14
Ximxonning Filistiy bir ⱪizni ǝmrigǝ almaⱪqi boluxi
1 Bir waⱪitta, Ximxon Timnaⱨⱪa qüxüp, u yǝrdǝ bir ⱪizni kɵrdi; u Filistiy ⱪizliridin biri idi. □ «Timnaⱨ» — yaki «Timnataⱨ». 2 U xu yǝrdin qiⱪip ata-anisining yeniƣa ⱪaytip: — Mǝn Timnaⱨda Filistiy ⱪizliridin birini kɵrdüm, uni manga hotunluⱪⱪa elip beringlar, — dedi.
3 Biraⱪ ata-anisi uningƣa: — Ⱪerindaxliringning ⱪizlirining iqidǝ yaki bizning pütkül ⱪowmimizning arisidin sanga bir ⱪiz qiⱪmasmu? Nemixⱪa hǝtnisiz bolƣan Filistiylǝrning ⱪexiƣa berip, ulardin hotun almaⱪqi bolisǝn? — dedi; ǝmma Ximxon atisiƣa: — Uni manga elip bǝrgin, qünki u manga bǝk yaⱪti, — dedi.□ «bizning pütkül ⱪowmimizning arisidin...» — ibraniy tilida «mening pütkül ⱪowmim arisidin...».
4 Uning ata-anisi bu ixning Pǝrwǝrdigar tǝripidin bolƣinini bilmidi. Qünki Filistiylǝr xu qaƣda Israil üstidin ⱨɵküm sürüp turƣan bolƣaqⱪa, U Filistiylǝrgǝ taⱪabil turuxⱪa pursǝt yaratmaⱪqi idi.□ «...yaratmaⱪqi idi» — ibraniy tilidiki muxu sɵz adǝttǝ «izdimǝkqi idi» degǝnni bildüridu. Mumkinqiliki barki, Hudaning Roⱨi Ximxonni tezrǝk Filistiylǝrgǝ ⱨujum ⱪilixⱪa ⱪozƣiƣini bilǝn, lekin u Hudaning Roⱨining xu türtkisigǝ tehiqǝ etiwar ⱪilmaywatatti.
5 Əmdi Ximxon ata-anisi bilǝn Timnaⱨⱪa qüxti; ular Timnaⱨdiki üzümzarliⱪlarƣa yetip kǝlgǝndǝ, mana bir yax xir ⱨɵrkirigǝn peti uningƣa etildi. 6 Xuan Pǝrwǝrdigarning Roⱨi uning üstigǝ qüxüp, u ⱪolida ⱨeqnemǝ bolmiƣan ⱨalǝttǝ xirni tutup, uni oƣlaⱪni yirtⱪandǝk yirtip titma-titma ⱪiliwǝtti. Lekin u bu ixni ata-anisiƣa demidi. □ «Lekin Ximxon bu ixni ata-anisiƣa demidi» — Ximxon «nazariy» bolƣaqⱪa, ⱨeqⱪandaⱪ üzümdin bolƣan nǝrsini yemǝsliki kerǝk idi. Xunga Ximxon üzümzarliⱪ bilǝn mangmay, ata-anisidin ayrilip mangƣan bolsa kerǝk. Lekin ata-anisi «nazariy» bolmiƣaqⱪa üzümzarliⱪtin udul ɵtsǝ bolatti. Xu sǝwǝbtin Ximxonning ata-anisi uning xirni ɵltürginini bilmidi. 7 Andin u Timnaⱨⱪa qüxüp, u ⱪiz bilǝn paranglaxti, u ⱪiz Ximxonƣa bǝk yarap kǝtti.
