1 Tubus nituꞌ, migdundaan si Isus sog bonua nog Galili poꞌ migolig ion mangoy sog Judia poꞌ poksipian ion munuꞌ nog kounutananan nog bansa Hudyu. 2 Tibua, dangan daliꞌ na datong og kologyaꞌan nog bansa Hudyu nog iningolanan Og Ginang sog Kolokowan, 3 miktaluꞌ og putupusodanan non dianon nog, “Gonatoy mu og bonua koni bu angoy a dituꞌ sog Judia bagun da motongow nog sulangguꞌanan mu dituꞌ og gingyataꞌanan mu. 4 Poꞌ og gotow nog moleg ompulonag og bontugan non, sumboy ondiꞌ non bunion og ginang non koyon. Dadi, bila ininang mu noma og maꞌ nion koyon, sumboy potongowon mu na og glawas mu sog glam nog gotowanan.” 5 Saꞌan ituꞌ maꞌ nituꞌ og tinaluꞌ nog putupusodanan non koyon dianon poꞌ ilan siꞌoy, daꞌ ilan pa tud dianon.

6 Dadi, tinabal ilan ni Isus nog, “Ondaꞌ pa datong og tang nog bagun u kilolaan nog gotowanan. Tibua amu, minsan olo tangoy dun, mogusoy da dianiu. 7 Poꞌ ondiꞌ amu da kopokongitan nog gotowanan dini sog dunya. Tibua akon, pokongitan nilan akon poꞌ sabap sog kobon non poktoluꞌon ku dianilan og kohinangan nilan nog molaton. 8 Dadi, angoy amu na tuaꞌ sog ginang kituꞌ. Akon, ondiꞌ u pa sokaliꞌ poꞌ konaꞌ pa og tang nog mokpotongow u.” 9 Dadi, migonongonong pa ion sog Galili.

10 Dangan mikogonat og putupusodanan non koyon posunguꞌ sog kologyaꞌan kituꞌ sog Jerusalem, ion siꞌoy minangoy dosop dituꞌ. Tibua, ondaꞌ ion pokpotampal dia sog gotowanan. 11 Og kounutananan nog bansa Hudyu, pikponontong nilan ion dion sog kologyaꞌan koyon bu kobon nilan moksak dun nog, “Ain gidoy og gotow kituꞌ dun?”

12 Bu og gotowanan koyon dion, mikpogilomilom ilan paꞌali dianon. Og dumaanan mokpoktaluꞌ ilan nog, “Molongas ion nog gotow.” Tibua, og dumaanan sop mokpoktaluꞌ nog, “E, ondiꞌ le, sugaꞌid non, og gotow koyon poglimbungan non tibua og gotowanan.” 13 Tibua, daꞌ nilan toluꞌoy dia sog kodokolan poꞌ mondok ilan dia sog kounutananan nog bansa Hudyu.

14 Dangan migoginongaꞌ na og kologyaꞌan koyon, minangoy si Isus sog glomalomaan nog Baloy nog Poktomuyan dia sog Mikpongon mangka ion poktolipun mokpanad dituꞌ. 15 Dangan midongog nog kounutananan nog bansa Hudyu og pikpanad non koyon, kisobuꞌan ilan tokodoy dun. Miksinaksakoy ilan nog, “Ain non gidoy mialap og kotoan non koyon saka ondaꞌidun og mikpanad dun dianon?”

16 Dadi, tinabal ilan ni Isus nog, “Og pikpanad u koni, ondaꞌ poktidu sog dili kotoan ku, sugaꞌid non, dituꞌ miktidu sog mikpopangoy kituꞌ dianakon dini. 17 Ain og moleg mokokunut dia sog glegan nog Mikpongon, kosunan non bog ain miktidu og pikpanad u koni bog dia taꞌ sog Mikpongon otawaka dia taꞌ sog dili pomikilan ku. 18 Bila og gotow mokpanad nog dia da tidu sog dili pomikilan non, og pogopason non bagun tibua pogdongyaꞌan nog gotowanan. Tibua, og gotow kituꞌ nog mogapas moginang bagun ompotas dun og mikpopangoy kituꞌ dianon, ondiꞌ ion kotongowan nog diꞌ motud. 19 Konaꞌ taꞌ nog binogayan amu ni Muses nog pogbotadon niu? Saka daꞌidun motanan, sala kotow siꞌoy, og mikokunut dun! Iduma poksipian niu ma akon munuꞌ?”

