1 Migkaǥi is Nengazen diyà te ki Moises, “Iyan heini menge sulunuzen he ibpetuman nu te menge Israilihanen:

2 “Emun duen ebpemasa te uripen he Hebriyuhanen, kinahanglan he seled dà te heenem he tuig is kebpesilbiya zin dutun diyà te kandin. Ne zutun te ikepitu he tuig, kinahanglan he ed-engkezan din en te ed-uripen, ne kenè en ibpevayad te minsan hengkey. 3 Emun wazè din esawa zutun te timpu te kegkeuripena kandin ne zutun en sikandin mekepengesawa te uripen en sikandin, ne iyan dà sikandin ebpekeǥawas te kegkeuripen dutun te ikepitu he tuig. Iyan, emun duen din en esawa zutun te kegkeuripena kandin, ne ebpekeǥawas haazà is esawa zin duma kandin. 4 Ne emun impepengesawa sikandin te egalen din dutun te timpu he kemulu en sikandin uripen, ne is bahi wey is menge vatà, ne egketaǥak dan dutun te egalen dan, umbe iyan dà ebpekeǥawas te kegkeuripen haazà is maama.

5 “Iyan, emun egkaǥi haazà is maama te, ‘Kenà a egawas te kegkeuripena kedì su mahal ziyà te ǥehinawa ku is egalen ku, esawa ku wey is menge anak ku.’ 6 Emun iyan haazà, kinahanglan he ed-uwiten sikandin dutun te egalen din diyà te menge zatù. Ne ed-uwiten sikandin diyà te marku te ǥemawan ne ebusluwen is telinga zin. Ne egkehimu sikandin he uripen dutun te egalen din taman te kemetayen din.”

7 “Ne emun ibpeuripen te maama is anak din he vahi pinaaǥi te kebelegyaa zin dutun, ne kenà iring te paaǥi te kebpekeǥawas te maama he uripen is paaǥi te kandin he kebpekeǥawas te kegkeuripen su kenà mulà sikandin ebpekeǥawas dutun te ikepitu he tuig. 8 Ne emun kenà sikandin ebpekepenunuat dutun te egalen din he teǥiuripen kandin, kinahanglan he velukasi sikandin te pemilya zin. Iyan, wazè en ketenged dutun te egalen te kebelegyà dutun te vahi ziyà te menge lumelengyawà su iyan haazà is egalen midsupak te kuntrata. 9 Ne emun ibpeesawa te egalen is uripen din he vahi te anak din he maama, kinahanglan he kenè din en ed-isipen he uripen haazà is bahi, kekenà, isipa zin en he anak din. 10 Ne emun eduwayan sikandin dutun te esawa zin, kinahanglan he kenà egkahalin is ked-elimahi zin dutun te kakey he esawa zin pinaaǥi te keenen, pemisti, wey kedhuliza kandin. 11 Ne emun kenè din heini igkeveǥey zutun te kakey he esawa zin is tetelu he kelasi, ne ebpekeǥawas en haazà is bahi te kegkeuripena kandin ne kenè ne kinahanglan he ebayad sikandin te selapì.

12 “Sikan is ebpekepatey te zuma zin he etew, kinahanglan daan he edhimetayan. 13 Iyan, emun wazè din tivevaa is kegkepetaya zin dutun, kekenà, nevèbeelan is kegkehitevua zutun su tenged te imbanglis ku, ne egkehimu sikandin he ebpelaǥuy ziyà te lugar he idteǥana ku. 14 Iyan, emun duen edhimatey te zuma zin he etew pinaaǥi te akal, ne minsan diyè pa sikandin mebpelaǥuy te pemuhatà para kediey, iawè niw zutun ne himetayi niw ziyà te gawas.

15 “Is minsan hentei he ebuǥel etawa ebpalì te amey zin etawa iney zin, kinahanglan he edhimetayan.

16 “Is minsan hentei keniyu he egebpà te sengeeetew su ibelegyè din, ne minsan wazè din pa haazà ikevelegyà dutun te kegkezekepi kandin, kinahanglan he edhimetayen sikandin.

17 “Is minsan hentei keniyu he edrawak te amey zin etawa iney zin, kinahanglan he edhimetayan.

