1 ปัว เตะ ไม่ มะลอง ฮมอง ป อัฮ แตะ. มัฮ ลปุง เนอึม โอก เน่อึม ดักดอย เยอะ.

2 ปัว เกือฮ ลปุง เพอึก แตะ ราื ตอก ตอม เฮละ โฮ. เกือฮ กัม อู กัม รไต แตะ ราื ตอก รน่ะ โฮ. มัฮ ตอก เฮละ บรุฮๆ ราว ไรป ซงา จัว โฮ. ตอก โรฮ เฮละ แปน คัก อื ละ พักเญือ โฮ.

3 อาึ ซ รโฮงะ มอยฮ ระ ไล ยุฮ พะจาว. ไมจ ทไว โญตซัก ละ พะจาว ยุฮ เอะ.

4 พะจาว มัฮ ตอก ซโมะ เปิง รอัง เดีย ละ ปุย, กัน ไมจ กัน ญุ่ก ยุฮ พะจาว เอีจ กุมปอ โครยญ เจือ. คระ โครง ยุฮ พะจาว มัฮ คระ ซืไซ, พะจาว มัฮ ป ซืไซ, มัฮ ป ญุ่ก เญาะ เติ, ตึน ไก รพาวม เนอึม เน่อึม เมือ โรง อื.

5 ปุย โม เซ ยุฮ กัน ฆอก ละ แลน พะจาว อื. เญาะ โปง โตว อื แปน กวน พะจาว ฆาื พิต โฌวะ ยุฮ แตะ. เอีจ มัฮ ตื จัตเจือ ปุย บ่วก โครยญ โฆะ ปุย.

6 เออ, โม ป ลโมวะ ป งาว ป ไงญ, อัม คาว ละ ลเตือฮ เปอะ ยุฮ กัน ฆอก ละ พะจาว ตอก เซ? พะจาว มัฮ เปือะ เปอะ ป ซัง เปอะ เกิต, โม่ มัฮ อื? มัฮ ป แลน แก โซะโกะ ฮรักซา นึง เปอะ.

7 ไมจ เปอะ เกือฮ ติ แตะ ไตม เจน ไพรม โฆะ. ไมจ เปอะ โตก ละ เคิ เนอึม ป เอีจ ฟวยจ โฮวน เจน ปุย. ไมจ เปอะ ไฮมญ นึง มะเปือะ แตะ, ซ รตาึต เนอึม โม เปะ เกือฮ โฮลฮ ยุง อื. ไมจ โรฮ เปอะ ไฮมญ โม ป กวต ยุฮ เปอะ. ซ รโฮงะ เนอึม อื ละ โม เปะ เกือฮ เปอะ โฮลฮ ฮมอง อื.

8 พะจาว ตึก นึง ระ นัน นึง ฮลาวง แตะ, เกือฮ ปลัฮเตะ ละ ปุย โครยญ เมือง ปุย. พะจาว รฆุ เนอึม โอเอีฮ ละ ปุย โครยญ เจือ ปุย. รฆุ เนอึม ปลัฮเตะ ละ อื ตัม เมาะ ไก กวน อิซราเอน.

9 ป มัฮ รโตง พะจาว เซ เอีจ มัฮ โม ป มัฮ ปุย ไน อื. ยาโคป เอีจ มัฮ โรฮ คอง พะจาว ไอฮ.

10 พะจาว รโตฮ ยุ ยาโคป เซ นึง ลาึน เวือฮ. มัฮ นา ก ม่าวง เยือ อื ก ลอยฮ กาื กอ นึง. พะจาว เฆีญ ลอป อื ฮา ป ฆอก, โซะ โกะ ฮรักซา นึง อื ตอก ซลอง ไง่ แตะ โฮ.

11 ตอก โรฮ กลัง ลอง ป มอง เพอึก กวน แตะ เกือฮ โปว โฮ, ดี โพรยจ แตะ เวือฮ มอง รัป กวน แตะ เซ นึง อื, พะจาว ยุฮ โรฮ อื ละ โม อิซราเอน ตอก เซ โรฮ.

12 มัฮ พะจาว ติ โตน โน่ง ป โฆง นัม ปุย ไน แตะ. ไก โตว พะจาว ไฮญ ป อาวต ไม่ อื.

