1 Zuwa limwe, Yesu yaliyemile hafungo mwa ilamba lya Genezaleti, wanhu wenji wali wamzungulute wochibana, wohulichiza mbuli ya Nguluwi. 2 Kajona mitumbwi mili hafungo mli ilamba, hewo walowa somba wali wochile, wohovuga utandawala wawo. 3 Yesu kenjila mli itumbwi limwe lya Simoni, kamlonjela yauhejeze hatali chidogo kulawa hafungo mwa ilamba mbaka mmazi. Na baho kekala mumo mli itumbwi na kulangusa lung'hongola lwa wanhu.

4 Loyasindile kulangusa, kamlonjela Simoni, Iigale itumbwi mbaka hagati kuli mazi menji na baho mkatoze utandawala wa hemwe mlowe somba. 5 Simoni nakamwidichila, “Mkulu tujeza kuvula somba hamihe yeng'ha hatupatile ne chinhu ila kwa vila hegwe kulonga ndotoza utandawala.” 6 Lowaditile ahyo wavula somba nyiji, mbaka utandawala wa hewo na waluka kudaduka. 7 Wawachema wayao wali mli itumbwi liyage woye wawatanze. Woya wamemeza somba mitumbwi jeng'ha mili na behi jahazibile.

8 Simoni Petili loyawene gala, kafugama hoyali Yesu kalonga, “Mkulu uche habehi na heni! Heni nda munhu ndili na gehile!” 9 Simoni na wayage weng'ha wabubuwala kwa vila vyowalowile somba nyinji vila. 10 Hihyo Yakubu na Yohani, wanage Zebedayo, wala wali walowa hamwe na Simoni. Yesu kamlonjela Simoni, “Uleche kudumba, kulawa sambi kozanguwa mlowa wanhu.” 11 Ahyo, lowajigale jila mitumbwi hafungo mwa ilamba waleka gengha kumuwinza Yesu.

12 Yali hino, Yesu loyali kuli miji jimwenga ja ako, munhu yumwe yali na uswema lukuli lweng'a kamona. Leka, munhu ayo kagwa chifunama kamlanda Yesu, “Mkulu wone ulingugana kombusila utamwa wondilingugula!”

13 Yesu nakagolola moko, kamdoliza na kulonga, “Ndangugana wezuligwe!” Bahala ula uswema umlawa. 14 Yesu nakamlonjela, “Uleche kumlonjela ne munhu. Ila ulute wikelajile kwa mtambika mkulu, ulavye nhambiko kwa kwezigwa kwa hegwe kota vyoyalajize Musa, Ahyo wanhu weng'ha walavye ulolezi kota hegwe kuwa mkomu.”

15 Ila Mbuli za Yesu zenela chila honhu, na wanhu wenji na woya kumhulichiza na kuwosela matamwa gawo. 16 Ila heye nakaluta yali yeng'ha honhu hali haduhu wanhu, na kulanda.

17 Zuwa limwe Yesu yali yolangusa. Mafalisayo na walangusa wa Malajizo ga Musa, kulawa chila chijiji cha Galilaya na Yudeya na Yelusalemu, wali wekalise baho. Ludali lwa Mkulu lwali hamwe na heye kwa kuwalohola watamwa. 18 Wanhu wamwe na woya, wampapile munhu yaziliche kumwe, wojeza kumwinjiza mng'handa wamuwiche kumwando kwa Yesu. 19 Ila nawalemwela kwinjila mng'handa kwa vila wanhu wenji wali wekale. Ahyo wamkwinhiza ayo yaziliche kuchindwiko, nawatubula kuchindwiko, wamdulisa ayo yaziliche mchinhanda cha heye, wamuwika hagati hali lung'hongola lwa wanhu hali Yesu. 20 Yesu voyawene vyowawele na makundo, kamlonjela ayo munhu yaziliche, “Goloko kusilwa gehile ga hegwe.”

21 Walangusa wa malajizo ga Musa na Mafalisayo wazangiuza, “Hino ayu yalihi yali yokovula? Haduhuli munhu yolohola gehile ila Nguluwi yali yeng'ha!”

22 Yesu nakavizela majesa ga hewo, kawauza, “Lekachoni mwangijesa mnhumbula za hemwe? 23 Lilikohi liwele ubewe ng'hatu. Kulonga, ‘Kusilwa gehile ga hegwe,’ Au kulonga, ‘Wime ujende?’ 24 Ila ndangugana mvizele kota, Mwana wa Munhu kana ludali lwa kuwosela wanhu gehile ga hewo, mno muisi yeng'ha.” Baho kamlonjela yula yaziliche, “Winuche uhole chinhanda cha hegwe, ulute kaye!”

25 Baho yula munhu yoyekale yaziliche kenuka kumwando kwa hewo, kedwika chinhanda cha heye na kaluta kaye, kuno yomtogola Nguluwi. 26 Wanhu weng'ha nawabubuwala ng'hatu! Na kudumba na kumtogola Nguluwi kuno wolonga, “Tuvyona vinduzanduza lehano.”

27 Hamba, Yesu kalawa kunze, kamona mkongoza kodi yumwe yali nguchemigwa Lawi, yekalise mchituka cha kodi. Yesu nakamlonjela, “Umbinze!” 28 Na baho kenuka, kaleka chila chinhu, kamuwinza. 29 Na baho Lawi kamditila Yesu mnvina ng'hulu kaye hake. Na chilundo cha wakongoza kodi na wanhu wanji na wekala hamwe na hewo. 30 Ila Mafalisayo na walangusa wa malajizo ga Musa wamwe, wazangulonga wowalonjela wala walanguswa wa Yesu, walonga, “Lekachoni muwele ngulya na kung'hwa na wakongoza kodi na wadita gehile?” 31 Yesu nakawedichila, “Wanhu wawele wakomu hawalingumlapa mteleka mikwandi, ila wawele watamwa. 32 Suyile kuwachema wanhu wala wanojile, ila wala wawele na gehile wamgalamchile Nguluwi.”

33 Wanhu wanji wamlonjela Yesu, “Walanguswa wa Yohani Mbatiza wali wokwesela kulya na kulanda, na wa Mafalisayo waditaga hiho, ila walanguswa wahegwe wangulya na kung'hwa.” 34 Yesu nakawedichila, “Lelo wala walalikwe kuli mnvina ya kuhesa waganigwa kwesela kulya na mkasano yali na mnvina yali hamwe na hewo? Hebu! 35 Ila mhela wokuya hoyokusigwa mkasano yali na mvina hali hewo, baho wokwesela kulya.”

36 Yesu nakawalonjela nhelo ayi, “Haduhu munhu yalingukanha chibende chinyale na kuhoneleza kuli nguwo ya katali. Wone yadite ahyo, koiwifya ila nguwo inyale, chila chilingulawa kuli nguwo inyale hachiwana na nguwo ya katali. 37 Kahi kuduhu munhu yowika divai ya lehano kuli chizombe cha igozi cha katali. Kwa vila wone yadite hino, divai ya lehano yozatula jila mihako, divai yobohoka na mihako jotulika. 38 Divai ya lehano yowichigwa mli vizombe vya igozi vinyale. 39 Kuduhu munhu yalingung'hwa divai ya katali, na baho yogana kung'hwa divai ya lehano. Kwa vila kolonga ‘Divai ya katali inona lukami.’ ”