8 Birmǝzgildin keyin u ⱪizni elip kelix üqün ⱪayta barƣanda, xirning ɵlükini kɵrüp baⱪay dǝp yoldin burulup ⱪariwidi, mana xirning iskilitining iqidǝ bir top ⱨǝsǝl ⱨǝriliri bilǝn ⱨǝsǝl turatti. 9 U ⱨǝsǝldin oqumiƣa elip yǝp mangdi; ata-anisining yeniƣa kǝlgǝndǝ, ularƣimu bǝrdi, ularmu yedi, lekin ɵzining ⱨǝsǝlni xirning iskilitining iqidin elip kǝlginini ularƣa demidi. 10 Uning atisi uningƣa ⱨǝmraⱨ bolup qüxüp ⱪizning ɵyigǝ kǝldi, u yǝrdǝ Ximxon bir ziyapǝt bǝrdi, qünki burundinla toy ⱪilidiƣan yigitlǝr xundaⱪ ⱪilidiƣan rǝsm-ⱪaidǝ bar idi. 11 Ular Ximxonni kɵrüp, uningƣa ⱨǝmraⱨ boluxⱪa ottuz yigitni tepip kǝldi; ular uningƣa ⱨǝmraⱨ boldi. □ «...ottuz yigitni tepip kǝldi» — ximxunning toyida uningƣa ⱨǝmraⱨ boluxⱪa qaⱪirƣan bolsa kerǝk. 12 Ximxon ularƣa: — Mǝn silǝrdin bir tepixmaⱪ soray, ǝgǝr silǝr ziyarǝt ⱪilinidiƣan yǝttǝ kün iqidǝ uning mǝnisini manga dǝp berǝlisǝnglar, mǝn silǝrgǝ ottuz danǝ kanap kɵynǝk bilǝn ottuz yürüx egin berimǝn; 13 ǝgǝr uni yexip berǝlmisǝnglar, silǝr manga ottuz danǝ kanap kɵynǝk bilǝn ottuz yürüx egin beringlar, — dedi. Ular uningƣa: — Maⱪul, undaⱪ bolsa tepixmiⱪingni eytⱪin, ⱪeni anglayli, — dedi.
14 U ularƣa: — Yeyilidiƣini yegüqining iqidin qiⱪti; tatliⱪ küqtünggürning iqidin qiⱪti, bu nemǝ? — dedi. Ular üq küngiqǝ bu tepixmaⱪni tapalmidi. 15 Yǝttinqi küni xundaⱪ boldiki, ular Ximxonning ayalining ⱪexiƣa berip: — Sǝn eringni aldap-siylap, tepixmaⱪning mǝnisini bizgǝ eytip berixkǝ maⱪul ⱪilƣin; bolmisa seni atangning ɵyi bilǝn ⱪoxup kɵydürüwetimiz. Silǝr bizni yoⱪsul ⱪilixⱪa bu yǝrgǝ qaⱪirƣanmu?! — dedi.□ «yǝttinqi küni...» — bǝzi kona kɵqürmilǝrdǝ «tɵtinqi küni...» deyilidu.
16 Ximxonning ayali uning aldida yiƣlap turup: — Sǝn manga ɵq, meni pǝⱪǝt sɵymǝysǝn; sǝn mening ⱪowmimning baliliridin bir tepixmaⱪni soriding, ǝmma manga mǝnisini eytip bǝrmiding, dǝp yiƣliƣili turdi. Ximxon uningƣa jawabǝn: — Mana, mǝn uni ata-anamƣimu dǝp bǝrmigǝn tursam, sanga dǝp berǝmdim? — dedi.
17 Ziyapǝt ɵtküzülgǝn yǝttǝ künidǝ u erining aldida yiƣlapla yürdi. Xundaⱪ boldiki, yǝttinqi küni bolƣanda ayali uni ⱪistap turuwalƣaqⱪa, uningƣa tepixmaⱪning mǝnisini eytip bǝrdi. Andin ayal berip ɵz hǝlⱪining adǝmlirigǝ tepixmaⱪning mǝnisini dǝp bǝrdi. □ «Ziyapǝt ɵtküzülgǝn yǝttǝ künidǝ u erining aldida yiƣlapla yürdi» — yaki «Ziyapǝt ɵtküzülgǝn yǝttǝ künlük ziyapǝtning ⱪalƣan waⱪtida u uningƣa (Ximxonƣa) exiliwelip yiƣlapla turdi». 18 Xuning bilǝn yǝttinqi küni kün patmasta, xǝⱨǝrning adǝmliri uningƣa jawab berip: — Ⱨǝsǝldinmu tatliⱪi barmu? Xirdinmu küqtünggüri barmu? — dedi.