13 พะจาว เกือฮ อื โฮลฮ กุม ปลัฮเตะ ฮลาวง นึง บลาวง ฌื. เกือฮ อื โฮลฮ โซม ไมจ ไอจ ญึม. เกือฮ อื โฮลฮ ญุ รอาวม โกะ แฮ เน่อึม นึง ซโมะ ระ. เกือฮ โรฮ อื โฮลฮ ลออยฮ กาวก นึง ราวก ซโมะ.

14 เกือฮ อื โฮลฮ ญุ รอาวม ตาึฮ นึง คอง เลียง แตะ. เกือฮ แกะ ปิ ยุฮ อื โกลยญ โม่ว. เกือฮ อื โฮลฮ แกะ เจือ ไมจ ไกลจ พรุฮแพร. เกือฮ โรฮ อื โฮลฮ เฮงาะ ซาลี ป ตึก นึง ไมจ แตะ, ไม่ รอาวม อะงุน ญึม โอก เน่อึม รปึม ยุฮ อื.

15 ปุย ไน พะจาว เญือม เอีจ กอย อื ปังเมอ เลฮ เตียง พะจาว, ตอก โมวก ป เดีฮ กุม แตะ โฮ. เญือม เอีจ โกลยญ โม่ว อื ไม่ ไมจ อื ละ แลน ปุย อื, ลอต ละ โปวฮ พะจาว ป ซัง แตะ เกิต เซ ฆาื อื. พลิฮ โรฮ พะจาว ป ตอก ซโมะ เปิง รอัง เดีย ป เกือฮ แตะ โปน เม่ะมั่ก เซ.

16 โม เซ ยุฮ ป วัว รพาวม พะจาว นึง ไว แตะ พะ ไฮญ. เอีจ นัปทื ฮุป. กัน ตอก เซ มัฮ เนอึม ป เกละ พะจาว ยุ. มัฮ เซ ป รอก พาวม พะจาว นึง ฆาื อื.

17 โม เซ ซาวป ไว พี เตือง โอ อื มัฮ พะจาว เนอึม. ซาวป ไว พะ ป โอ แตะ ยุง ป มัฮ ป มอยฮ อื. ซาวป ไว พะ โอก โคระ. มัฮ ป โอ โม ตะ เยือะ อื นัปทื ติ ชวง.

18 โม เซ เครอึง โตว นึง พะจาว ป ซัง แตะ เกิต เซ. เอีจ มัฮ พะจาว เซ ป มัฮ ตอก ซโมะ เปิง รอัง เดีย อื. โม เซ เอีจ เบีย เนอึม พะจาว ป เกือฮ แตะ เกิต ไก เซ.

19 เญือม ยุ อื โอเอีฮ ตอก เซ พะจาว วุต ติ แตะ ฮา โม เซ ฆาื อื, นึง ยุฮ กวน รเมะ กวน รโปวน อื ควน ซ ฮาวก รพาวม อื.

20 ฟวยจ เซ พะจาว อัฮ เฮี, “อาึ เญาะ ซ แลน แก โตว ปุย โม เซ. ซ มอง แลน ตอก มัฮ ลั่ก ก ลอยจ จีวิต อื, นึง มัฮ เนอึม อื จัตเจือ โม ป กอ เลฮ. มัฮ เนอึม โม ป โอ เนอึม รพาวม.”

21 “โม เซ ยุฮ ป วัว รพาวม อาึ นึง ไว อื ป โอ มัฮ พะจาว เนอึม. ยุฮ ป เป รพาวม เมอะ นึง ซาวป อื ไว ฮุป ยุฮ โกะ แตะ. อาึ ซ เกือฮ โรฮ โกะ อื ลเลียก นึง ปุย เมือง ไฮญ ฆาื อื. ซ เกือฮ เมือง ป อัฮ ปุย งาว ละ ยุฮ ป วัว รพาวม อื โรฮ.”

