ROMA
Hamadefal
Babior we yael Paulus ngalir Kristianol Roma ila ye teftaf bo yebe hafle eklesia la woal Roma irel yael Paulus bela tefael mo iyang. Paulus ye luluwaley bo yebe yengang sugfed luwulur Kristiano kala wol Roma, iwe ngo ir resa tipingi bo yebe loh woal Spaeyyol. Ye tefa babior le bo yebe hamdefa ngalir yal iy medaf irel tugulul ladep le yar Kristiano iwe mo mala igegal le rebe dabey seral mo seral le ir Kristiano. Dolpal foloy kowe yael Paulus ila ye mel lal babior le.
Wol miril yal habongur ngalir chol eklesia la woal Roma, iwe mo yal kangalur yal ma hasi yar mapel, ngo Paulus yesa moch tefa mala pallengel fael babior le: “Ebangelium we ye kawraloh igegel yael Deus hafler yarmat ngali: Le irel tugulul ladep chog mo irel mala chapildah yee, yela hola mala haigul loh” (1:17).
Iwe ngo Paulus yesa moch taboloh yal hamdefa mele pallengel fael babior le. Pangerloh yarmat, le Jews fengal mo Gentiles, ngo rebe hafler mo irel Deus, bo re hafedegloh chog panger yarmat le re mel luwul mala kkelel molfid. Yarmat ila rebe fel mo irel Deus irel yal tugul lal deper irel Jesus Kristus. Yela wol miril meka ngo Paulus yesa hamdefa kofal molow le ye tefoy le ye budoh mo irel yach sew chog mo Kristus le ye yoh ngalgich mo irel Bogtag la yach mo Deus le yesa tefoy tefael. Rechokla yesa tugul lal deper ila yesa pos igeger mo irel Deus, ngo Espritu Santus yesa taldir mo irel mala kkelel molfid mo maes. Irel Mo mwol la 5–8, ngo Paulus ye wol hamdefa fael Hatobtob we yael Deus mo mala kkelel Espritu Santus le ye mel uwor rechokla yesa tugul lal deper. Apostel kowe re fefedgagili hare ifa sengal igeger Jews mo Gentiles mo irel mekla Deus ye luluwaley be foar ngalir panger yarmat. Paulus yesa chepar le yar Jews tahcheloh Jesus ila tabol chog luluwal la yael Deus, le panger yarmat ngo rebe bulong luwul haradiya la yael irel Jesus Kristus. Iwe ngo Paulus ye wol chepar le towe pangal yad ngo Jews rebe tagul tang Jesus. Yela wol mirilloh ngo Paulus yesa tefa mala halongol wululul mele rebe mel Kristiano iyang, le palengel chog ila kaptal yar be hachangir yarmat. Iwe ngo yesa hamdefa igegel yach be yengang ngal Deus, mo igegel yar Kristiano yengang ngal Aam, mo yar tipingi fengalir, iwe ngo ye wol hamdefa kofal luluwal ka yach irel yach ma gola meka ye bung mo ika ye tabung. Hartal loh mekla ye tefa ila yal habong ngalir yarmat mo yal hapingpinga Deus.
Palepal Meka Yadol Babior Le
Hamadefal mo fael babior le 1:1–17
Palengel fael mele sibe daor iyang 1:8—3:20
Wululul yael Deus hadoragich 3:21—4:25
Molow la ye tefoy irel Kristus 5:1—8:39
Mala Deus ye luluwaley ngal Israel 9:1—11:36
Wegdegel Kristiano 12:1—15:13
Mala haygugul loh Babior le mo yal iy habong llufulyal 15:14—16:27
1
Babior We Yael Paulus Ngalir Kristianol
1 Babior le ila ye budoh mo irel Paulus, we yael Jesus Kristus re hagloy, le iy semal apostel we Deus ye duwley ngo ye fesangu bo yebe foloyu Hapatpat Momay le yalol.
2 Hapatpat Momay le ila Deus ye faesul hatugulu muswe mo irer profeta kawe lol, iwe ngo ye wol teftaf lal Babior we ye Santus. 3 Mele ila kofal molwe Lol we iy yach Samol Jesus Kristus: irel kofal yal la sub bo yarmat ngo ye subdoh mo irel da owe yael David; 4 Iwe ngo irel kofal yal santus, ila ye hallehaloh mala kkamalol le ye tagiyet le iy Lol Deus irel yal la molow tefael mo irel maes. 5 Bo fael iy mele Deus yesa fang kkeley bo ibe mel bo semal apostel, bo yagili Kristus, bo hare ibe palir yarmat mo wol pangal fuluy bo yebe tugul lal deper ngo re talenga yalol. 6 Hami mwo rechoka ha mel wol Roma ngo choluwar, hami rechoka Deus yesa ffesangugmi bo habe mel bo yusuwel Jesus Kristus.
7 Ila fael yai teftaf babior ngalugmi pangmi ikla ha mel wol Roma, le Deus ye hachangugmi, ngo ye ffesangugmi bo hami spegil lol:
Deus le Temach mo Jesus Kristus le samol rebe fang ngalugmi haradiya mo hopos.
