1 Dutun he timpu midtiǥum te menge Filistihanen is menge sundaru zan su ebpekidtebek dan te menge Israilihanen. Migkeǥiyan ni Akish si David te, “Sikew wey is menge sakup nu ne kinahanglan he meduma kenami te ebpekidtebek.” 2 Midtavak si David te, “Uya, para meehè nu ke hengkey is egkehimu ku, te suluǥuen nu.” Midtavak si Akish te, “Meupiya iyan! Su edhimuwen ku sikew he ebantey kedì taman te taman.”

3 Dutun he penahun daan en he minatey si Samuel. Hein kebpatey zin ne utew nenlalew is menge Israilihanen kandin, ne ziyè dan ileveng sikandin te inged din he Rama. Ne midsegseg ni Saul puun te Israel is menge veyilan he ebpekidlalag te gimukud te nemematey en.

4 Diyà megkampu is tig-Filistia te Shunem, ne ziyà daan megkampu si Saul wey menge Israilihanen te Gilboa. 5 Hein naahà ni Saul is menge sundaru te menge Filistihanen, utew sikandin nahandek. 6 Ne zutun mid-insaan din is Nengazen, ne wazà sikandin tevaka te Nengazen minsan te teǥeinep dà, wey pinaaǥi te Urim wey te menge ebpeneuven. 7 Migkeǥiyan ni Saul is menge sakup din te, “Pen-ahai a te vahi he edsarig te menge mulin-ulin he egkeinsaan ku.” Midtavak is menge sakup din te, “Duen diyà te Endor.”

8 Umbe, mibpeuvag-uvag si Saul pinaaǥi te kebivisti te kenà bisti te hadì, ne hein mezukilem en midhendutun sikandin te vahi, iyan duma zin is dezuwa he sakup din. Hein nekeuma zan, migkeǥiyan ni Saul haazà is bahi te, “Egkesuat a he ebpekidlalag ka te gimukud te sevaha he etew. Egkehimu vuwa he ed-umawen nu is gimukud din?” 9 Midtavak haazà is bahi kandin te, “Hengkey, egkesuatan nu ve he mepatey a? Netuenan nu man buwa is mibeelan ni Saul. Midsegseg din is langun he menge veyilan he ebpekidlalag te gimukud te nemematey en. Umbe kenè nu isavuk te piligru is untung ku.” 10 Nenaad si Saul kandin te, “Pinaaǥi te ngazan te uuyag he Nengazen, ne wazà mezaat he egkehitavù kenikew pinaaǥi kayi.” 11 Netegteǥaad migkaǥi haazà is bahi te, “Hentei ki gimukud is egkesuatan nu he ed-umawen ku?” Migkaǥi si Saul te, “Umawa nu si Samuel.”

12 Ne mid-umew zutun te vahi si Samuel, ne hein naahà dutun te vahi si Samuel ne nekekulahì sikandin te mezaǥing is egkaǥi ki Saul te, “Maan is midlimbungan a kenikew? Iyan ke ves si Saul!” 13 Migkeǥiyan ni Saul sikandin te, “Kenè ka mahandek. Hengkey ves is neehè nu?” Midtavak kes bahi te, “Neehè ku is sevaha he gimukud he migawas puun te tanà.” 14 Mid-insà si Saul te, “Memenumenu is paras din?” Midtavak sikandin te, “Sevaha he meǥurang he maama he midlelembung.” Ne zutun netuenan ni Saul he iyan haazà si Samuel, ne midluhud sikandin su midtahud kandin. 15 Migkeǥiyan ni Samuel si Saul te, “Maan is midsamuk a kenikew pinaaǥi te ked-umawa nu kedì?” Midtavak si Saul te, “Duen dekelà he prublima ku. Mibpekidtebek kedì is menge Filistihanen ne mid-iniyuǥan a te Megbevayà. Wazè e zin en tevaka, minsan pinaaǥi zà te menge ebpeneuven wey te menge teǥeinep. Umbe impeumew ku sikew su wey a kenikew mekeǥiyi ke hengkey is ebeelan ku.” 16 Migkaǥi si Samuel te, “Maan is ed-insè ke pa kedì? Kenè be mid-iniyuǥan ke en te Nengazen ne kuntada ke zin en? 17 Midtuman te Nengazen kes migkaǥi zin pinaaǥi kedì. Migkuwa zin is ginhedian te Israel ziyà te kenikew ne imbeǥey zin diyà te iring nu he Israilihanen he si David. 18 Mibeelan heini te Nengazen diyà te kenikew su wazè nu tumana is suǥù din he penhimetayi nu is menge Amalikanhen. 19 Umbe, keeselem ibpalad ke zin en wey is menge Israilihanen diyà te menge Filistihanen, ne egkehimu he ebpekeduma ki wey te menge anak nu he maama ziyà te lugar te menge minatey.” 20 Ne zutun nepiley si Saul ne nekelangkeb diyà te tanà. Utew sikandin nahandek te migkaǥi ni Samuel. Ne mibmeǥuyà sikandin su wazà sikandin mekekaan te tivuuk andew wey mezukilem.

21 Mid-uvayan dutun te vahi si Saul. Ne hein neehè din he utew nahandek si Saul, ke sikandin te, “Mahal he Hadì, midtuman ku is insuǥù nu kedì minsan te netuenan ku he piligru is untung ku. 22 Guntaan, edhengyuen ku sikew he pemineǥa a is suluǥuen nu. Ebeǥayan ku sikew te keenen su wey ka mebmezesen is edhipanew.” 23 Piru mibelivad si Saul. Ke sikandin te, “Kenà a egkaan.” Is menge sakup din ne ed-uǥup en dutun te vahi te edteǥel kandin wey mekekaan, ne zutun mibpemineg sikandin. Mid-enew sikandin ne mibpimpinuu zutun te hizeǥaan. 24 Ne midlapà dutun te vahi is impelambù din he turiti he vaka. Ne migkuwa te herina ne mibmasa zin ne midlutù sikandin te supas he wazè din tapey. 25 Ne hein nepasad impeǥana zin haazà ki Saul wey te menge sakup din, ne nemengaan dan. Ne human dan megenat te haazà he kezukileman.