18 “Emun duen ebpetebekà, ne is sevaha egkepelian etawa egkeruuǥan pinaaǥi te vatu etawa pinaaǥi te sumbag, iyan, kenà sikandin ebpatey, kekenà, kenè dà sikandin ebpekehimu he edterebahu seled te egkepipira he andew. 19 Ne emun ebpekeenew en wey ebpekehipanew en minsan pa ke edtutuked dà, ne iyan dà silut duen te etew he nekevaal zuen is: ebpeveyazan kandin is menge timpu te kegkeetresadu zutun te sevaha, ne etimana zin taman te egkepurung haazà egkeulii.

20 “Emun duen ebpukpuk te uripen din he maama etawa vahi ne edsilutan sikandin emun ibpatey zutun te uripen haazà. 21 Iyan, emun kenà ibpatey zutun te uripen haazà is kebpukpuka kandin ne ebpekeenew heini, kenà edsilutan haazà is egalen su ǥaked din man haazà is uripen.

22 “Emun duen maama he ebpetebekà he tenged dutun duen meǥingey he egkesazir he tenged dutun egketeǥel is kebpekaanak din iyan, kenè ded utew ebpekezezaat kandin haazà, ne haazà is nekesazir kandin kinahanglan he ibpevayad sumalà is ibpevayad te teǥiesawa zuen te vahi he ebpezumdumahan te menge zatù. 23 Iyan, emun grabi is kegkesazir zin ne iyan heini kukuman he ikula niw: Is ebpekepatey edhimetayan daan. 24 Is ebpekezezaat te mata te zuma zin edezeetan daan is kandin he mata, is ebpekesepù te ngipen te zuma zin edsepuan daan, is ebpekezezaat te velad te zuma zin edezeetan daan is kandin he velad, is ebpekezezaat te paa te zuma zin edezeetan daan is kandin he paa. 25 Sikan is edtutung te zuma zin, ne edtutungen daan. Sikan is ebpalì te zuma zin, ne ebpelian daan. Ne sikan is ebuǥel te zuma zin, ebuǥelen daan.

26 “Emun duen ebpekezezaat te mata te uripen din he maama etawa vahi, ne iyan bayad dutun is: ebpekeǥawas haazà is uripen te kegkeuripena kandin. 27 Ne emun duen ebpekesepù te ngipen te uripen din, ne iyan ded bayad dutun is ebpekeǥawas haazà is uripen te kegkeuripena kandin.

28 “Emun duen baka he ebpekesungey te maama etawa vahi ne ebpatey haazà is egkesungey, kinahanglan he edhimetayan haazà is baka pinaaǥi te kebpenulenga zuen te vatu, ne kenà haazà egkeenen. Ne kenà edsilutan is teǥiǥaked dutun te vaka. 29 Iyan, emun daan he vetasan dutun te vaka is kebpemenungey ne nepetizeenan en is teǥiǥaked duen, iyan, mibpesagdan din dà, ne emun ebpekepatey haazà is baka te maama etawa vahi, kinahanglan he edhimetayan haazà is baka wey is teǥiǥaked duen. 30 Iyan, emun ebpevayad dà is menge kezumahan dutun te nepatey, ne kenè ne edhimetayan haazà is teǥiǥaked piru kinahanglan he ebeyazan din is ibpevayad kandin. 31 Iyan ded heini velaud emun batà he maama etawa vahi is ebpatey te kegkesungayi kandin te vaka. 32 Ne emun iyan ebpatey te kegkesungayi kandin te vaka is uripen he maama etawa vahi kinahanglan he ebayad is teǥiǥaked dutun te vaka ziyà te teǥiuripen dutun te 30 he vuuk he pelata, ne edhimetayan haazà is baka pinaaǥi te kebpenulenga zuen te vatu.

33 “Emun duen edluwisen din is tambun te vudsi etawa ebangbang sikandin, ne kenè din edtembunan ne egkeulug dutun is baka etawa asnu, 34 kinahanglan he ebeyazan duen te teǥiǥaked te vudsi haazà is ayam he neulug, ne kandin en haazà is minatey he uyaǥen.

35 “Ne emun duen etew he ebpekepatey is baka zin te vaka te zuma zin, ne ivelegyè dan haazà is uuyag ne liwezaa zan te ebahin is halin dutun. Liwezaa zan daan te ebahin haazà is minatey he uyaǥen. 36 Iyan, emun daan he vetasan dutun te vaka is kebpemenungey ne mibpesagdan duen te teǥiǥaked, kinahanglan he edliwanan din haazà ne kandin en sikan is minatey.