1 Ege uiaba uridili bako, a abi egardare Pilatoim,

2 A abi etomeretare, kega, Keriba erdali abele le, E mer desakili abele ged ge, E daisumda nole Kaisarai lu aisuerare, kega, E Keriso Opole.

3 A Pilato abi itimer, kega, Nako ma Iudaia giz Opole? Ege E abim detaut, kega, Eko, mama detager.

4 Pilato de uiabi daratagerare, zogozogo le, a le lakub, Kaka nole nerute uit lu ardar kak abi dog.

5 A uiaba mena elele detager, kega, Epe E desakili abele ged ge, E ereuerem Iudaia uridili, E ditimeda Galilaia, a bakedida abele uteb.

6 Ege Pilato abele lu asor, E nautumerare, kega, E Galilaia le?

7 E umele E Heroda ra baselaia le, E abi Herodaim ikuar, abele kerker E emeri Ierusalem ge.

8 Heroda de Iesu erdali, E au sererege: abelelam gaire gerger E lagelag abi dasmer, E asoli, kega, E gaire lu ikeli; E lagelag dasmer atamelam ikeli.

9 E abi itimer gaire merem; epe E nole abi detager nerute mer.

10 A zogozogo le a aotale giz, ui bako, a elele abi etomeret.

11 Heroda pako abara ares le, uiaba abi dituaki, a abi negneg, a zoromzorom uali ame, a ko Pilatoim egaredare.

12 Ege Pilato a Heroda, uiaba ko debele abele gerger: abelelam uiaba kekiam ueku ueku.

13 Ege Pilato de etami netat uteb zogozogo le, a tarim le, abele ged ge,

14 E uiabi daratagerare, Ua tegardare abele le karim, mokakalam pe desakili abele ged: dasmer, kaka itimer uaba op, kaka nole ardar kak nerute lu abi dog, nole abkoreb gaire mer uaba abi etomeret:

15 A Heroda nole umer kak: abelelam kaka uabi demarida abim; dasmer, nole nerute lu ikeli iaueakai abkoreb eumida.

16 Abele lu kaka kekiam barditug, a keuba kaka abi adem.

17 Debele, E namarid nerute le uiabim, abele uetpur ge.

18 Le lakub uridili, uiaba ereretikri, kega, Adem abele le, debele Barabasa emarida keribim:

19 Abele le azirkare muige audbar meta, E adud tonar abele uteb ge, a le ipit eumida.

20 Epe Pilato ko uiabim mer detaut, abelelam E lagelag Iesu adem;

21 A uiaba au kase ereretikri, kega, Satauroem, satauroem.

22 E neisi netat gaber E detaut, kega, Nalu adud E ikeli? Kaka nole umer kak adud lu ikeli iaueakai abkoreb eumida: debele kaka abi barditug, a keubu namarida.

23 A uiaba elele ereretikri, a damos, iauaekai abi satauroem. Uiaba kodomer au saserim, pako zogozogo le giz.

24 Ege Pilato de uiabi daratagerare, kega, Uaba lag ikeli.

25 Ege E abi adem detue nerute le uiabielam, muige audbar metalam, abelelam E au adud tonar, a le ipit, uiaba au lagelag abi adem emarik; Epe E Iesui uiabi nakuarare, mokakalam uiaba lag.

26 Uiaba abi tegared, epe uiaba erpei Simona, nerute Kurene, le, E tabakeam sumezlam, a uiaba abi ikuar abele satauro, E kodrom dikemerik, a Iesui irmili.

27 A gaire le lakub abi irmili, a kosker giz, a uiaba bazuer.

28 A Iesu uiabim egreemalu, a daratagerare, kega, Ierusalema neur giz, uaba nole ezoli karim, debele ua uabu baguauem pako uaba omasker.

29 Dasmer, keubu kerker tabarki uader detaut, kega, Uerkab soasoa, kosker nole uerem kak, pako nano are kak.

30 Abele kerker, le giz detaut, kega, Debele paser keribi tumge abi; a uiaba detager, kega, Daip mudige ki nabaspe.

31 Abelelam ese ikeli abele kereskeres lu, nalu lu ikeli abkoreb uatuet lu?

32 Neisi uit le taragardare abi okakis, kem eumidare.

33 A baos abele uteb, nei atker, Kerem lid ra uteb, a uiaba abi satauro abele uteb ge, okakis neisi uit le, nerute tuter peik, nerute ber peik.

34 Epe Iesu abi detager, kega, Kara Aba, ma uiabi idigir; abelelam uiaba umer kak abele lu uiaba ikeli. A ui ge abara am uali barapeirare, a luglug ikeli.

35 Abele ged, uiaba ekuei a dasmerare. Tarim le pako uiaba abi negneg, a kega, E uader idigir; ese E Keriso, debele tababu idigir, Ade abi sererege.

36 Ege ares le giz abi neg degarare, uiaba abim bakeuare abi ikuar uinega,

37 A uiaba detautare, kega, Ese ma Iudaia Opole mabu idigir.

38 Abele jauali detali tumge Heleni mer, a Roma, a Heberu, Abele Iudaia giz ra Opole.

39 Nerute le emered abi dog, adud mer abim, kega, Ese ma Keriso, debele mabu idigir, pako keribi.

40 A nerute le abi daisumda, kega, Nako ma nole Adim geum, abelelam meriba okakis bodomalam?

41 Abkoreb meriba bodomalam; abelelam meriba bodomalam abkoreb abele lu meriba ikeli: epe abele le, E nole adud ikeli.

42 A E Iesui detager, kega, Opole, ese ma tabakeamu mara baselaia ma nole kari okataprik.

43 Ege Iesu de abi detaut, kega, Ageakar, kaka mari detager, Abele gerger meriba obapit Paradaiso.

44 Ege abele haua sikes baruk, abele ged kupikupi, bakedilu abele nain haua ge.

45 Epe lem kupikupi: abele uali demed, muige zogo meta, tababu batoat.

46 Ege Iesu au ereretikri, kega, Kara Ab, kaka mari ikuar karbara lamar mari tagem: E abele mer detaut, abara eud baruk.

47 Epe abele kerem le, asesered netate handed ares le, E erdali abele lu, E Adim damer, kega, Ageakar, abele le tabara tonar barkak.

48 Ege uader le giz etameare abele uteb ge, uiaba dasmerare abele lu, a marmot ge bamuare, a bakomeret.

49 A uader abi umele, uiaba ekuei muriz ge, pako uader kosker giz abi irmilare Galilaialam, a uiaba dasmerare abele lu.

50 Dasmer, nerute le, nei Iosefa, E tarim le, E debe tonar,

51 (E nole upinati uiaba mer, pako abele sirdame, pako abele lu), E Arimathia le. E Iudaia ra uteb, E naokaili Ade ra baselaia ge:

52 E bakeam Pilatoim, E damosi Iesu ra gem.

53 E tais, a sopem ereb abele uali lino, E ikedi abele ao ge, baker kur, nole atkobeir kak.

54 Abele gerger uetpur, maike sabath.

55 Ege uader kosker, abi kemem tabakeauare Galilaialam, uiaba irmilare, a dasmer abele ao ge, abara gem azirik.

56 Ege uiaba ko akomeda, a derser lu debe laglag, pako uakasu debe laglag. Ege uiaba nerezi sabath ge, abkoreb Ade ra mer.