1 Dɩ ‑nɩa 'mʋa‑ ‑mɩ 'wlʋa 'o ‑jei" 'sʋ ɛ, 'ɩn 'jeeɛ ‑gbɛin" ‑je "jriɛ‑ ‑ɛ ‑kain wɔn 'bo jaʋn‑kwlʋ. 'Sʋ wlu 'ɩn 'wɔan tɛin" ‑wɛe ka ‑kaʋn 'a wlu nɩa ‑ɛ ‑nɩa kan' a, ɛ wluɛ 'ʋn ‑pee ke'wlɛ, ɛ 'na : ‑Ɩn ‑ja ‑ta, ‑wɛe dɩ ‑ɩ ‑jea nʋʋɛ 'bo ‑mɛ 'de, 'ɩn 'jɩ ‑ʋn tɔɔ‑.

2 'Bo ɛ "sri Kea 'a ‑Suu "ji 'de 'ʋn ‑wɛe 'ɩn 'jee‑ 'beɔkpa‑tɛ due' "jriɛ‑ 'de jaʋn 'di. 'Bo ɛɛ' 'beɔkpa‑tɛ ‑tu "kpei, nyɔ jrɔ' ‑te 'o. 3 Ɔɔ' "jua‑ a fan' ka "sei‑kɩɩ ‑ɩ ‑nmɔa "jrii a fan, 'kamɔ ɛ nɩ‑. Ɩa' "sei tu 'a 'nynɩ ‑nɩ Sasipʋ ke Sadoanɩ ke‑. "Ni 'a bli' ɛɛ 'dba a, ɛmɛ ‑pin' ɔɔ' 'beɔkpa‑tɛ 'dei ‑wɛe ‑ɛɛ fan ka "sou‑kea' nyʋ a 'daa‑ Emerodɩ nɩa.

4 'Ɩn 'jeeɛ 'beɔkpae 'a kwla 'sɔɔn 'jɔ ‑nyiiɛ "jriɛ‑ ‑ke ‑wɛe ‑ɩ ‑gbae' ɛɛ' 'beɔkpa‑tɛ ‑tu 'dei. 'Bo ɩ "kpei ɛ, nyʋ‑cɔɩn' 'a kwla 'sɔɔn 'jɔ ‑nyiiɛ ‑te 'o. Ʋʋ ‑wee' paa dɩ plu 'ʋn ‑wɛe ʋʋ ‑tu" 'sani tʋ"bofan nʋa "jru. 5 ‑Ta 'beɔkpa‑tɛ ‑nɛ nɩa 'bo a crɛ "jrii ‑blɛ ‑blɛ ka "ni a crɛa "jrii ɛ, ‑wɛe wlu ‑tuu"‑tuu ke "ni 'a "planwlu a 'wlʋ 'o ‑ke. 'Bo ɛɛ' 'beɔkpa‑tɛ ‑tu "juɔi ɛ, 'ɩn 'jeeɛ ‑tai ‑mɛ" 'sɔn "jriɛ‑ ‑wɛe ‑ɩa wan, ɩmɩ ‑nɩ Kea 'a ‑sii ‑mɛ" 'sɔn. 6 'De ‑tai ‑mɛ" 'sɔn ‑nɩ "juɔi ɛ, "nifla' klaa" ‑nɩ 'o ‑ɛ ‑te "jri tein kpee.

'Ɩn 'jeeɛ 'kmʋnɩdɩ ‑nyiiɛ' "jriɛ‑ 'de 'beɔkpa‑tɛ ‑nɛ ‑pʋn" ‑ɩ ‑gbae' ɛ 'dei. Ɩ ‑wee' nɩɛ "jri kui' 'de nya o 'de de o. 7 Ɩa' ‑jɛ ‑saa "i ɛ, ka ‑plaa nɩa, 'kamɔ ‑mɛ nɩ‑. Ɩa' 'sɔɔn ‑nɛ ke bli' beɔ ‑tɔo ‑kooɔ'. Ɩa' taan ‑nɛ 'bleɛ nyiɔ 'ɔ "jua‑, ‑wɛe ɩa' ‑nyiiɛ ‑nɛ ke ‑cii" ‑ɛɛ ‑wan" ‑kooɔ'‑. 8 'De 'kmʋnɩdɩ ‑nyiiɛ' ‑nɩ, ɩ 'bleɛ kpoa" wli ‑mɛɛo"‑ due 'due ‑wɛe ɩa' ku ‑wee' nɩ "jri 'a 'sʋ ‑ta "o ‑ta. 'Kamɔ ɩa ‑gbɛɛ' Kea jeejee 'de "maʋ'wɩ o, 'jrʋ ‑gbaowɩ 'di, ɩa wlu' ka, ɩ 'na :