1 ลไล คัง ลั่ง ปุย เยเรมี นึง ควง อาวต ตฮัน มอง กซัต เซ, ลปุง พะจาว ฮอยจ แม ละ อื ติ โฮน แม. 2 อัฮ เฮี ละ อื, “พะจาว ป ยุฮ ปลัฮเตะ, ไม่ ลวน อื เกือฮ แปน ฮุป แปน ฮอย แตะ ไม่ เกือฮ อื อาวต ตอน ฮมัน นึง เบือง แตะ เซ, มอยฮ อื มัฮ เยโฮวา. พะจาว เซ อัฮ เฮี ละ เปอะ. 3 ไมจ เปอะ กอก ปัว นึง อาึ, เญือม เซ อาึ ซ โลยฮ ละ เปอะ. อาึ ซ รโฮงะ ไลลวง ป ระ เนอึม ไล ป โฮฮ ฮา เกียฮ คาวไจ ปุย อื ละ เปอะ. มัฮ ป โอ ปะ ดิ ยุง ไพรม อื. 4-5 อาึ ป มัฮ เยโฮวา พะจาว ยุฮ อิซราเอน ซ รโฮงะ ไลลวง เญือะ ปุย นึง เวียง เฮี เตือง เญือะ ยุฮ กซัต นึง อื, ป มัฮ เญือะ เอีจ เญื่อฮ ปุย โฮวน ลัง นึง เพรียง แตะ เวียง เซ ละ ซ ตอซู แตะ ไม่ โม บ่าบี่โลน. ดัฮ ปุย เอีจ ตอซู เนอึม ปุ แตะ โฮ, โม บ่าบี่โลน เซ ซ ยุฮ ยุม ไม่ ปุย โฮวน ปอ นาวก เญือะ โม เซ นึง ป ยุม เอิน. มัฮ อาึ ป ซ เกือฮ อื ยุม ตอก เซ นึง รอก ลัมเลือ พาวม อาึ นึง. อาึ เญือะ ปุน แลน โตว เวียง เฮี ฆาื กัน ฆอก กัน เบร โครยญ เจือ ป ยุฮ ปุย นึง อื.

6 “ตอก ออฮ ตอก เอีฮ ญุ่ก, อาึ ซ เกือฮ แม ปุย นึง เวียง เฮี ไฮ ป โซะ อาวม, อาึ ซ เยื่อ เบราะ บั่ต ลอก อื เซ เกือฮ ไฮ, ซ เกือฮ แม เยอะ โฮลฮ อาวต เฮน อาวต ฮลอง ไม่ ไมจ ป ยุ เคราะ ป ฮมอง แตะ. 7 อาึ ซ เกือฮ โม ยูด่า ไม่ โม อิซราเอน โฮลฮ อาวต ไมจ มวน แม ตอก ไพรม แตะ. ซ โก โคระ แม เยอะ เกือฮ ตอน ฮมัน ตอก เจน โฆะ โฮ. 8 ปุย โม เซ ปัง เอีจ ยุฮ ป พิต ละ อาึ, อาึ ซ รไซจ ลั่ง พิต โฌวะ ยุฮ อื เกือฮ ซง่ะ. กัน เลฮ อื เตียง อาึ ไม่ มั่ป ตุต ยุฮ อื เซ อาึ ซ ยวก ละ อื เตือง โอยจ อื. 9 เวียง เยรูซาเลม เฮี ซ โฮลฮ อาึ นา ตา แตะ นึง, ไม่ ซ แปน แม ควน โฮลฮ อาึ รพาวม ไมจ มวน แตะ นึง, ไม่ โญตซัก แตะ ซองนา เมือง ปุย ปลัฮเตะ เตือง โอยจ อื. เมือง โม เซ ซ ฮลัต ปอ รกุฮ แตะ เญือม ฮมอง อื กัน ไมจ ป ยุฮ อาึ ละ เวียง เยรูซาเลม เซ ไม่ ตอก เกือฮ อาึ อื จเลิน เนอ,” อัฮ เซ.

