IPURU
IPURU Yamboma Pepá Topa Sirimu Bokumu
I Bokumunge Ungu Pulu Mare
Isirele yambomanga anda kolepa Jekopo, yunge imbi te ‘Isirele’ niringi, akumuni yandopa Yesusi molopili kalopa lirimu yambomando ‘Isirele yamboma’ niringi; ‘Juda yamboma’ niringila; ‘Ipuru yamboma’ niringila. Ou pulu pulu ‘Ipuru yamboma’ niringi ungumu Wendo Oringi 1:22 molemo. Nakolo i pepá topa sirimu Ipuru yambo akuma Juda yambo konopu alowa teko ‘Yesusi yu sike Pulu Yemonga Malo. Yu sike Pulu Yemone “Ene nokopa konjimbe ye te lipu mundumbu.” ou nimbe, nimbe panjipe mako torumu ye nomi Kirasimu.’ ningu tondolo munduku piliringi yamboma.
Kanu Ipuru yamboma ou Mosisini sirimu ungu manema pilku liku Pulu Yemo popo tongendo kongime toko kalko kongimenga memema Pulu Yemo siringi yamboma moloringine pilipelie pepámo torumu yambomone kanu Ipuru yamboma Kirasinge unguma mane simbendo “Mosisi kinie, kongi toko Pulu Yemo siringi kongime kinie kongimenga memema kinie, Pulu Yemo popo toringi ulke tembelemo kinie, Pulu Yemo popo tonjili yema kinie kanu yemanga ye aili olandopamo kinie, kanuma paa manie.” nimbe, “Yesusi kinie Yesusinge mememo kinie Yesusi yuyu kepe paa olandopa.” nirimu. ‘Yu munduku kelko ou pilku teko moloringi mele kelko naa teangi.’ nimbe i pepámo topa sirimu.
Ungu pulu mare boku alsena anjukundu molemo akuma i sipe: “32.2. Pikinini Bilong God”, “26. lo”, “34. pris”, “34.3. hetpris”.
I pepámo topa sirimu yemo naenje, naa pilimolo. Marene ‘Pollone torumu’ konopu lemele. Nakolo Matini LLuta kinie yambo marene ‘Pollo molo. Ye tene lupe torumu.’ niringi. Yambo marene Lipe Mundurumu Yema 18:24-28 kanokolie ‘Aku ye Apollosini torumu.’ konopu lemele. Marene aku temanemo kanokolie ningindu: “Ambo Pirisillane torumunje.” nilimele. Koronga ou ye pilipe konginjili ye tene “Banapasini torumunje.” nirimu. Lipe Mundurumu Yema 4:36, 13:1-4 kanopalie aku sipe pilirimunje. “Molo, LLukuni torumunje. Molo ye tene lupe torumunje.” nilimele. Nakolo i pepá torumu yambomonga imbimu unguri molo. Pulu Yemonga Mini Kake Telimuni ‘Pulu Yemonga ungumu tonjipili.’ nirimu kinie pilipelie yambo tene torumu, akumunge i bokune molemo ungumu sike Pulu Yemonga ungumu.
Ya ungu pulumu pora nikimu.
