6
Iwala kuwonela wanhu isungu
1 “Mwilole, mleche kudita vinhu vinojile hali wanhu mgana moneche na hewo. Lomdita hino, Mhaza wa hemwe yawele kilanga howatogola hebu.
2 “Lelo, loumtanza mnzunwa, uleche kitogola hali wanhu kota wadesi vyowalingudita kuli ng'handa ya kusalila na mnzila, wopala wanhu wawatogole. Ndangulonga ndikomya, wowa wabochele chonolo cha hewo. 3 Ila hegwe houmtanza mnzunwa, udite ahyo kota yula yondilingumgana ng'hatu wa habehi na hegwe yaleche kuvizela choudita. 4 Ulavye utanzi wa hegwe kwa uviso, Mhaza wa hegwe yalingugona gavisigwe, kokutogola.
Malanguso ga kulanda
(Lukasi 11:2-4)
5 “Lomlanda, mleche kudita kota wahadi. Hewo waganaga kwima na kutambichiza mng'handa ya kusalila na mfungo mwa nzila wogana wanhu wawalole. Ndangulonga ndikomya, awo mina wabochela chonolo cha hewo. 6 Lelo, hegwe houlanda, winjile mng'handa na uhinde lwizi, hamba umlande Mhaza halingoneka. Na heye Mhaza wa hegwe, yalingugona gavisigwe, kokutogola.
7 “Lomlanda, mleche kuhiluchila hiluchila gamwe gago gali hela mana, kota wanhu hawamzelele Nguluwi. Hewo wangijesa kota Nguluwi kowahulichiza kwa vila wangulonga ulonzi winji. 8 Mleche kiwhana na hewo, Mhaza wa hemwe kovizela cho mgana hala mng'hali ne kumlanda! 9 Lelo, ahino ndo mlinguganigwa kulanda.
‘Mhaza wa hetwe uwele kilanga,
itagwa lya hegwe litogoligwe,
10 undewa wa hegwe uye,
lyougana likoleche hano mu isi, liwe kota vyoliwele kilanga.
11 Utugalile lehano chilyo cha hetwe chotulingugana.
12 Utusile gala gotuwifile,
kota vila hetwe vyo tuwosele wala watuzudize.
13 Uleche kutwinjiza kuli kujezigwa,
Ila utulohole na yula mwihe.’
[Kwa vila undewa ndo wa hegwe, na ludali, na ukulu mbaka mazuwa gose. Ena.]
14 “Mina lomuwosela wanhu gehile gowaditile, Mhaza wa hemwe yawele kilanga, kowosela hemwe gehile gomditile kahi. 15 Ila wone mleche kuwosela wanhu wanji gehile gowaditile, na heye Mhaza, howosela hemwe gehile gomditile.
Malanguso ga kwesela kulya
16 “Homukwesela kulya, mleche kudita kota wadesi, hewo wakwisukaga kumeho, wogana wanhu wawalole kota wesela kulya. Ndanguwalonjela ndikomya, kota hewo, mina wabochela chonolo cha hewo. 17 Ila hegwe wone wesele kulya, uhovuje kumeho na ubakalize mafuta kumutwi kwa hegwe. 18 Leka wanhu waleche kuvizela kota kwesela kulya, ila uzeleche hela na Mhaza wa hegwe halingoneka. Na heye Mhaza wa hegwe yalingona gavisigwe, kokutogola.
Ng'hano kilanga
(Lukasi 12:33-34)
19 “Mleche kiwichila lufufu hano muisi kuwele na mifukuzi na ng'angaga ili nguwifya, na wahizi wokwinjila na kuhiza. 20 Miwichile ng'hano kilanga kuwele kuduhu mifukuzi na ng'angaga wolemwa kuwifya, na wahizi hawokwinjila kuhiza. 21 Leka ahala hoiwele ng'hano ya hegwe, ndo na nhumbula ya hegwe hoiwa.
Lumuli lwa lukuli
(Lukasi 11:34-36)
22 “Iziho ndo lumuli lwa lukuli. Wone iziho lyako liwe likomu, lukuli lweng'ha lowa mlumuli. 23 Wone iziho lyako liwe litamwa, lelo lukuli lweng'ha lowa lutitile, na wone lumuli luwele mgati mlukuli lwako, luwe kuli jiza, lelo alyo jiza lya kudumbiza ng'hatu!
Nguluwi na lufufu
(Lukasi 16:13)
24 “Haduhu munhu yokola mijito kwa wakulu weli, mina komzudila yumwe na kumgana yunji, na kowa yomhulichiza yumwe na kumbeza yunji. Homfugamila Nguluwi na lufufu.
Mleche kuwa na lunhwinhwi
(Lukasi 12:22-31)
25 “Ndanguwalonjelani hemwe, mleche kijesa kuli ukomu wa hemwe, molya choni au mong'hwa choni leka muwe na ukomu, au movala choni. Ndaze, ukomu unoga kusinda chilyo na lukuli lunoga kusinda nguwo. 26 Mvilole videje, havilingunyala nyhadikwa, havilingubeta nyhadikwa, kahi vyahela ng'hano. Leka ahyo Mhaza wa hemwe kilanga kanguwahombela. Lelo, hemwe mnoga kusinda awo. 27 Ndaze, hagati ha hemwe kuna munhu kwa mbuli ya lunhwinhwi yoweza kuhejeza ne saa imwe ya kikala mu isi?
28 “Ndaze mwangijesa chomvala? Mlole uluwa wa kisolo vyoulingutitima! Hagalingukola chinhu cha kiditila mibadu. 29 Ila ndanguwalonjelani, na heye Solomoni, na lufufu lwake lweng'ha, nahavalile goya kota uluwa umwenga kuli uluwa umwenga. 30 Nguluwi yalingugana mahamba gawe na mibadu, na misolo lehano jangutitima na mitondo janguvunda na kujisoma mchiluli! Ndaze, howaditilani hemwe mzidi? Hemwe wanhu muwele na makundo mado!
31 “Leka mleche kuwa na lunhwinhwi. ‘Tolya choni? Tong'hwa choni? Na tovala choni?’ 32 Avyo vyeng'ha vyangugailwa na wanhu hawamzelele Nguluwi. Mhaza yawele kilanga, kavizela kota mwangugana vinhu vyeng'ha avyo. 33 Ahyo mijeseni tandi Undewa wa Nguluwi, na gala gatanganiche kusinda vyeng'ha, na Nguluwi kowapa hemwe vyeng'ha avi, na vinhu vinji viyage. 34 Leka, mleche kuwa na lunhwinhwi na ga mitondo. Mitondo yowa na nongwa yake. Nongwa ya zuwa imwe yowatosani kwa zuwa ayo.