22 รพาวม ฮาวก อาึ เซ ซ ตอก เอิน รเออึป งอ ระ. งอ เซ ซ ฮะ ยุฮ โอเอีฮ ฮอยจ ละ เมือง ป ยุม ก โด่ะ อื. ซ ฮะ ยุฮ ปลัฮเตะ ไม่ โอเอีฮ ป ซมา ปุย นึง อื เตือง โอยจ อื. ซ ฮะ โรฮ ยุฮ บลาวง ฌื ฮอยจ ละ เตะ กไน อื.

23 อาึ ซ เกือฮ ปไฮะ ปฮอน เกิต ละ ปุย โม เซ, ไม่ ซ พลวย เยอะ ตี อัก เออึม ยุฮ แตะ เกือฮ ฮอยจ บวก อื.

24 ปุย โม เซ ซ รเกือะ นึง ไปลญ เออึป แตะ. พาญัต ฆอก ซ ฮอยจ ยุฮ ไลจ ไม่ อื ตอก ฮะ งอ ยุฮ โอเอีฮ โฮ. อาึ ซ ตาว โกะพริ ซวก เกือฮ ฮอยจ เกียต อื. ซ เกือฮ โรฮ ซโอยญ ซไอป ฮอยจ ยุฮ ป โซะ ละ อื.

25 นึง ตัม คระ ซ ไก ป ฮอยจ ยุฮ ยุม ไม่ นึง วิจ. นึง โตะ กไน ฮอง ซ ฮลัต เตีจ นึง ป ซ เกิต ละ แตะ. ซ ฮอยจ ยุฮ ปุย ไลจ ไม่ เตือง ปเครีฮ กวน เบลีย, เตือง กวนดุ ปุ ลั่ง ตาึฮ ไม่ ป เอีจ กวต ปอ ครา ไกญ แตะ.

26 อาึ เอีจ ซเปี ยุฮ ไลจ ไม่ อื, ตะ เกือฮ อาวต เฮีย อาวต ไฮ เลี่ป เตะ. ตะ เกือฮ มอยฮ อื ไฆร ลอป เอิน, ปอ โอ ปุย เญาะ เกียฮ ไตม เฟือฮ เอิน.

27 “อาึ ปังเมอ ฮลัต โม ป เกละยุ แตะ ลเตือฮ แม เพียก แฮม แตะ. ฮอ โรฮ นึง ซ โคะ ง่อต อื ตอก โอ อื ปุก. ฮลัต โรฮ โม ป เกละยุ แตะ ซ อัฮ ตอก เฮี, ‘กัน เป เอะ โม อิซราเอน เซ มัฮ โตว ป เกว ไม่ พะจาว เฟือฮ, มัฮ เบือ อัมนัต ไม่ เรียง แด่น เอะ ไอฮ ป เป เยอะ เบือ อื,’ ฮลัต อัฮ เซ. 28 โม อิซราเอน เซ มัฮ โม ป โอ ญอม ง่อต ป อัฮ อาึ ละ แตะ. มัฮ เนอึม โม ป โอ เกือฮ ติ แตะ คาวไจ โอเอีฮ เฟือฮ เอิน. 29 มัฮ มัฮ อื ปุย เฮียง ยุง, ตึน ซ คาวไจ อื ไลลวง ป เกิต ละ แตะ เฮี, ไม่ ซ ยุง โรฮ อื ตอก ซ มัฮ ซ แปน ลั่ก ก ลอยจ อื,” อัฮ เซ.

30 ปุย ติ ปุย ซ ปุน โครฮ ปุย ติ เปือน ปุย ตอก เมอ? ปุย ลอา ปุย อัม ซ ปุน เกือฮ ปุย ติ ฮมาึน ปุย ตอ ฮา แตะ? เกียฮ แปน โตว โนก ฮา ซ โปง พะจาว ป มัฮ ซโมะ เปิง รอัง เดีย อื ละ อื.

31 ตัว เปิง โม เซ ตอก โตว ตัว เปิง โม เอะ. โม ป ฆวต รุป ไม่ เอะ เซ เอีจ ยุง โรฮ อื มัฮ อื ตอก เซ เยอ.

32 โคะ อะงุน ยุฮ อื เกิต เปลิ ฆอก ตอก เมือง โซโด่ม โฮ. แปน ปไฮะ ปฮอน ละ อื ตอก กัน ยุฮ ปุย เมือง โกโมรา. เปลิ อะงุน ยุฮ อื แปน ป ซอง ตอก ไคญ โฮ. แปน โรฮ ป ปิต ป เบื่อ ตอก เยื่อ ออป โฮ.

