1 Lau Amon nêŋ kiŋ Nahas kêpi gêmêŋ ma kêgi malac Jabes-Gilead auc. Go lau Jabes sêsakiŋ biŋ gêdêŋ Nahas gebe “Ômoatiŋ poac teŋ ôwiŋ aêac, go anam sakiŋ aôm.” 2 Mago ŋac Amon Nahas gêjô êsêac aweŋ gebe “Aê jamoatiŋ poac tageŋ tonec jawiŋ amac gebe jakip amac matemlakôp anôŋa sa ma jaŋgôm Israel samob majeŋ êsa.” 3 Go lau Jabes-Gilead nêŋ kasêga sêsôm gêdêŋ eŋ gebe “Ôkêŋ ŋasawa êtôm bêc 7 êndêŋ aêac gebe asakiŋ lau jaeŋŋa êtôm malac-malac Israelŋa samob sêna ma embe lau teŋ sênam aêac sa atom, go akêŋ tauŋ andêŋ amac.”

4 Gêdêŋ taŋ lau jaeŋŋa jasêô lasê malac Gibea, taŋ Saul gêŋgôŋ ma sêkêŋ ŋawae tau naŋ, lau samob sêpuc taŋiboa sa ma têtaŋ. 5 Gêdêŋ tonaŋ Saul gêwê bulimakao gêmu aŋga kôm gêmêŋ ma kêtu kênac gebe “Lau têtaŋ taŋiboa tônê ŋam amboac ondoc.” Go êsêac sêjac miŋ lau Jabes nêŋ biŋ gêdêŋ eŋ. 6 Gêdêŋ taŋ Saul gêŋô biŋ tau naŋ, Anôtônê Ŋalau gêjam eŋ auc ma eŋ têtac ŋandaŋ sec. 7 Ma eŋ kêkôc bulimakao luagêc ma kêsa gêŋgic-gêŋgic, go kêsakiŋ lau jaeŋŋa gebe sênac sam êtôm gamêŋ Israelŋa samobgeŋ ma sêsôm biŋ tonec gebe “Lau taŋ sêndi nasêndaŋguc Saul agêc Samuel atom naŋ, nêŋ bulimakao oc têtap biŋ tonaŋgeŋ sa.” Go Apômtau gêgôm êsêac têtakê ŋanô, tec êsêac dêdi tomalageŋ sêja. 8 Go Saul kêkac êsêac sa aŋga malac Besek. Lau Israel nêŋ ŋacwaga 300,000 to lau Juda nêŋ 30,000. 9 Ma eŋ kêsôm gedeŋ lau, taŋ sêkôc jaeŋ sêmêŋ naŋ, gebe “Asôm êndêŋ lau Jabes-Gilead gebe ‘Eleŋ oc ŋandaŋ êsa, go nêm gêŋwapac ŋagaô êsa.’ ” Gêdêŋ taŋ lau jaeŋŋa sêô lasê malac naŋ, lau Jabes sêŋô biŋ tau e êsêac têntac kêpô su. 10 Go lau Jabes sêkêŋ biŋ gêdêŋ Nahas gebe “Eleŋŋa aêac oc ansuŋ tauŋ awac, go amac aŋgôm aêac atôm taêm ênam.” 11 Gêdêŋ geleŋmata Saul gêwa nê lau kêkôc sêja toŋ têlêac ma gedeŋ bebec kanucgeŋ êsêac sêô lasê ŋacjonêŋ becobo ma sêjac lau Amon e oc ŋandaŋ kêsa. Ma lau ŋapopoc sêc êliŋ-êliŋ e ŋac luagêc sêmoa sêwiŋ tauŋ atom.

12 Go lau sêsôm gêdêŋ Samuel gebe “Lau ondoc sêsôm gebe ‘Saul ênam gôliŋ aêac atom.’ Ôkêŋ êsêac dandêŋ aêac gebe tanac êsêac êndu.” 13 Mago Saul kêsôm gebe “Êndêŋ ocsalô tonec ŋac teŋ êmac êndu atom, gebe galoc Apômtau gêjam nê lau Israel kêsi.” 14 Go Samuel kêsôm gêdêŋ lau gebe “Ajôc, aêac tapi malac Gilgal ma tawaka mêtê kiŋŋa sa.” 15 Lau samob sêpi jasêô lasê Gilgal ma sêkêŋ Saul kêtu kiŋ sêkô Apômtau laŋônêmŋa. Ma sêkêŋ da moasiŋŋa gêdêŋ Apômtau ma Saul to lau Israel samob têntac ŋajam kêlêlêc.