Muⱪeddes Kalam (yǝngi yeziⱪ) Yǝxaya 64

Duaning dawami

1-2 Aⱨ, Sǝn asmanlarni yirtiwetip,

Yǝrgǝ qüxkǝn bolsang’idi!

Taƣlar bolsa yüzüng aldida erip ketǝtti! Mana muxundaⱪ bolƣanda tuturuⱪⱪa ot yaⱪⱪandǝk,

Ot suni ⱪaynatⱪandǝk,

Sǝn namingni düxmǝnliringgǝ ayan ⱪilƣan bolatting,

Əllǝr yüzüngdinla titrǝp ketǝtti!□

3 Sǝn biz kütmigǝn dǝⱨxǝtlik ixlarni ⱪilƣan waⱪtingda,

Sǝn qüxkǝniding;

Yüzüngdin taƣlar rastla erip kǝtti!□

4 Sǝndin baxⱪa Ɵzigǝ tǝlmürüp kütkǝnlǝr üqün ixligüqi bir Hudani,

Adǝmlǝr ǝzǝldin anglap baⱪmiƣan,

Ⱪulaⱪⱪa yetip baⱪmiƣan,

Kɵz kɵrüp baⱪmiƣandur!■

5 Sǝn ⱨǝⱪⱪaniyliⱪni yürgüzüxni hursǝnlik dǝp bilgǝn adǝmning,

Yǝni yolliringda mengip, Seni seƣinƣanlarning ⱨajitidin qiⱪⱪuqi ⱨǝmraⱨdursǝn;

Biraⱪ mana, Sǝn ƣǝzǝptǝ boldung,

Biz bolsaⱪ gunaⱨta bolduⱪ;

Undaⱪ ixlar uzun boliwǝrdi;

Əmdi biz ⱪutⱪuzulamduⱪ?

6 Əmdi biz napak bir nǝrsigǝ ohxax bolduⱪ,

Ⱪiliwatⱪan barliⱪ «ⱨǝⱪⱪaniyǝtlirimiz» bolsa bir ǝwrǝt latisiƣila ohxaydu, halas;

Ⱨǝmmimiz yopurmaⱪtǝk hazan bolup kǝttuⱪ,

Ⱪǝbiⱨliklirimiz xamaldǝk bizni uqurup taxliwǝtti.■

7 Sening namingni qaⱪirip nida ⱪilƣuqi,

Iltipatingni tutuxⱪa ⱪozƣalƣuqi ⱨeq yoⱪtur;

Qünki Sǝn yüzüngni bizdin ⱪaqurup yoxurdung,

Ⱪǝbiⱨliklirimizdin bizni solaxturƣuzdung.

8 Biraⱪ ⱨazir, i Pǝrwǝrdigar, Sǝn bizning Atimizdursǝn;

Biz seƣiz lay, Sǝn bizning sapalqimizdursǝn;

Ⱨǝmmimiz bolsaⱪ ⱪolungda yasalƣandurmiz;

9 I Pǝrwǝrdigar, bizgǝ ⱪaratⱪan ƣǝzipingni zor ⱪilmiƣaysǝn,

Ⱪǝbiⱨlikni mǝnggügiqǝ ǝslǝp yürmigin;

Mana, ⱪariƣin, ⱨǝmmimiz Sening hǝlⱪingdurmiz!■

10 Muⱪǝddǝs xǝⱨǝrliring janggal,

Zionmu janggal bolup ⱪaldi;

Yerusalem wǝyran boldi;

11 Ata-bowimiz Seni mǝdⱨiyiligǝn jay,

Pak-muⱪǝddǝslik, güzǝl-parlaⱪliⱪ turalƣusi bolƣan ɵyimiz bolsa ot bilǝn kɵyüp kül boldi;

Ⱪǝdir-ⱪimmǝtlik nǝrsilirimizning ⱨǝmmisi wǝyran ⱪiliwetildi.□

12 Muxu ixlar aldida Ɵzüngni qǝtkǝ alamsǝn, i Pǝrwǝrdigar?

Süküt ⱪilip turamsǝn?

Bizni boluxiqǝ har ⱪilip uriwerǝmsǝn?»

□64:1-2 «Aⱨ, Sǝn asmanlarni yirtiwetip, yǝrgǝ qüxkǝn bolsang’idi! Taƣlar bolsa yüzüng aldida erip ketǝtti!» — baxⱪa birhil tǝrjimisi: «Aⱨ, Sǝn asmanlarni yirtiwetip, yǝrgǝ qüxsǝng iding! Taƣlar bolsa yüzüng aldida erip ketǝtti!».

□64:3 «Yüzüngdin taƣlar rastla erip kǝtti!» — Israillar Misirdin qiⱪⱪandin keyin, Huda ularƣa Musa pǝyƣǝmbǝr arⱪiliⱪ muⱪǝddǝs ⱪanun-pǝrmanlirini bǝrgǝn waⱪtida, Sinay taƣliri xundaⱪla erip kǝtti. Yǝxaya pǝyƣǝmbǝr bǝlkim muxu ixlarni kɵzdǝ tutidu.

■64:4 Zǝb. 31:19,20; 1Kor. 2:9

■64:6 Zǝb. 90:5-8

■64:9 Zǝb. 79:8

□64:11 «...Pak-muⱪǝddǝslik, güzǝl-parlaⱪliⱪ turalƣusi bolƣan ɵyimiz bolsa ot bilǝn kɵyüp kül boldi» — muxu ayǝttiki «ɵyimiz» muⱪǝddǝs ibadǝthana, ǝlwǝttǝ. «Ɵy» degǝn sɵzning ixlitilixi bolsa, Hudaning ǝsli ularning arisida (ibadǝthanisida) turƣanliⱪini tǝkitlǝydu. «Ⱪǝdir-ⱪimmǝtlik nǝrsilirimiz»ning ǝng esili bolsa yǝnila ibadǝthanidiki buyum-jabduⱪlar bolƣanidi. Babilliⱪlarning Yerusalemni, jümlidin muⱪǝddǝs ibadǝthanini wǝyran ⱪilƣanliⱪi bǝlkim muxu bexarǝttin keyinki 100 yil ǝtrapida boldi (miladiyǝdin ilgiriki 586-yili). Muxu ayǝttǝ, pǝyƣǝmbǝr (63:15-19-ayǝtlǝrdiki ǝⱨwalƣa ohxax) ɵzi axu dǝwrdǝ turƣandǝk sɵz ⱪilidu; u axu dǝwrdikilǝrgǝ wǝkil bolup dua ⱪilidu.