33 รอาวม อะงุน ยุฮ อื แปน ป ปิต ตอก ปิต ซโอยญ โฮ. ปิต เนอึม ปิต แนม ตอก ปิต ซโอยญ มวย โฮ.

34 พะจาว อัฮ เฮี, “โอเอีฮ ป ซ เกิต ละ ปุย โม เซ มัฮ ป ไก ไม่ อาึ. เอีจ มัฮ ละ อาึง ละ อื ฮอยจ ละ เติง เวลา อื.

35 “มัฮ อาึ ป รเตีฮ เกือฮ ลอก ตุต แตะ. มัฮ อาึ ป ซ โรก เวน ละ อื. มอง แลน เญือม โคะ ซดุฮ อื ไม่ ลอต อื ฆลาื. ซเงะ ซ ไลจ โลม อื เซ เอีจ ซดิ, กัน ซ ลอก อื ตุต แตะ เซ ซ ฮอยจ พราวป เอิน,” อัฮ เซ.

36  พะจาว ซ รเตีฮ โอเอีฮ ละ ป มัฮ ปุย ไน แตะ, ไม่ ซ เลียก พาวม อื นึง โม ป มัฮ กวนไจ ยุฮ แตะ, เญือม ยุ อื เอีจ โอยจ เรียง แด่น อื, ไม่ ยุ อื โอ อื เญาะ ไก ป เรอึม, เตือง โม ป มัฮ ครา ไม่ ป โอ มัฮ ครา นึง อื.

37 เญือม เซ พะจาว ซ อัฮ เฮี, “พะจาว ยุฮ โม เปะ อาวต ก เมอ? ป มัฮ ตัว เปิง เปอะ เซ อาวต ก เมอ ก โอวน?

38 “เอีจ มัฮ โม พะ ป ปอน ลออยฮ ซัตซิง ป ตอง เปอะ ทไว เซ, ไม่ ญุ อื รอาวม อะงุน ป เอีจ ทไว เปอะ เซ โรฮ. เกือฮ พะ โม เซ โกฮ เรอึม เปอะ ปเลี่ย เฮี เอิน. เกือฮ โรฮ พะ โม เซ โซะโกะ ฮรักซา นึง เปอะ เมิฮ.

39 “ง่อต แลน เมอะ, เอีจ มัฮ อาึ เฮี ป มัฮ พะจาว เนอึม เมอ. โนก ฮา อาึ เฮี ไก โตว พะจาว ไฮญ เญอ. อาึ มัฮ ป เกียฮ เกือฮ ปุย ยุม, มัฮ โรฮ ป เกียฮ เกือฮ ปุย ไอม. อาึ มัฮ ป เกียฮ เกือฮ ปุย เบราะ เบิ, มัฮ โรฮ ป เกียฮ เกือฮ ปุย ไฮ. ไก โตว ติ เนอึม ป เกียฮ เรอึม เปอะ เกือฮ โปน ฮา เตะ อาึ อื.

40-41 “อาึ ยวก เตะ แตะ ลั่ก มะลอง, ละ ซ ซันญา แตะ อาึง ละ ปุย ตอก เฮี, แจง ไอม อาึ ตอก ออฮ, อาึ แจง ซ โรก เวน ละ โม ป เกละยุ แตะ, ไม่ ซ เกือฮ เยอะ ลอก ตุต แตะ ตอก เซ โรฮ. อาึ ซ เกลียง อาึง วิจ แตะ เกือฮ ตอฮ เฌียป เลียป เอิน, ไม่ ซ ไปญ เญอะ อาึง ละ ซ รเตีฮ แตะ ปุย.

42 “อาึ ซ เกือฮ ตี ทนู ยุฮ แตะ ฮาวม ฮนัม. ซ เกือฮ โรฮ วิจ แตะ โซม เนะ ฮนัม โม ป ตอซู ไม่ เยอะ, ไม่ โม ป ญอม ไป นึง เงอะ, เกือฮ โรฮ ฮนัม อื ปัต เตือง โม ป มัฮ ฮัวนา ยุฮ ป ฮอยจ รุป ไม่ เยอะ เซ,” อัฮ เซ.

