1 “Ipeviza nu puun te zuma he menge etew is suled nu he si Aaron wey sikan is menge anak din he ensi Nadab, Abihu, Eleazar, wey Itamar, su edhimuwen ku sikandan he menge memumuhat he ebpenilbi kedì. 2 Peveeli nu is suled nu he si Aaron te menge visti he segradu he ebpekeveǥey kandin te zengeg. 3 Keǥiyi nu sikan is menge maama he mibeǥayan ku te ketau te kebpemaal te visti he veeli zan si Aaron te menge visti, su wey niw sikandin ikepeveyveyai kedì su edhimuwen ku sikandin he memumuhat he edsilbi kedì. 4 Ne iyan heini menge visti he ebeelan para kandin: is teleǥuey ziyà te kumeng, ipud, pendivavew he visti, pendizalem he visti he binurdahan, tengkulu, wey vagkes. Kinahanglan he ebaal zan te menge visti he para ki Aaron wey para te menge anak din he maama, su para mekepenilbi sikandan kedì pinaaǥi te kebpemuhat. 5 Is egkeǥamit iyan is: linu he eburdahan te vulawan he tanur, wey welin he meitem is kaavuavu zin, merudtem wey kanggan.

6 “Is ipud, kinahanglan he iyan ebeelan is linu he utew meupiya, wey tanur he vulawan wey welin he tanur he meitem is kavuavu zin, merudtem wey kanggan. Kinahanglan he meupiya is kegkeburdahi kayi. 7 Heini he visti, dezuwa he vahin; is diyà te peka wey is diyà te sineruwan, ne ebpekedsumpul heini ziyà te idtedted diyà te pemenayen. 8 Is bakes kayi, linu zaan he miburdahan te vulawan he tanur wey welin he meitem is kaavuavu zin, merudtem, wey kanggan.

9 “Ne kuwa kew te zezuwa he vatu he uniks ne id-ukir niw zutun is sepulù wey dezuwa he menge ngazan te menge anak ni Jacob, 10 ne ibpedsusunud pinaaǥi te penuiǥen dan, heenem he ngazan is diyà te kada vatu. 11 Is ked-ukira te menge ngazan duen te sepulù wey dezuwa he menge ngazan te menge anak ni Israel duen te dezuwa he vatu kinahanglan he utew ebpurpurungi ne ibpezivavew ziyà te selevukà he vulawan haazà is menge vatu. 12 Ne ibpikit heini zuen te menge tedted diyà te pemenayen duen te ipud. Iyan teǥialung kayi is sepulù wey zezuwa he tribu te Israel. Pinaaǥi kayi edtiangen ni Aaron is menge ngazan dan diyà te etuvangan ku, ne siak is Nengazen, layun ku sikandan egketenuzi is menge etew ku. 13 Is menge selevukà he vulawan 14 pesevuki nu te zezuwa he rantey he lunsey he vulawan su wey ikepikit heini zuen te pemenayen duen te visti.

15 “Pevaal kew te teleǥuey ziyà te kumeng he egemiten te kebpesavut te egkesuatan te Nengazen. Kinahanglan daan he utew metau is ebaal zuen, he utew meupiya is kegkeveeli kayi, ne is tila kayi ne kinahanglan he iring te tila he egemiten te kebaal te ipud: linu he miburdahan te vulawan he tanur wey welin he meitem is kaavuavu zin, merudtem wey kanggan. 16 Heini is teleǥuey ziyà te kumeng edubliyen is kedlumpìa zuen ne kuwedradu heini; siyam he vaney is keleyatan din wey keluaǥan din. 17 Ne ibpikit dutun is heepat he linya te menge mahal he vatu. Is nehuna he linya, rubi, tupas, wey biril; 18 is ikezuwa he linya, imirald, sapiru, wey diyemanti; 19 is iketelu he linya, hasintu, agata wey amatista; 20 ne ikeepat he linya, krisulitu, uniks, wey haspir. Ibpemezivavew heini ziyà te selevukà he vulawan he para te ebpezivevawan duen. 21 Is kada sevaha zuen te sepulù wey dezuwa he menge vatu, ne id-ukir zutun is sevaha zaan he ngazan te sevaha he anak ni Jacob, su iyan haazà edriprisintar te sepulù wey dezuwa he ebpuunan te menge kevuwazan ni Israel. Is ked-ukira zutun ne iring te ked-ukir te para ibmarka.

