1 Piru egkeuma is timpu he egkaawè en is merusirem dutun he tanà te zutun is kemereǥenan. Dutun te nehuna he timpu mibpeel-elezan te Nengazen is menge etew ziyà te Zebulun wey Naftali, piru ziyà te huziyan he timpu, ebeǥayan din sikandan te zengeg is menge etew he ed-ubpà diyà te veyeey pehendiyà te zaǥat he ziyà layun te Wahig he Jordan. Heini he menge lugar sakup te Galilea he ed-ubpaan te kenà menge Judio. 2 Is menge etew keniyan he nerusireman, ebpekaahà te utew merayag. Is menge nerusireman he egkahandek he ebpatey, egketeyawan.

3  Nengazen, ebeǥayan nu sikandan te utew zekelà he kelipey. Egkelipey sikandan diyà te etuvangan nu iring te menge etew he egkelipey emun tiraǥun etawa iring te menge etew he igkelipey zan is bahin dan te menge azen he netavan dan diyà te kebpekidtebek dan. 4 Su ibpekeziyù nu sikandan diyà te midlupiglupig kandan. Iring sikandan te uyaǥen he ebedtien nu is id-eyuǥu zuen wey is tuked he idlagkut duen. Is ebeelan nu kandan iring te mibeelan nu zengan hein midaag nu is menge Midianhen.

5 Egkelipey zaan sikandan su egkeengked en is kebpetebtebekà. Ebinsulan is menge yunipurmi te menge sundaru he nengelupit te lengesa, ragkes en is menge butas dan. 6 Egkelipey pa zaan sikandan su id-anak is batà he maama ne edhedian key zin. Egngezanan sikandin te, “Egkein-inuwan he Sumesambag, Mekeǥeǥehem he Megbevayà, Wazà Pidtemanan he Emey, wey Pengulu he Ebpekeveǥey te Kelinew!” 7 Wazà pidtemanan is ked-uswag te kedumala zin, ne layun dà melinawen heini. Ebpengevilinen din is ginhedian ni David. Ibpemelig-en din heini ne edhedian din he zuen hustu he kukuman wey ketazeng he wazà pidtemanan. Edsigureduwen te Nengazen he Mekeǥeǥehem he metuman heini.

8 Migkaǥi is Nengazen he edsilutan din is menge Israilihanen, he menge kevuwazan ni Jacob. 9 Ne egketuenan heini te langun he menge etew ziyà te Israel, ragkes en is diyà te Samaria he kepital zin. Ne ǥuntaan ebpelavew zan pa wey ebpahambug he ke sikandan te, 10 “Nengerundus is menge valey zey he iyan inhiman duen is brik wey kayu he sikemur, piru edliwanan dey heini te melig-en wey mekempet he menge valey he iyan idhiman duen is batu he vinesbasan wey kayu he sidru.”

11 Umbe ibpesurung sikandan te Nengazen te menge tig-Asiria, he menge kuntada ni Hadì Rezin. 12 Edezeetan dan te menge Aramihanen he ziyà te edsilaan wey menge Filistihanen he ziyà te edsenlepan, he iring te zumezaas he menge langgam he andam he ed-emeluk. Piru kenè pa egkeengked is pauk te Nengazen. Andam pa ǥihapun sikandin te kedsilut kandan.

13 Piru is menge etew te Israel kenà gihapun edlikù diyà te Nengazen he Mekeǥeǥehem he midsilut kandan.

14 Umbe, edtik-ew edsilut is Nengazen diyà te tivuuk he Israel. Egkeiring sikandan te uyaǥen he edtempezan te ikug wey ebpungelan te ulu. 15 Is ulu iyan is ebpemendumala wey menge dungganen he menge etew, ne is ikug iyan is teruen he menge ebpeneuven. 16 Is menge mibpengulu te menge etew te Israel iyan neketazin kandan, ne heini he menge etew nengetazin. 17 Umbe kenà igkelipey te Nengazen is betan-en dan he menge maama, ne kenè din egkehizuwan is menge ilu kandan wey menge valu he vahi. Su lalung sikandan is langun ne kenà edsunud te Megbevayà; pudu mekeeled-eled is ebpengeǥiyen dan.

Piru is pauk te Nengazen kenè pa egkeengked. Andam gihapun sikandin he edsilut kandan. 18 Su is kelelalung dan iring te hapuy he nekevinsul te zuǥiyen he zezeisey he kayu. Edriyubriyub heini iring te hapuy he nekevinsul te menge kayu, ne mekepal he evel is midlipuwak pehendiyà te zivavew. 19 Tenged te pauk te Nengazen he Mekeǥeǥehem, egkevinsulan is tanè dan, ne egkehimu sikandan he tavun he ed-epuren te hapuy.

Kenè dan egkehizuwan minsan is iring dan he menge Israilihanen. 20 Minsan hengkey he keenen is egkeehè dan diyà te peliǥuy egkuwaan dan ne egkeenen dan piru kenè dan gihapun egkahantey. Ragkes en he egkeenen dan is menge anak dan. 21 Ebpetebekà is tribu he Manase wey Efraim, ne heini is dezuwa ne edsurung diyà te Juda. Piru kenè pa egkeengked is pauk te Nengazen. Andam pa ǥihapun sikandin he edsilut.