10-11  พะจาว อัฮ โรฮ อื ตอก เฮี, “โม เปะ เอีจ อัฮ เปอะ เมือง อาวต เปอะ เฮี มัฮ เยือ ลาึน ซออฮ ไม่ โอ อื เญาะ ไก ปุย ไม่ ซัตซิง นึง. เอีจ ปุก ป อัฮ เปอะ เซ. ย่วง ระ ย่วง แตวะ นึง แควน ยูด่า ไม่ กอง เวียง เยรูซาเลม เอีจ ม่าวง เนอึม. เญือะ ไก โตว ปุย ไม่ ซัตซิง นึง เฟือฮ. ปัง มัฮ ตอก เซ นา ก ม่าวง อื เซ โม เปะ ซ ฮมอง แม เปอะ เซียง จอยะ เชีย ลเบี่ย ปาึง ปุย นึง, เบือ ไมจ มวน รพาวม แตะ แม, ไม่ เซียง มวน โมฮ รโอฮ รออง นึง กัน โซมญุ ปุย. ซ ฮมอง แม เปอะ เชีย ปุย เญือม ฮาวก ทไว อื โอเอีฮ ละ อาึ นึง วิฮัน ยุฮ ฮุ, ละ เปลีฮ อื รพาวม ญันดี่ แตะ. โม เซ ซ อัฮ เฮี, ‘ไมจ เปอะ ญันดี่ นึง พะจาว ป กุม ตฮัน มะลอง. มัฮ ป ตึก นึง ไมจ แตะ. รพาวม ฮรัก ตอน ฮมัน ยุฮ อื ไก โตว ลอยจ ไม่,’ ซ อัฮ เซ. อาึ ซ เกือฮ ปุย เมือง เฮี จเลิน ตอก ไพรม แตะ,” อัฮ เซ พะจาว.

12  พะจาว กุม ตฮัน มะลอง อัฮ เฮี, “เมือง เฮี ป มัฮ เยือ ลาึน ซออฮ ป มัฮ นา ก โอ ปุย ไม่ ซัตซิง นึง อื ไก, ซ ไก แม เบือง อาวต โม ป เลียง แกะ นึง ละ ซ เลียง อื แกะ ยุฮ แตะ นึง กังเด่น นึง อื. 13 ย่วง ระ ย่วง แตวะ นึง บลาวง, ไม่ นึง ตูเตียม, ย่วง นึง เนเกป, เตือง ย่วง นึง แควน เบ่นยามิน, ไม่ ย่วง โบ เยรูซาเลม, ฮอยจ ละ ย่วง ระ ย่วง แตวะ นึง เมือง ยูด่า, ซ ไก ตื โม ป เลียง แกะ นึง. ซ เมีญ แม แกะ ยุฮ แตะ ตอก ไพรม อื โฮ,” อัฮ เซ พะจาว.

14  พะจาว อัฮ เฮี, “เอีจ ซ เติง เวลา เญือม ซ ยุฮ อาึ อื ตัม ป ซันญา แตะ อาึง ละ โม อิซราเอน ไม่ โม ยูด่า เยอ. 15 ดัฮ เวลา เซ เอีจ เติง เนอึม โฮ อาึ ซ เกือฮ แม โงว โคะ ยุฮ ด่าวิต เซ โอก แม ฆอย. ปุย เซ ซ แปน กซัต ซืไซ. ซ ยุฮ ป ปุก ป ลอก ไม่ ป ซื ป ไซ เลี่ป บั่นเมือง ยุฮ แตะ. 16 เญือม เซ ปุย เมือง ยูด่า ไม่ โม เยรูซาเลม ซ โปน อื ป โอ ไมจ เจอ, ไม่ ซ อาวต เฮน ฮลอง อื ไม่ ปุ แตะ. เวียง เซ ปุย ซ อัฮ เฮี ไม่ อื, ‘พะจาว มัฮ กัน ซื กัน ไซ ยุฮ เอะ,’ ซ อัฮ เซ ไม่ อื. 17 อาึ ป มัฮ พะจาว อัฮ เฮี, ‘ด่าวิต ซ ดุต โตว จัตเจือ อื ละ ซ แปน อื กซัต เมือง อิซราเอน เนอ. 18 โม ซตุ ป มัฮ จัตเจือ เลวี ซ ดุต โตว โรฮ เจือ อื ละ ซ แปน อื ป ซ รซอฮ ละ อาึ นึง กัน ตอง อื ทไว ซัตซิง เตือง ตัว อื, ไม่ ทไว อื เฮงาะ รโกะ ไม่ โอเอีฮ ทไว ปะจัม ปุย โครยญ ซเง่ะ โรฮ’ ” อัฮ เซ.

