1 คัก เฮี มัฮ ลปุง พะจาว ป ฮอยจ ละ เยเรมี, ปุก เญือม ดวน กซัต เซเด่คียา ปาชเฮอ กวน มันคีอา ไม่ เซฟันยา กวน มาอาเซอา ป มัฮ ซตุ ฮอยจ เคะ เยเรมี. โม เซ ฮอยจ อัฮ เฮี, 2 “ปัว เปอะ ไฮมญ พะจาว ละ โม เอะ เฮี, นึง เอีจ แวต เนบู่คัตเนซา ป มัฮ กซัต เมือง บ่าบี่โลน เวียง อาวต เตอะ. เมอ เตือง อื พะจาว ซ ยุฮ ป ซัมคัน ละ เอะ ตอก กอ ยุฮ ไพรม แตะ, ไม่ ซ เกือฮ อื เนบู่คัตเนซา เซ ราึต ฮา เอะ ยุ่ง,” อัฮ เซ.

3 เยเรมี ปังเมอ อัฮ เฮี ละ อื, 4 “ไมจ เปอะ รโฮงะ ละ กซัต เซเด่คียา ตอก เฮี, ‘เยโฮวา พะจาว ทื โม อิซราเอน อัฮ เฮี ละ เปอะ. โม ตฮัน ยุฮ เปอะ ป กัมลัง ตอซู ปุ แตะ ไม่ กซัต เมือง บ่าบี่โลน ไม่ ตฮัน ยุฮ อื เซ อาึ ซ เกือฮ ไป. ซ เกือฮ วิจ ไม่ เพลียฮ ยุฮ โม เปะ รโจะ เยือ เอิน แปน กองๆ แตะ นึง บั่กบ่วน เวียง เซ. 5 มัฮ อาึ ไอฮ ป ซ ตอซู ปุ แตะ ไม่ โม เปะ นึง อัมนัต ระ รที เรียง แตะ เตือง โอยจ อื. ซ เปลีฮ เนอึม รพาวม รอก แตะ ละ เปอะ ไม่ รพาวม ฮาวก เรียง ยุฮ แตะ. 6 อาึ ซ ยุฮ ยุม ไม่ โม ป อาวต นึง เวียง เฮี. ซ ยุม นึง พาญัต ฆอก, เตือง ปุย นึง อื ไม่ ซัตซิง ยุฮ อื. 7 ฟวยจ เซ อาึ ซ มอป เซเด่คียา ป มัฮ กซัต โม ยูด่า ไม่ โม ลุกนอง อื, ไม่ โม ลัปซด่อน นึง เมือง เฮี ละ เนบู่คัตเนซา กซัต เมือง บ่าบี่โลน เซ. เอีจ มัฮ โม ป โปน ฮา ยุม แตะ นึง พาญัต ฆอก ไม่ นึง กัน รุป, ไม่ นึง กัน ไปลญ เออึป ปุย เซ. ซ มอป เนอึม ละ โม ป เกละยุ อื เซ ป ฆวต ยุฮ ยุม ไม่ อื เซ. กซัต เซ ซ ยุฮ เนอึม ยุม ไม่ อื นึง วิจ. ซ ญอม โตว ฮลักกอ ปุย, ซ ไก โตว ตอก เลียก พาวม อื นึง ปุย เฟือฮ. เอีจ มัฮ อาึ ป มัฮ พะจาว ป อัฮ เซ ละ เปอะ’ ” อัฮ เซ.

8 เญือม เซ พะจาว ดวน แม อาึ ซึป ลปุง แตะ ละ ปุย ตอก เฮี, “ง่อต แลน, อาึ ป มัฮ พะจาว เกือฮ โม เปะ เลือก ป ลอา เจือ เฮี ตา ติ เจือ, เตอึม ป เลือก เปอะ นึง อื. มัฮ คระ เลียก ลั่ก ไอม ติ มัฮ คระ เลียก ลั่ก ยุม ติ. 9 เมาะ ป อาวต ลั่ง นึง เวียง เฮี ซ ยุม นึง กัน รุป แตะ ง่อน, นึง ไปลญ เออึป ง่อน, ไม่ นึง พาญัต ง่อน. เมาะ ป ญอม โอก มอป ติ แตะ ละ โม บ่าบี่โลน ป กัมลัง แวต เวียง เฮี เซ ปังเมอ โอ ซ ยุม. ตึก นึง โอ แตะ ไก ป โฮลฮ, ซ โฮลฮ ไอม เบือ อื. 10 อาึ เอีจ โปวต รพาวม แตะ ยุฮ ไลจ ไม่ เวียง เฮี, เญาะ ฮลัก โตว กอ. อาึ ซ มอป เวียง เฮี ละ กซัต เมือง บ่าบี่โลน. กซัต เซ ซ โตก อื เกือฮ ฮะ ล่อยญ,” อัฮ เซ พะจาว.

11-12  พะจาว ดวน อาึ ซึป ลปุง แตะ ละ เญือะ กซัต เมือง ยูด่า ป มัฮ จัตเจือ ด่าวิต เซ. เกือฮ อาึ อัฮ เฮี ละ อื, “ไมจ เปอะ ง่อต ป อัฮ อาึ ป มัฮ พะจาว เฮี ละ เปอะ. ไมจ เปอะ รเตีฮ โอเอีฮ ละ ปุย ตัม ซื อื โครยญ ซเง่ะ. ไมจ เปอะ เฆีญ โม ลัปซด่อน เกือฮ โปน ฮา โม ป บ่วก ป โจวง ละ อื. ดัฮ เปอะ โอ ยุฮ ตอก เซ, กัน ฆอก ยุฮ เปอะ เซ ซ เกือฮ รพาวม รอก อาึ โอก ฮะ ตอก งอ โฮ. งอ เซ เญือะ เกียฮ ญึ่ต โตว. 13 เออ, เยรูซาเลม. ปะ เอีจ อาวต เปอะ ฮลาวง ฮา โตะ โลก โครยญ โดฮ. ปะ เอีจ ตอก โรฮ เปอะ รอัง ป ฮลาวง ฮา เตะ ลโลวง โฮ. อาึ ปังเมอ ซ ตอซู ปุ แตะ ไม่ เปอะ. ปะ อัฮ เปอะ ปุย โอ ซ เกียฮ เป โกะ แตะ, ไม่ อัฮ เปอะ โอ ซ ไก ป ปุน ลู เลียก นึง ก อาวต ตอน ฮมัน ยุฮ แตะ. 14 อาึ ปังเมอ ซ เกือฮ ปะ ลอก ตุต แตะ ตัม กัน ยุฮ เปอะ. อาึ ซ เกือฮ เญือะ กซัต นึง เปอะ ฮะ ล่อยญ. งอ เซ ซ จาึฮ โอก ไม่ ซ ฮะ อื ยุฮ โอเอีฮ รวิต รเวียง อื โครยญ เจือ,” อัฮ เซ พะจาว.