20 Tinumabal og gotowanan nog, “Tinosopan ka bayuꞌ nog glatdiwata! Sima moleg munuꞌ dianika?”

21 Tinumabal si Isus nog, “Saka buan mosobuꞌ amu ma dun bu pogokaꞌon niu ma akon dun dangan ininang u nog solabuk ginang kituꞌ nog kosobuꞌsobuꞌ sog Gondow nog Pogulali? 22 Si Muses dinumondag kobon nituꞌ nog og gombataꞌ niu nog glaki sumboy tukon. (Og botad kituꞌ ondaꞌ dianon miktidu, sugaꞌid non, dia pa miktidu sog mokogulanganan kituꞌ nog mikuna pa dianon.) Bu bila ombonaꞌ og kopoktuk nog gombataꞌ niu sog Gondow nog Pogulali, tukon niu da. 23 Dadi, bila tukon niu og gombataꞌ niu sog Gondow nog Pogulali bagun niu munut og pogbotadon ni Muses, iduma lolingitan amu ma dianakon bila pokodagon ku og gotow sog Gondow nog Pogulali? 24 Naꞌ niu ukumon og gotow nog sagya tibua motongow niu dianon. Sugaꞌid non, liling niu nog mahatul og kohinangan non bianan sog motud.”

25 Tubus nituꞌ, ongon og duma gotowanan sog Jerusalem miksak nog, “Konaꞌ non taꞌ gidoy ion og gotow kituꞌ nog poksipian nilan munuꞌ? 26 Tontong niu poloꞌma ion, dion ion mimali sog kodokolan nog gotow, saka, daꞌ nilan ma ion pomagoy dun. Og kounutananan koyon, mimikil ilan taꞌ gidoy nog ion non na ion og Kristu kituꞌ? 27 Tibua, og gotow koni, kisunan ta na ini bog ain ion miktidu. Saka, og Kristu kituꞌ, bila matong na ion, ondaꞌidun og mokosun dun bog ain poktidu.”

28 Sog solian pa ni Isus mokpanad dion sog glomalomaan nog Baloy koyon nog Poktomuyan dia sog Mikpongon, miktaluꞌ ion nog mosikad nog, “Oꞌo! Bila amu, long niu dun, kisunan niu akon bu kosunan niu dosop bog ain u miktidu. Tibua, ondaꞌ u angoy dini nog dili bayaꞌ u. Sugaꞌid non, ngon og mikpopangoy dianakon dini bu ion motud. Ondaꞌ niu ion kilolaoy. 29 Tibua akon, kilolaan ku ion poꞌ dituꞌ u non miktidu bu ion og mikpopangoy dianakon.”

30 Dadi, sabap dituꞌ, inangoy nilan bosia ukpaꞌoy. Tibua, ondaꞌidun mokogonop mukpaꞌ dianon poꞌ daꞌ pa datong og tang non. 31 Tibua, modakol da og gotowanan og tinumud dianon. Bu long nilan dun, “Bila matong na og Kristu, mokinang taꞌ gidoy ion nog gingyataꞌanan nog labi pa sog gininang nog gotow koni?”

32 Og parasiuanan koyon, midongog nilan og gilom nog gotowanan koyon paꞌali dia ni Isus. Dadi, ilan bu og mokokotas nog boliananan koyon, dinumondag ilan nog polongipatanan koyon nog Baloy nog Poktomuyan dia sog Mikpongon nog ongoyon nilan ukpaꞌoy si Isus.

33 Miktaluꞌ si Isus dia sog gotowanan nog, “Mokunul ita pa niu podaliꞌdaliꞌ. Tubus nituꞌ, mokpuliꞌ u na dituꞌ sog mikpopangoy kituꞌ dianakon. 34 Pokponontongon niu akon, tibua, ondiꞌ niu akon motongow poꞌ og gongayan ku ondiꞌ amu mokangoy dun.”

35 Dangan midongog nog kounutananan nog bansa Hudyu og tinaluꞌ ni Isus kituꞌ, miksinaksakoy ilan nog, “Ain gidoy poksipi mangoy og gotow koyon nog ondiꞌ ta ion motongow dun? Mangoy taꞌ gidoy ion sog bonuaanan nog Girik nog ain pigonongan nog pakasi Hudyuanan ta bu pokpanad ion dia sog gotow Girik? 36 Olo gidoy og maꞌana nog piktaluꞌ non koyon nog pokponontongon ta ion, tibua, ondiꞌ ta ion motongow bu ondiꞌ ita mokangoy sog ain gongayan non?”