19  พะจาว อัฮ เฮี ละ เยเรมี, 20 “อาึ เอีจ ซันญา ซโตฮ ไม่ เมือ ซเง่ะ ไม่ เมือ ก ซาวม ละ ซ เกือฮ เวลา เฟียก เวลา ซเปีย เซ ไก ลอป ตัม ปุก อื ไล แตะ. ลปุง ซันญา เซ มัฮ ป ตอน ป ฮมัน โอ เกียฮ เปียน ติ แตะ. 21 ตอก โรฮ เซ อาึ เอีจ ซันญา อาึง ไม่ ด่าวิต ป มัฮ กวนไจ ยุฮ แตะ นึง ซ เกือฮ แตะ จัตเจือ อื โฮลฮ ลอป แปน กซัต โรฮ. เอีจ ซันญา โรฮ อาึง ไม่ โม ซตุ ป มัฮ โม เลวี เซ ละ ซ โฮลฮ อื รซอฮ ลอป ละ อาึ โรฮ. ลปุง ซันญา เตือง ลอา เจือ อื เซ มัฮ โรฮ ป ตอน ป ฮมัน โอ เกียฮ เปียน ติ แตะ ตอก เซ โรฮ. 22 โนง ซโมยญ นึง มะลอง ไม่ โนง ไฮมจ ไก นึง เกาะ โฮวน ปอ โอ ปุย เญาะ เกียฮ เมีญ ตอก ออฮ, อาึ ซ เกือฮ จัตเจือ ด่าวิต ป มัฮ กวนไจ แตะ เซ พรุฮแพร โฮวน ตอก เซ โรฮ. โม เลวี ป รซอฮ ละ อาึ เซ ซ โฮวน โรฮ ตอก เซ โรฮ,” อัฮ เซ พะจาว.

23  พะจาว อัฮ เฮี ละ เยเรมี, 24 “อัม เอีจ ซังเกต เปอะ ป อัฮ ปุย โม เฮี ละ ปุ แตะ? โม เซ เอีจ อัฮ พะจาว โอ เญือะ แลน แก โม อิซราเอน ไม่ โม ยูด่า ป มัฮ จัตเจือ ปุย ลอา มู ป เอีจ เลือก ไพรม อื โฮ. เญือม อัฮ อื ตอก เซ เอีจ เมาะ โรฮ พามัต ดู่แควน อื ปุย ไน อาึ, ไม่ โอ อื เญือะ เมีญ มัฮ ปะเทต เฟือฮ. 25-26 อาึ ป มัฮ พะจาว ปังเมอ เอีจ เกือฮ ลปุง ซันญา ยุฮ แตะ ละ เมือ ซเง่ะ ไม่ เมือ ก ซาวม อื ไม่ ดุฮ อาึง โกต ลเบี่ยป ละ ปลัฮเตะ ไม่ ปลัฮ มะลอง. แจง เกือฮ อาึ โกต ลเบี่ยป ตอน ฮมัน ละ โอเอีฮ เซ ตอก ออฮ, อาึ แจง โรฮ ซ เกือฮ ลปุง ซันญา ยุฮ แตะ ตอน ฮมัน ละ จัตเจือ ยาโคป ตอก เซ โรฮ. ละ ด่าวิต ป มัฮ กวนไจ ยุฮ ฮุ อาึ ซ เกือฮ ตอน ฮมัน ละ อื ตอก เซ โรฮ. อาึ ซ เลือก เนอึม โม จัตเจือ ด่าวิต ติ ปุย ละ ซ ตัตเตียง อื จัตเจือ อัปราฮัม, ยิซฮัก, ไม่ ยาโคป. อาึ ซ เลียก พาวม เนอึม นึง ปุย ไน แตะ. ซ เกือฮ เยอะ โฮลฮ อาวต ไมจ มวน แม ตอก ไพรม แตะ,” อัฮ เซ พะจาว.