43 “โม เปะ ปุย โครยญ บั่น โครยญ เมือง, ไมจ เปอะ ลืลาว ปุย ไน พะจาว, นึง ซ โรก พะจาว เวน รโตง โม กวนไจ ยุฮ แตะ เซ. พะจาว ซ เกือฮ เนอึม โม ป เกละยุ แตะ เซ ลอก ตุต แตะ, ไม่ ซ เกือฮ อื บั่นเมือง ยุฮ ปุย ไน แตะ แปน ป ซง่ะ ซงอม,” อัฮ เซ รซอม เชีย ยุฮ ไอ โมเซ เยอ.

44 ไอ โมเซ ฮอยจ ทอง โบ่ต รซอม เชีย ยุฮ แตะ เซ ละ โม อิซราเอน เตือง โอยจ อื, เกือฮ อื ฮมอง ตื อื. โยชูวา กวน นูน ฮอยจ โรฮ ไม่ อื. 45-46 เญือม เอีจ โจป ทอง ไอ โมเซ รซอม เซ ละ โม อิซราเอน เนอ, ไอ โมเซ อัฮ แม เฮี ละ อื, “ไมจ เปอะ เกือฮ ติ แตะ ไตม รซอม เชีย ป ทอง อาึ ละ เปอะ ไน ซเงะ เนาะ เฮี เตือง โอยจ อื, เดอึม เปอะ ซ เกียฮ ซตอก ละ โม กวน เฌือต เปอะ, ละ ซ เกียฮ ยุฮ อื ตัม ลปุง ไก นึง โกตไม ยุฮ พะจาว เซ โครยญ เจือ. 47 ไลลวง เฮี มัฮ โตว ป แตวะ ไล ละ เปอะ, เอีจ มัฮ เอิน ไลลวง จีวิต โม เปะ. ไลลวง เฮี มัฮ ป เกือฮ โม เปะ โฮลฮ จีวิต ลั่ง เลี่ญ แตะ นึง บั่นเมือง ป ซ เตือง เปอะ โกลง จอแด่น ละ ซ โฮลฮ เปอะ เลียก กุม เซ,” อัฮ เซ.

48 ฟวยจ เซ พะจาว อัฮ อื ละ ไอ โมเซ ไน ซเงะ เซ เอิน ตอก เฮี, 49 “ไมจ เปอะ ฮาวก ฮอยจ นึง บลาวง อาบ่าริม ฮอยจ นึง เปือง โม เนโบ่, ป ไก นึง เมือง โมอัป รเตือป เวียง เยรีโค เซ. เญือม เซ ไมจ เปอะ แก แลน ปลัฮเตะ คะนาอัน ป ซ เกือฮ อาึ ละ โม อิซราเอน ละ ซ เกือฮ แปน คอง อื เซ. 50 ปะ ซ ลอยจ จีวิต เปอะ นึง บลาวง เซ. ซ โฮลฮ เปอะ โฮว รโจะ ไม่ โม จัตเจือ ไพรม แตะ, ตอก โรฮ อาโรน เอียกระ เปอะ ป ยุม นึง บลาวง โฮ เซ, ไม่ โฮว รโจะ อื ไม่ โม จัตเจือ ไพรม แตะ เซ โรฮ. 51 มัฮ ฆาื โอ เปะ ลอา เนอึง ป อัฮ อาึ ซองนา โม อิซราเอน, นา ก ปลาึฮ รอาวม นึง เมริบ่า โบ ย่วง คาเด่ต โฮ, เญือม อาวต เปอะ นึง ลาึน ซิน เซ. ญอม เปอะ โตว เกือฮ อาึ ซัมคัน ละ แตะ ซองนา โม อิซราเอน เซ. 52 ซ โฮลฮ เปอะ ชวน เมือง คะนาอัน ป ซ เกือฮ อาึ ละ โม อิซราเอน เซ เน่อึม ก ซไง อื, ปังเมอ โอ เปอะ ซ โฮลฮ เลียก อาวต นึง,” อัฮ เซ พะจาว.