋ ŋa poc me sêpê eŋ êndu. Bôc me ŋamalac, taŋ sêmoasac lôc naŋ, sêmoa atom, sênaŋa.’ Êndêŋ taŋ dauc êtaŋ ê tôŋ baliŋgeŋ naŋ, êsêac sêpi lôc sêmêŋ.”

14 Amboac tonaŋ Mose kêsêp aŋga lôc gêdêŋ lau gêja ma kêsôm gêdêŋ êsêac, gebe sênam dabuŋ tauŋ. Ma êsêac sêkwasiŋ nêŋ ŋakwê. 15 Ma eŋ kêsôm gêdêŋ lau gebe “Amansaŋ taôm e êmbacnê êndêŋ bêc êtu têlêacŋa ma andambiŋ lauo atom.”

16 Gêdêŋ bêc kêtu têlêacŋa ŋabêbêcgeŋ naŋ, wapap gêjac to ôsic kêkac ma tao majaŋ teŋ kêkôm lôc auc. Ma dauc kêtaŋ kapôêŋ e lau samob, taŋ sêŋgôŋ gamêŋ becŋa naŋ têtênêp. 17 Go Mose gêwê lau sêsa aŋga gamêŋ becŋa sêja gebe sêpuc Anôtô tôŋtôŋ. Ma êsêac sêkô lôc tau ŋalabu. 18 Jadauŋ kêkôm lôc Sinai auc gebe Apômtau kêsêp lôc gêmêŋ gêmoa ja ŋalêlôm. Ma jadauŋ kêpi kêtôm ja geŋ oba ma lôc kêwiwic tau ŋasec. 19 Dauc kêtaŋ kêtu kapôêŋ-kêtu kapôêŋ e ŋadiŋdiŋ sec. Ma Mose kêsôm biŋ, go Anôtô gêjô eŋ awa ŋa wapap. 20 Ma Apômtau kêsêp lôc Sinai ŋatêpôê gêmêŋ. Ma Apômtau gêmôêc Mose gebe êpi lôc ŋatêpôê êna, ma Mose kêpi gêja. 21 Ma Apômtau kêsôm gêdêŋ Mose gebe “Ôsêp ôndêŋ lau naôkêŋ puc êsêac gebe sêŋgêli ŋamadiŋ êtu sêlic aêŋa nec atom. Embe sêŋgôm, oc taêsam sênaŋa. 22 Ma ôsôm êndêŋ dabuŋwaga, taŋ sêndambiŋ aê naŋ, gebe sênam dabuŋ tauŋ amboac tonaŋgeŋ. Embe masi, go aê janac êsêac êwiŋ.” 23 Ma Mose kêsôm gêdêŋ Apômtau gebe” Lau tau têtôm gebe sêpi lôc Sinai atom, gebe aôm kôjatu gebe ‘Anac belo aŋgi lôc auc êtu madiŋ ma anam dabuŋ lôc tau.’ ” 24 Ma Apômtau kêsôm gêdêŋ eŋ gebe “Ôsêp ôna ma ôkôc Aron agêc api amêŋ êtiam. Mago dabuŋwaga to lau sêŋgêli ŋamadiŋ êtu sêpi sêndêŋ aê sêmêŋŋa nec atom. Embe sêŋgôm, go janac êsêac.” 25 Amboac tonaŋ Mose kêsêp gêdêŋ lau jakêkêŋ ŋawae gêdêŋ êsêac.