U ularƣa jawab berip: — Əgǝr silǝr mening inikim bilǝn yǝr aƣdurmiƣan bolsanglar, tepixmiⱪimni ⱨǝrgiz tapalmayttinglar! — dedi.
19 U waⱪitta Pǝrwǝrdigarning Roⱨi uning üstigǝ qüxti; u Axkelonƣa qüxüp, Axkelondikilǝrdin ottuz kixini ɵltürüp, ulardin olja elip, oljidin iginlǝrni elip kelip, tepixmaⱪning mǝnisini yexip bǝrgǝnlǝrgǝ bǝrdi. Xuningdǝk Ximxonning ƣǝzipi kelip, ata-anisining ɵyigǝ yenip kǝtti.□ «Axkelon» — Filistiylǝrning qong bir xǝⱨiri.
20 Andin Ximxonning ayali Ximxonning ⱨǝmraⱨliridin ⱪoldax bolƣan yigitkǝ tǝwǝ ⱪilindi.□ «ⱪoldax bolƣan yigitkǝ...» — yaki «ɵzigǝ aƣinǝ ⱪilƣan yigitkǝ».
□14:1 «Timnaⱨ» — yaki «Timnataⱨ».
□14:3 «bizning pütkül ⱪowmimizning arisidin...» — ibraniy tilida «mening pütkül ⱪowmim arisidin...».
□14:4 «...yaratmaⱪqi idi» — ibraniy tilidiki muxu sɵz adǝttǝ «izdimǝkqi idi» degǝnni bildüridu. Mumkinqiliki barki, Hudaning Roⱨi Ximxonni tezrǝk Filistiylǝrgǝ ⱨujum ⱪilixⱪa ⱪozƣiƣini bilǝn, lekin u Hudaning Roⱨining xu türtkisigǝ tehiqǝ etiwar ⱪilmaywatatti.
□14:6 «Lekin Ximxon bu ixni ata-anisiƣa demidi» — Ximxon «nazariy» bolƣaqⱪa, ⱨeqⱪandaⱪ üzümdin bolƣan nǝrsini yemǝsliki kerǝk idi. Xunga Ximxon üzümzarliⱪ bilǝn mangmay, ata-anisidin ayrilip mangƣan bolsa kerǝk. Lekin ata-anisi «nazariy» bolmiƣaqⱪa üzümzarliⱪtin udul ɵtsǝ bolatti. Xu sǝwǝbtin Ximxonning ata-anisi uning xirni ɵltürginini bilmidi.
□14:11 «...ottuz yigitni tepip kǝldi» — ximxunning toyida uningƣa ⱨǝmraⱨ boluxⱪa qaⱪirƣan bolsa kerǝk.
□14:15 «yǝttinqi küni...» — bǝzi kona kɵqürmilǝrdǝ «tɵtinqi küni...» deyilidu.
□14:17 «Ziyapǝt ɵtküzülgǝn yǝttǝ künidǝ u erining aldida yiƣlapla yürdi» — yaki «Ziyapǝt ɵtküzülgǝn yǝttǝ künlük ziyapǝtning ⱪalƣan waⱪtida u uningƣa (Ximxonƣa) exiliwelip yiƣlapla turdi».
□14:19 «Axkelon» — Filistiylǝrning qong bir xǝⱨiri.
□14:20 «ⱪoldax bolƣan yigitkǝ...» — yaki «ɵzigǝ aƣinǝ ⱪilƣan yigitkǝ».