Ipru
Yesu wel wiak kutömweri sëën wë krismaki 37 pöta ök won sëën omën nampök pep epwer Ipru omën ingre mor saö naröaan retëng ëa. Omën retëng ëa pöp, tiar köpël. Pi ingre morörö kööre toköröak pitëm kön wi kosang yewesaut irikor yaalmëën kasëng mampënëak yaëën epwer retëng ë mena. Pi Kristoë yaatere yapintak Mosesëët il yewas pöt pet elmëa.
Pöt epël wia.
Kristook Anutuu songönte tekeri wes pet ira 1:1-3
Kristook enselörö il yewas 1:4–2:18
Kristook Mosesre Yosua il yewas 3:1–4:13
Kristoë kiri yaaö yaatak Mosesëët il yewas 4:14–7:28
Kristoë sulöp ngolöptak Mosesëët il yewas 8:1–9:28
Kristoë kiri ëautak Mosesëët il yewas 10:1-39
Kön wi kosang yewesauta ngönte 11:1–12:29
Wa korkor ngön mëët 13:1-25
1
Anutuuk pim Ruupön maan pim ngönte ök niia
1 Ngaanëër Anutu pi tektek ngön yaauröen ök maan tiarim ëaröen ngön ke nentere nent, kan ke naöre naö ök maö ima. 2 Pël ëautak peene yangerakë omnant won wasëpna akunet temanöm yesën akun eptak pim Ruupön maan pim ngönte ök niia. Ruup Pepapök maan omnant pout ket ëaup omnantë pep sëpënëak mëëa. 3 Anutuu ë rangiere ëwaat pim naë wiaan tekeri yewas. Pi Anutuu ök panëëp pim weëre kosang ngöntak omnant pout kaamök elniaan taë sak wia. Puuk wel wiak tiar kölam niwasëpënëak tiarim saunat won wes olëak, kaalak kutömweri wal ëak së Anutuu yaapkëël wel aisëak weëre kosangring wë.
Anutuu Ruupök enselörö il yemowas
4 Pi Anutuuk yapin kaöet mangkën enselöröaat il yewas. Tapël pi kutömweri isak Anutuu yaapkëël wë weëre kosang wak enselörö ngep elmëak wë. 5 Ne tol ëën pël yeniak? Ngaan Anutuuk ngönëntak epël mëëa pöt enselöröen ök nemaan ëa.
“Ni nem Ruup.
Peene ne wil nuulëak nim Pep sak wë.”
Ën epteta enselöröen nemaan ëa.
“Ne pim Pep sak wëën
pi nem Ru sak öpnaat.”
6 Nent pöt, Anutuuk pim Ru wetëëp yangerak wes mëën waisëpënëak ëa pötak epël ök mëëa.
“Ne Anutu nem ensel pourö piin yaya map.”
7 Nent pöt, pim enselöröen, “Pit Ruupë iri wë,” weseë pitëmëën epël ëa.
“Ne Anutu nem enselöröen maan kentöökë ök yesaurö.
Ën nem inëënöröen maan es wilëngöökë ök yesaurö.”
8 Ën nent pöt, Ruupëën Anutuuk epël ök mëëa.
“O Anutu, ni omp aköp akun wali om ngarangk eim ömëëp.
Nim omën wa ngaöök yamëën pörö wotpil wesak ngarangk yaaup.
9 Ni wotpil yaautön kent yaaup, utpet yaautön kaaö yaaup.
Pötaanök Anutu ne, nim Anutuuk ni ërëpsawi ëëmëak yaö niaan ërëpsawi kaö yaëën nimotök karuröaat il yewas.”
10 Nent epël mëëa.
“Aköp ni omnant won wiaan yanger ket ëan.
Nim moresring kutömwer ket ëan.
11 Kutömre yang pipot kö yesën ni pöt wakaim om ömëëp.
Poë koröpö sëpar yes pöl pipot ëëpnaat.
12 Nuuk pit poë koröpö rang rë yawi pöl ëëmëët.
Pël ëak ulpëënëp përëak ngakëp yamë pöl elmëëmëët.
Ën ni pöp om wakaim omëëp.
Ni ulöp sak wiap nasëngan.”
13 Nent epël wia pöt, Anutuuk pim enselöröen nemaan, Ruupön mëëa.
“Ni wais nem yaapkëëtakël wel aisëak weëre kosangring wëën
omën nimëën kööre tok yaaurö nook maan nim weëre kosangöökë karök ilapnaat.”
14 Ën enselöröen tolël mëëa? Pit omën könöröa ök ëën Anutuuk pim inëën ya mëmpënëak wes yamëaurö. Pël ëën wais omën Anutuuk utpetetakaan kama niöpnaarö kaamök yaalni.