37 Og gimpusan nog gondow nog kologyaꞌan koyon, ion non og bololagaꞌ tokodoy. Sog tang koyon minindog si Isus mangka poktaluꞌ nog mosikad nog, “Simasima og kuowon dianiu, mangoy ion dini nakon mangka inum! 38 Simasima og tumud dianakon, mimung maꞌ nog sinulat kituꞌ sog Kitab nog, ‘Moglayas tidu sog dialom non og tubig nog mogbogoy nog kotubuꞌ nog daꞌ kopus non.’ ”* 7:38 Isaya 58:11 39 Og pigolong non koyon, ion non og Bolakat nog Mikpongon nog motabuk nog gotowanan sog gunanunan koyon nog ain tinumud kituꞌ dia ni Isus. Sog tang kituꞌ, ondaꞌ pa bogoyoy og Bolakat nog Mikpongon poꞌ ondaꞌ pa si Isus potasoy dituꞌ sog glangit.

40 Dangan midongog nilan og piktaluꞌ ni Isus koyon, ongon miktaluꞌ nog, “Og gotow koni, ion non dodaꞌ og Polomolatas kituꞌ nog taluꞌ nog Mikpongon nog pokpodotongon ta.”

41 Miktaluꞌ sop og dumaanan nog, “Ion non ini og Kristu!”

Ongon dosop miktaluꞌ nog, “Og Kristu, ondaꞌ ion dituꞌ poktidu sog Galili. 42 Poꞌ long pa nog sinulat nog taluꞌ nog Mikpongon, og Kristu kituꞌ dituꞌ poktidu sog pangkat ni Apuꞌ Dabid bu dituꞌ ion botaꞌoy sog Betlehem, og bonua nog pigonongan ni Apuꞌ Dabid kobon nituꞌ.” 43 Sabap sog maꞌ nituꞌ og pikilan nilan paꞌali dia ni Isus, mibahagiꞌ og gotowanan dun. 44 Og duma dianilan, moleg mukpaꞌ dianon. Tibua, daꞌ nilan kinang.

45 Dadi, og polongipatanan nog Baloy nog Poktomuyan koyon mikpuliꞌ sog parasiuanan bu mokokotas kituꞌ nog boliananan. Sinakan ilan nog, “Olo nion? Daꞌ niu ma ion oitoy dini!”

46 Dadi, tinumabal og polongipatanan koyon nog, “Ondaꞌidun pa sibon gotow nog mikopoktaluꞌ mamaꞌ nog kopoktaluꞌ non.”

47 Sokaliꞌ tinumabal og parasiuanan koyon nog, “Aba, amu siꞌoy, kibigyakan non dosop bayuꞌ amu? 48 Daꞌidun tanan sala kotow siꞌoy nog kounutananan nog bansa ta bu og parasiuanan koni og tinumud dianon. 49 Og gotowanan koyon, og sobuꞌ ilan nog botad nog pilatas ni Muses. Saꞌan da poliholaꞌon ilan nog Mikpongon.”

50 Ongon sala kotow dianilan dion si Nikudimus. Ion non og parasiu kituꞌ nog sibon mangoy dituꞌ ni Isus nog gobi. Miktaluꞌ ion dianilan nog, 51 “Long pa nog Botad ta, ondiꞌ ita mokopongdodaliꞌ mongukum nog gotow tontal da diꞌ ta inongogan mahatul bagun ta kosunan bog olo dodaꞌ og kohinangan non.”

52 Sokaliꞌ tinumabal og duma parasiuanan koyon nog, “Tidu a taꞌ dosop sog Galili? Liling mu mahatul bog olo og sinulat sog Kitab poꞌ dion nika kotongow nog daꞌidun og polomolatas nog taluꞌ nog Mikpongon nog moktidu sog Galili.”† 7:52 Sabap sog glolingit nilan, milapang ilan poꞌ og polomolatas kituꞌ nog si Jona, miktidu ion sog Galili, bu ngon pa bayuꞌ duma. [ 53 Tubus nion og glam nilan dion, mikpoguliꞌ ilan na.