1 เญือม อาวต เปอะ ไม่ เม่ะมั่ก รพาวม ตุก แตะ, ปัว พะจาว ง่อต ฮมอง ป ปัว เปอะ. ปัว พะจาว ยุฮ ยาโคป โซะโกะ ฮรักซา นึง เปอะ. 2 ปัว เกือฮ กัน เรอึม ยุฮ พะจาว โอก ละ เปอะ เน่อึม นึง วิฮัน ยุฮ อื, ไม่ เกือฮ อื เรียง แด่น ระ ยุฮ แตะ ปลาึฮ ละ เปอะ เน่อึม นึง เมือง ซีโยน. 3 ป ทไว เปอะ ละ พะจาว เซ, ปัว พะจาว รัป ละ เปอะ เตือง โอยจ อื. โอเอีฮ ป ตอง เปอะ ทไว เซ ปัว เกือฮ แปน ป ปุก รพาวม พะจาว. 4 โอเอีฮ เมาะ ป ฆวต ไอฮ เปอะ ปัว พะจาว โพต ละ เปอะ. ป คิต ป ง่อต เปอะ อาึง นึง แพนกัน ยุฮ แตะ, ปัว พะจาว เกือฮ ฟวยจ ละ เปอะ โครยญ เจือ, 5 เดอึม โม เอะ ซ โฮลฮ ญันดี่ ปีติ นึง เอีจ เป เปอะ, ไม่ ยวก เกอะ โทง เบือ มอยฮ พะจาว ยุฮ แตะ. ปัว พะจาว โพต ละ เปอะ ตัม ป ปัว เปอะ โครยญ เจือ.

6 ปเลี่ย เฮี อาึ เอีจ ยุง เงอะ, มัฮ พะจาว ป เกือฮ กซัต เลือก แตะ อาึง เซ เป เยอ, ไม่ โลยฮ อื รซอม ไววอน อื เน่อึม นึง เมือง มะลอง ป มัฮ เมือง ซง่ะ ซงอม ยุฮ แตะ. เอีจ มัฮ เกือฮ อื เป เบือ อัมนัต ตึก นึง ระ ยุฮ แตะ เซ. 7 ปุย ง่อน อื อาึง รพาวม แตะ นึง เลาะ รุป เซิก โฮวน ยุฮ แตะ, ง่อน อื อาึง รพาวม แตะ นึง บรอง โฮวน ยุฮ แตะ. เอะ ปังเมอ อาึง รพาวม แตะ นึง อัมนัต ระ ยุฮ เยโฮวา ป มัฮ พะจาว ยุฮ แตะ. 8 ปุย โม เซ เยอ ซ ฆลาื, เญือะ ซ เกียฮ โกฮ โตว. เอะ ปังเมอ ซ โกฮ ชุง แม เยอะ, ไม่ โฮลฮ โฮะ อาวต ตอน อาวต ฮมัน.

9 โอ พะจาว, ปัว เปอะ เกือฮ กซัต ยุฮ เอะ เซ เป. เญือม ปัว เอะ นึง เปอะ ปัว ปะ ง่อต ละ แตะ.