22 “Baal kew zaan te rantey he lunsey he vulawan he para zuen te teleǥuey ziyà te kumeng. 23 Ne vaal kew zaan te zezuwa he mibpen-iring te sising he vulawan, ne ipikit niw haazà diyà te egkezapit te zivavew he menge suyuk duen te teleǥuey ziyà te kumeng. 24 Ne ihiket niw zutun te zezuwa he rantey he vulawan duen te iring te sising. 25 Ne is divaluy he purù dan, ne zuen niw ihiket te zezuwa he selevukà he zuen idsanggat te menge tedted diyà te pemenayen duen te ipud. 26 Ne uman kew vaal te zezuwa he mibpen-iring te sising he vulawan ne ziyè niw ipikit te egkezapit diyà te zizalem he dezuwa he suyuk duen te teleǥuey ziyà te kumeng he sikan is egkezapit duen he mid-epizan kayi he ipud. 27 Ne uman kew pa vaal te zezuwa he ebpen-iringen te sising he vulawan ne ipikit niw haazà diyà te kilid duen te ipud wey zivavew te imbakes duen. 28 Ne sikan is dezuwa he iring te menge sising he zuen ipikit te egkezizalem he menge suyuk duen te teleǥuey ziyà te kumeng, teuzi niw te hiket he meitem is kaavuavu zin ne ihiket niw zuen te zezuwa he iring te menge sising he zuen ipikit te pesikilizà he zapit te egkesineruwan duen te ipud su para meviǥer is kebpekesavuk din diyà te egkezivavew te vakes.

29 “Dutun te kedseled ni Aaron duen te Segradu he Lugar, ne idtaud din haazà is teleǥuey ziyà te kumeng he mideyzeyanan te mahal he menge vatu he in-ukir zuen is menge ngazan te menge tribu te Israel su para siak is Nengazen, ne layun ku sikandan egketenuzi is menge etew ku. 30 Ne idtaǥù daan dutun te teleǥuey ziyà te kumeng is dezuwa he vatu he veveraan he egngezanan te Urim wey Thumim, su para egkeuwit ni Aaron emun ebpekid-etuvang sikandin kedì te Waǥas he Nengazen. Dutun he menge timpu te ked-etuvang din kedì, kinahanglan he layun din idtaud sikan is teleǥuey ziyà te kumeng, su wey zin metueni is egkesuatan ku para te menge kevuwazan ni Israel.

31 “Is pendivavew he visti he iyan egkeepizan duen te ipud he manggad he meitem is kaavuavu zin. 32 Is budsi zutun he iyan sikan is egkeehukan te lieg, kinahanglan he edteuzan te epuru is peliǥuy su wey kenà mevindas. 33-34 Is peliǥuy he sidsid dutun te visti kinahanglan he ibpeliǥuy te eburda zutun is ed-iringen te menge veǥas te kayu he pumigranata, he welin he meitem is kaavuavu zin, merudtem wey kanggan he ebpemelvel-etan te menge seriyew he vulawan. 35 Ibivisti ni Aaron haazà is pendivavew he visti zutun te kedseled din duen te Segradu he Lugar su ebpenilbi ziyà te etuvangan ku, su wey mezineg is daǥing te menge seriyew emun edseled etawa egawas si Aaron dutun te Segradu he Lugar. Emun ebeelan din heini ne kenà sikandin ebpatey.

36 “Baal kew te midalya he lunsey he vulawan he ed-iringen te pelatu ne iukir niw zutun is menge lalag he: ‘Pehinungud te Nengazen.’ 37-38 Ihiket niw heini ziyà te etuvangan duen te tengkulu ni Aaron pinaaǥi te hiket he meitem is kaavuavu zin, su wey maahà heini ziyà te vuked din. Ne ebpaahà heini he ed-uwiten ni Aaron is minsan hengkey he salà he nehimu te menge Israilihanen dutun te kebpemuhata zan te Nengazen. Kinahanglan he layun heini idtaud ni Aaron diyà te vuked din su wey zin mepenunuat is Nengazen.

39 “Linu is hevela niw he pendizalem he visti ni Aaron ne linu zaan is beeli niw he tengkulu zin, wey vakes din he kinahanglan he egkepurungan heini te eburda. 40 Beeli niw zaan te menge visti, menge vakes, wey menge tengkulu sikan is menge anak ni Aaron he menge maama, su ebpekeveǥey kandan te zengeg.

41 “Bistiyi nu kayi is suled nu he si Aaron wey sikan is menge anak din he maama. Ne ebpetiǥisan sikandan te lana tuus te kegkehimuwa kandan he memumuhat. Ne ipehinungud nu sikandan kediey su wey sikandan mekepenilbi kedì pinaaǥi te kebpemuhat.

42 “Peveeli niw zaan sikandan te pendizalem he visti he ebpeketambun te pid-etawan dan. Is keluǥayad kayi, ne puun te hawak taman te vuel, su wey zan kenà mevikangi. 43 Emun edseled si Aaron wey sikan is menge anak din duen te Tulda he Edtelevukaayan, etawa ed-uvey zan duen te pemuhatà diyà te Segradu he Lugar su ebpemuhat sikandan, kinahanglan he egemiten dan heini su edhimetayan ku sikandan emun ibpeǥawaǥawa zan is pid-etawan dan. Heini he sulunuzen pehendiyè en te egkelapislapis he kevuwazan ni Aaron is kedtumana zan kayi.