1
1 Paa ou Pulu Yemone alieli olio Ipuru yambomanga anda kolepalimendo ‘Nanga unguma piliengi!’ nimbe yunge ungumu pilku yando ningu siringi yema* yuni ungu umbu tonjirimuma pilkulie olionga anda kolepalime ningu siringi. ‘Yamboma paa piliengi!’ nimbe lipe taponjirimu kinie kanu yemane ulu aisili liku ora siku teko ungu aisili ningu siringi. 2 Nakolo pe kinié* ‘Yunge Malone olio yunge unguma nimbe sinjipili.’ nimbe Pulu Yemone** yu mana maniendo lipe mundurumu. Kanu kangomo Pulu Yemone ‘Nanga melema kamu yu simbu, lipe nosipe molomba.’ nirimu kangomo. Kanu kangomo yu Pulu Yemone ou mulu ma melema “Teambo.” nirimu melema pali terimu yemola.*** 3 ⸤Enamo pa telemo mele aku sipe⸥ Malo pa telemo akumuni Pulu Yemonga pa tondolo mundupe telemo pa telimu olio lipe ora silimo.* Pulu Yemo molemo mele Malo aku sipe molemo. Malonga ungu tondolomone melema pali kapola molemele. Yuni ‘olionga ulu pulu kerime omba manie pupili, olio yambo kalaro naa mololime molangi.’ nimbe kongono tepa pora sipelie ⸤melema pali nokombando⸥ mulu koleana Ye Nomi Kingi Aili Olandopamonga ki umbukundu pupe molemo.**
4 Aku terimuna* yunge imbi lepa ‘Nanga Malo’ nirimu aku imbimu paa olandopa purumu, mulu koleana angellomando imbi lepa ‘Pulu Yemonga kongono tenjili yema’ nirimu aku imbimu paa manie, aku sipe mele yu yuyu paa olandopa angelloma maniendopa. 5 Pulu Yemone nimbendo:
“Nu nanga Malo. Kinié na nunge Lanie.”.*
nirimu mele angello tendo walse aku sipe nirimuye? ⸤Molo. Yunge Malondo mindi aku sipe nirimu.⸥
Molo yuni nimbendo:
“Na yunge Lapa molombo,
yu nanga Malo molomba.”.**
nirimu akumu angello tendo nirimuye? ⸤Molola. Malondo mindi aku sipe nirimu.⸥ 6 Yundu ungu te pea nirimula. Yunge kango komolayemo* mana lipe maniendo mundupelie Pulu Yemone yunge angellomando nimbendo:
“Kangomo popo toko kapi ningu
yunge imbi ambolko ola linjei.”.**
nirimu. Aku unguma pilipulie ‘Malo olandopa angelloma maniendopa.’ nimbu pilimolo. 7 Angellomando Pulu Yemone nimbendo:
“Yunge angelloma poporomema mele molko,
yunge kongono tenjili yema
tepe mele molangi.”.*
nilimo. 8 Nakolo Pulu Yemone Malondo nimbendo:
“Pulu Yemo, nu alieli ye nomi kingimu
moleno mele molko mindi puni.*
Nuni ulu sumbi nilime teko yamboma nokoni.
9 Nuni ulu pulu sumbi nilime manjiku
konopu siku teleno.
Ulu pulu kerime konopu naa monjiku
paa naa teleno, akumunge
nunge Pulu Yemone ‘Nu ye nomi kingi molko
melema pali nokani.’ nimbe mako topalie
nunge pulu lemo yambomanga pali
namba paa olandopamo nu sirimu.
Nu aku sipe tepa konjirimumunge
nu kinie nunge pulu lemo yamboma kinie
konopu singí.”
nirimu.*
10 Pulu Yemone ⸤Malondo⸥ ungu te pea nimbendo:
“Ailimu,* ou pulu pulu nuni mamo teko,
nunge kimuni nunu mulumu teko mimi terinu.
11 Aku meletolo pora nimbé, nakolo
nu alieli molko mindi pulino.
Mulu wambalema pingi pupe
sungu nimbe keri lemo mele
mulu matolo aku temba.
12 Yambomane wale pakoli suluma
toko ele tengendo kimbulimele mele
nuni mulu matolo aku siku kimbuni;
mulu wambale te lupe panjingindu alowa telemele mele
nuni aku siku aku meletolo alowa teni.
Nakolo nu nunu aku siku alowa naa teko,
moleno mele alieli molko,*
anda naa lelko, alieli molko mindi puni.”.**
nirimu. 13 Pulu Yemone ou walse nimbendo:
“ ‘Nunge opa touma nuni nokani.’ nimbu
pe ene topo manie mundunjimbu kene
isili ou nu ⸤na kinie pea
tapu topolo ye nomitolo molopolo
melema nokambili⸥
nanga ki umbukundu ongo molani.”.*
nirimu aku ungumu angellomando nirimuye? 14 ⸤Aku ungumu angellomando naa nirimu liemo⸥ angelloma nameleye? Angelloma mini mele molko Pulu Yemonga kongono tenjili yema. Kanuma Pulu Yemone lipe taponjipe, mindili nolemelka aulkena wendo lipe, yu kinie pea molko konjingí aulkena lipe monjilimo* ulu pulumu lingí yamboma ‘Liku taponjiku nokangi pai.’ nimbe lipe mundulimo yema.