1 Hamba Yesu nakawalonjela wala walanguswa wa heye, “Havileka kulawila vinhu vilingujeza wanhu kudita gehile, ila kochona yula yojeza. 2 Naigana yafunjigwe iganga likulu lya lwala msingo na kutozigwa mli mlwanda, kuleka heye kumwambuza munhu yumwe wa awa wadodo kuwifya. 3 Milolele! Wone mng'holozo yakuditile gehile mdeuze, wone yakunde kumgalamchila Nguluwi, yamgalachile. 4 Kahila wone yakuzudize mala saba kwa izuwa limwe na yohiluchila kouli yolonga, ‘Ndimgalamchila Nguluwi,’ goya yakundile.”

5 Wala watumigwa nawamlonjela, “Mkulu tonjezele makundo.” 6 Heye mkulu nakawedichila, Wone makundo ga hemwe na gawe mado kota nhyule ndodo ya haladali, mwahajezile kulilonjela ali igodi lya Mfolosadi ng'holeche ukenjile mli lwanda, nawo wawahuliche.

7 “Tulonje hemwe munhu yumwe kana chitumagwa yali ngukola mijto ya kumgunda au kangudima ming'holo lelo yohiluka kulawa kumgunda, komlonjela ayo chitumagwa himahima uye ulye ndiya? 8 Hebu! Komlonjela nhelechele ndiya wikale ung'holela mijito mbaka londisinda kulya na kung'hwa, ndo nagwe ulye. 9 Homnonela ayo mpogozi kwa vila nakakola goyalonjelwe. 10 Na hemwe namwe wone mdite gomlonjelwe, mlonje, ‘Hetwe wapogozi wohambe tupegwe chinhu, tukola gala gotulonjelwe tukole hela.’ ”

11 Yesu loyali yojenda kuza Yelusalemu nakakola mmbaka mwa Samaliya na Galilaya. 12 Loyali yokwinjila mli chijiji chimwe, naketing'ha na wanhu kumi wali na uswema, wemile kutali. 13 Wachemeleza lizi wolonga, “Yesu mlangusa tonele isungu!”

14 Loyawawene nakawalonjela, “Mlute mkelajile kwa watambika.” Lowaliwoluta, nawona kuhovujigwa. 15 Myawo yumwe yonile nakoselwa mayamwa, kahiluka kamtogola Nguluwi kwa lizi ing'hangala. 16 Ketoza kumwando kuli magulu ga Yesu kuno yomnonela. Ayo yali Msamalia. 17 Aho Yesu nakalonga, “Nandisile matamwa mwali kumi? Wala tisa wakohi? 18 Haduhuli yunji yahiluche kumtogola Nguluwi ila ayu mjenzi yaliyeng'ha?” 19 Yesu nakamlonjela yula munhu, “Winuche, ulute, makundo gako gakulohola.”

20 Mhela umwe Mafalisayo nawamuuza Yesu, “Undewa wa Nguluwi wokuya nili?” Heye nakawalonjela, “Undewa wa Nguluwi haukuya ukoneka. 21 Kahi haduhu munhu yolonga, wahano, au wahala. Lelo Undewa wa Nguluwi wa mgati mwenu.”

22 Hamba kawalonjela walanguswa, “Mazuwa ganguya moza ngugana kulola izuwa limwe lya mwana wa munhu, ila hamyona. 23 Na wanhu wokulonjelani, ‘Mlole ka hala!’ Au ‘Mlole ka hano!’ Ila hemwe mleche kulawa kahi mleche kuwawinza. 24 Mina kota hila lumwemwesa lwa limlungu ne kulonga lumwesa kilanga nzingo imwe mbaka iyage, ndo voiwa zuwa alyo Mwana wa Munhu loyokuya. 25 Ila ago gang'hali, kogazigwa lukami na kulemigwa na lulelo alu. 26 Kota vyonaiwele mhela wa Nuhu ndo vyoiwa hoyokuya Mwana wa Munhu. 27 Wanhu nawalyaga na kung'hwa wohola na kuholeka mbaka mhela ula Nuhu loyenjile mli itumbwi ling'hangala. Mazi metemete logalawile na kuwakopola weng'ha. 28 Yowa kota voilawile mhela wa Loti. Wanhu wazangulya na kung'hwa, kugula na kuguza, kunyala nhyadikwa na kuzenga. 29 Ila izuwa Loti loyochile sodoma, maganga ga chiluli nagalawila gazangutowa kota nhonya kulawa kilanga na kuwakopola weng'ha. 30 Ndo vyoiwa zuwa alyo Mwana wa Munhu loyogubuligwa.

31 “Zuwa alyo, wone munhu yawe mswiswili mli ng'handa, yaleche kudulika yahole vinhu vya heye vili mng'handa yali kumgunda yaleche kuhiluka koyalawile. 32 Mkumbucheni mchewake Loti. 33 Munhu yalingugana kululohola lukuli lwa heye kolwajiliza, na munhu yolwajiliza kolulohola. 34 Ndangukulonjelani, izuwa alyo wanhu weli wowa wawasile hamihe, yumwe koholigwa na yunji kolechigwa. 35 Wadala weli wowa wotwanga ndiya hamwe. Yumwe koholigwa na yunji kolechigwa.” 36 Wanhu weli wowa kumgunda, yumwe koholigwa na yunji kolechigwa.

37 Wamuuza kohi Mkulu? Kawalonjela, “Hawele na mtufi, ndo hojimema mikungule.”