1  พะจาว มัฮ เนอึม กซัต, ไมจ ปุย โครยญ เจือ ปุย นัปทื ปอ รกุฮ รเตียง แตะ. ก งาวม คึ ยุฮ อื อาวต ฮลาวง ฮา โม เตปด่า ไก โพรยจ. เกือฮ โรฮ ปลัฮเตะ ดุงเดียง ฆาื โรฮ นึง นัปทื แตะ. 2  พะจาว ป อาวต เมือง ซีโยน มัฮ เนอึม ป ระ ป คาว. มัฮ ป ระ ไล ฮา ปุย โครยญ เจือ ปุย. 3 ไมจ ปุย ลืลาว มอยฮ ระ ไล ยุฮ อื นึง มัฮ อื ป คึ ป นัก. พะจาว มัฮ เนอึม ป ซง่ะ ซงอม.

4 โอ กซัต ป ตึก นึง ระ อัมนัต แตะ, ปะ ฮรัก เปอะ กัน ปุก กัน ลอก. ปะ เกือฮ เปอะ กัน ซื กัน ไซ ยุฮ แตะ ตอน ฮมัน. ปะ เอีจ ยุฮ เปอะ ป ปุก ป ลอก ป ซื ป ไซ นึง เมือง อิซราเอน. 5 โม เปะ เตือง โอยจ เปอะ, ไมจ เปอะ ลืลาว เยโฮวา พะจาว ยุฮ เอะ. ไมจ เปอะ นุ่ม ติ แตะ ไววอน โบ ก โบลวง อื ชวง แตะ. พะจาว มัฮ เนอึม ป ซง่ะ ซงอม.

6 ไอ โมเซ ไม่ อาโรน มัฮ ซตุ ยุฮ อื. ซามูเอน มัฮ โรฮ ป ไววอน ปัว นึง มอยฮ อื. ปุย โม เซ กอก ปัว พะจาว เรอึม แตะ. พะจาว โลยฮ อื ละ อื. 7 พะจาว ลปุง ไม่ อื เน่อึม นึง ด่อง ชุต รวู เซ. ปุย โม เซ เนอึง ป อัฮ โกตไม ยุฮ อื. ยุฮ อื ตัม ลปุง ซตอก อื อาึง.

8 โอ เยโฮวา ป มัฮ พะจาว ยุฮ เอะ, ปะ โลยฮ เนอึม เปอะ รซอม ปัว โม ปุย ไน เปอะ ละ อื. ปะ ปัง เกือฮ เปอะ ปุย ไน แตะ ลอก ตุต ฆาื ยุฮ อื ป พิต ละ เปอะ, ปะ เปลีฮ ลั่ง เปอะ มัฮ แตะ พะจาว ป โอ ทื โซะ โระ โกลยจ พิต ยุฮ อื เซ ละ อื.

9 โม เปะ เตือง โอยจ เปอะ, ไมจ เนอึม เปอะ ลืลาว เยโฮวา ป มัฮ พะจาว ยุฮ เอะ. ไมจ เปอะ นุ่ม ไววอน นึง บลาวง ซัมคัน ยุฮ อื. เยโฮวา พะจาว ยุฮ เอะ มัฮ เนอึม ป ซง่ะ ซงอม.