Mepelel Hachigchig
8 Metamol ngo ibe kangalu yai Deus yal hachigchig fael idel Jesus Kristus bo yaglugmi bo yesa pangal loh ballel faileng le, ngo resa rongrong kofal yami tugulul ladep. 9 Deus mele yai tugul le ye katos meka isosor. Ila Deus la lochochol depey bo ibe yengang ngali le ibe foloyu Hapatpat Momay we kofal molwe Lol. Deus ye gola le ngang ima luluwalehmiloh chog 10 pangal yad le ibe mapel. Idodongor bo hare luwul momayel yael Deus hagiyeg, ngo yebe yoh le ibe buyoy tefael mo iremi igla. 11 Bo ye kkel yai dipli le ibe wurugmi bo hare ibe fang ngalugmi tot haradiya bo yebe hakkelahmi. 12 Fael mele isosor ila sibe tipingi fengali gich le yai tugul yebe hakkelahmi ngo yami tugul yebe hakkelayey.
13 Habe luluwaley mele, rewol bisiy: yesa cholop yai luluwaley bo ibe buyoy tefael mo iremi, iwe ngo yete ma mmal loh le ibe buyoy. Idipli le ibe wegweg deper yarmat mo luwulumi, le yebe wochog molwe isa hamoal foru mo luwullur Gentiles kowe sibis. 14 Bo ye kkel yai metpengag irer panger yarmat, lea rechoka resa yepsach mo ika re ted yepsach, iwe mo rechoka yesa yor yar skun mo ika tor. 15 Ila fal le ye cchang depey le ibe wol foloyu Hapatpat Momay le ngalugmi ika ha memel woal Roma.
Kkamelal Ebangelium We
16 Ye halongol luglug lal depey irel Ebangelium le; iye mele kkamelal Deus le yebe hadorar panger rechoka ye tugul lal deper, le metamol ngo Jews iwe ngo sa moch Gentiles. 17 Bo Ebangelium le ila ye kawraloh sangsengal yael Deus hafler yarmat bo rebe fel mo irel: Le mala chapil dah chog yee, yela hola mala haygugul loh, ngo pangal meka ngo ye chap chog mo irel tugulul ladep. Bo babior we ye santus ye sor bo, “Semal le yebe fel mo irel Deus irel tugulul ladep ila yebe molow.”
Molfidir Retalop
18 Ila yesa llahloh ssong la yael Deus le ye bidiy mo woal laeng irel molfid mo tayikof ka yar yarmat, le iy tayikof kala yar yesa pilta mala ye katos bo yarmat rede gola. 19 Deus ye fang yar hagerger bo fael mala mekla rebe gola mo irel kofael Deus ila resa faesul medaf iyang bo Deus mele ye spegil haffado ngalir. 20 Yodwe chog Deus ye foru talop le ngo mekla kofal le site ma wiri, le ila mala kkelal le tor siyal mo mala kkamelal le iy mele Deus, ila sa halongol ffod mo irer yarmat irel pangal meka iy Deus ye foru. Ila towe yoh le rebe sor bo re togla irel mekla rela foru. 21 Ila mwo re gola Deus ngo ir rete hasrowu ngo rete kangalu yal hachigchig. Resa far tagul resa luluwaley mekla tor pelal ngo yesa ruchupungloh lal mekla chemer. 22 Re buch ngo re sor bo re repiy; 23 Rete hasrowu Deus la ye mel le tor siyal, bo re far hasrowu liyos kala yarmat re foru be igegilir yarmat, hare mael yeyal, hare mael wolfulu, hare mael ka yema mel wolfulu ngo ye wol ma mel leted.
24 Bo fael mala re buch yarmat mele Deus yesa tahcher bo rebe foru mekla ye tayikof le re dipli, iwe resa tagul resa rol foru fengali mekla ye hemama. 25 Rete chepar irel mala kofal Deus le ye katos, ngo resa far dabey ila ye kachepar. Resa hasrowu ngo re yengang ngal meka foruyel Deus ngo rete hasrowu iy Deus, le iy mele sibe hapingpinga pangal yodol! Amen.
26 Fael mala yarmat re foforu meka mele Deus yesa tahcher long luwul depel maltemay kala yar le ye hemama. Fefel mwo ngo sa ir fengal chog yar foru maltemay, ngo rete dabey mala faesul igegal. 27 Yesa wol ila senger mal bo re tayma masor ngalir fefel bo re sema masor ngalir chog mal; resa foru fengali chog uwor meka ye hemama. Ila fal le Deus yesa hagerer le fael mekla re foforu le ye tayikof.
28 Bo fael mala yarmat re temechal taelenga mala kofael Deus le ye katos, mele iy Deus yesa tahcher long luwul luluwal kala ye tayikof bo rebe foru mekla medalbo ir re towe foru. 29 Resa ssogol pangal metmetal tayikof mo wegdegel moniyan mo chehaw, iwe ngo rema foforu fengali meka ye tayikof. Re loltemay ngo rema lilimesloh yarmat, ngo rema fedeg, ngo rema kachepar, ngo rema luluwaley meka ye tayikof ngalir yarmat. Rema lungur yarmat, 30 ngo re hapatpat tayikofloh irel semal mo semal yarmat; ngo re hafobdiri Deus; ngo ma ir chog yar hassonga fengalir ngo re hattodah ngo re hattamol. Rema luluwaley chog bo rebe foru meka ye tayikof; ngo retema taelenga yalol wulutugur. 31 Re tema luluwal ngo retema dabey mekla resa hatugulu. Ye tayikof yar hagiyeg ngalir yarmat ngo retema fahor yarmat. 32 Re gola le hatobtob we yael Deus ye sor le rechoka iye senger ila ye momay le rebe mes. Iwe ngo te mala chog ir rema foru meka, bo re wol ma cchehas irer rechokla rema wol foru meka.