Iesu Keriso Hari Manoḡa Lukaꞌa Mirihiro
1
Lukaꞌa Vaze Boro Teofirasi veize Buka Mirihiro
1-2 Vaze boro Teofirasi, eḡe Luka, ḡae veize buka ꞌadi miriheꞌohe. Iesuꞌa gauḡa ḡadaheniroteꞌanoꞌo onamo aneꞌa runeonoꞌo bare iḡuniroteꞌe zamaḡano, emeḡe boꞌaḡano Iesuꞌa haḡainuteꞌe horoniroteꞌe azaḡaꞌe radiunu. Zeꞌe Iesu hari zu ani ihore moneo vaze meꞌodiroteꞌe tuḡure azaḡa, ebu ze emeḡe zuni ihofiro. Vesu vaze ḡehaḡaniꞌa zu tuḡure azaḡa meꞌodiroteꞌe idunaḡano Iesu hari moneo mirihiro. 3 Eḡeꞌa zuni eꞌe hariḡa niduꞌaꞌe ḡadaheḡanonoꞌo onao izidi faifaine udahiro. Ebu eḡeꞌa ḡae veize hari ꞌadi faine doḡoꞌani ti miriho ḡaneꞌetaꞌaꞌe manoḡa rae zamariro, 4 mazaḡa ibite vazeꞌa ḡae ihoꞌiroteꞌe hariḡaꞌe hari huga rae ḡaeꞌa ederifine.
Ioane Babatisoꞌa Fureraꞌuma Hariḡa
5 Heroda ani Iudea habaꞌa kiniḡa reiroteꞌe madaḡano, Badiꞌa dibuꞌo hauꞌeteꞌe vazeḡa ꞌahoga niḡa Zakariaꞌa radiunu. Aniꞌe Abia urabo vazeḡa ꞌahoga ebu Abia rae raꞌetaꞌaꞌe Badiꞌa dibuꞌo hauꞌeteꞌe azaḡa urabo ꞌahoḡa. Ani ebu inuga niḡa Elisabetaꞌe Arona* Aronaꞌe Mose negoḡa ebu Badiꞌa dibuo hauꞌdoteꞌe vazeḡa mariga azaḡa. 6 Zakaria zu Elisabetaꞌe Badiꞌa goro ḡoeꞌa haḡaiḡa niduꞌa faifaine haḡaido zu mene veꞌonido. Eꞌanoꞌo zeꞌe Badiꞌa zamao duduḡa rae reiro. 7 Rehano ze ubudeze oꞌoꞌa, mazaḡa Elisabeta aniꞌe gabani zuni anianineꞌe ufeta vouriro.
8 Mada ꞌahogano Abia urabo azaḡaniꞌa gauꞌeteꞌe madaḡa meiro. Eꞌanoꞌo Zakaria ani zuni kuru neḡano ane urabo azaḡa teite Badiꞌa dibuꞌo hauꞌeteꞌe gauḡa haḡainu. 9 ꞌOugirotene zeꞌe zeḡe haḡai idunaḡano, kuru neḡano diuḡadu uvahu hohoḡa hufiteꞌe vazeḡa vaḡiro. Ebu eꞌe veize kaḡusi arahoḡa haḡairotene, Zakaria meiro. 10 Ebu Zakariaꞌa uvahu hohoḡa hufiꞌeteꞌe habaꞌa zamaḡa diuḡiro zu vaze ḡuḡuvaḡaꞌe kuru neḡa enoneo kurau radiunu.
11 Eꞌe zamaḡano Zuhiꞌa Boro tuḡure vigaꞌa* Zakaria mazao fureraro. Aniꞌe uvahu hohoḡa hufiꞌeteꞌe fataḡa edaꞌe moneo edaro. 12 Ebu Zakariaꞌa eꞌe horonirotene, viga deꞌoniro zu rihau rudaro. 13 Rehano tuḡure vigaꞌa niro, raenaꞌa, “Zakaria! Ago rihanoꞌi! Badiꞌaꞌa ḡae kuru igiro, eꞌanoꞌo ḡa inugo Elisabetaꞌe ubugo ꞌahoga fureniꞌuma. Ebu niḡaꞌe Ioane rae turahoꞌi! 14 Ḡaꞌe ani uꞌano matuꞌe rudaꞌuma, ebu vaze ḡehaḡa zuni aneꞌa fureranateꞌe moneo matuꞌiꞌuma. 15 Mazaḡa aniꞌe Zuhiꞌa Boro zamao niḡa boro reꞌuma. Ebu vaini vuḡa zu vu sauꞌa mene gagiꞌuma. Zu viꞌa isi zamaḡanonoꞌo Vine Zaḡoḡaniꞌa ani ibito haꞌuma. 16 Aniꞌe Isaraela azaḡa ḡehaḡa sauꞌazeonoꞌo mae ḡihuzadu Zuhiꞌa Boro zeḡe Badiꞌa vaḡe tutuze onaiꞌuma. 17 Ani viga zu gigiꞌaḡaꞌe peroveta vazeḡa Elia teigiꞌuma. Aniꞌe Zuhiꞌa Boro izema onaogano onaiꞌuma. Ebu Moga zu ubuḡa zamaze mae tibuzifine danaziꞌuma. Zu Badiꞌa mene hegoteꞌeteꞌe azaḡaꞌe duduḡa azaḡa horozadu Badiꞌa hegotifine tutuziꞌuma, ebu vazeꞌa Zuhiꞌa Boro veize ruhibifine ihoziꞌuma.”
18 Zakariaꞌa tuḡure viga niro, raenaꞌa, “E voureha ebu eḡe roḡae zuni voureha. Ḡae ḡoereꞌa fureraꞌumaꞌe, e nougenouge ederiꞌuma?” 19 Ebu tuḡure vigaꞌa naenaeninaꞌa, “Eꞌe Gabiriera. Eꞌe Badiꞌa zamao edauꞌenaꞌa, tuḡure igiꞌeteꞌe aneruḡa. Badiꞌaꞌa ḡae hari manoḡa ꞌadi ḡouga radu eḡe tuḡuheha. 20 Ḡianoꞌi! Madaḡaniꞌa onaine, eḡeꞌa rateꞌe ḡoeꞌa huganiꞌa fureraꞌuma. Mazaḡa ḡaꞌe eḡe ḡoere mene mae ḡihinateꞌe uꞌano, ḡaꞌe ḡoeroga mene idaraꞌuma, onamo ḡae ubugoꞌa fureraꞌuma.”
21 U vaze ḡuḡuvaḡaꞌe enonao Zakaria guhiniꞌenaꞌa, ani nougadu kuru neḡa zamaḡano faḡahune radiuꞌohe rae zamarinu. 22 Ebu Zakaria kuru neḡanonoꞌo buarotene, ani ze ḡorezoga mene idararo. Ani ꞌevore hina daꞌo ḡorezido, zu hebeꞌaꞌe adudaro. Eꞌanoꞌo zeꞌe aniꞌa kuru neḡa zamaḡano iḡunu teiḡe horoniroteꞌe ederiro. 23 Ebu Zakaria kuru neḡano Badiꞌa mazao gaueꞌeteꞌe madaḡa hauḡirotene, Ierusalema habaꞌa modadu neḡa onamiro.
24 Eꞌe enogano ani inuga Elisabetaꞌe ene tiro, ebu bato fuꞌo ani neo radiunu. 25 Ani raenaꞌa, “Zuhiꞌa Boroꞌa danahadu e ene teha! Ene mene meiroteꞌe mazagaroḡa izidi Zuhiꞌa Boroꞌa mae vaḡineha!”
Iesuꞌa Fureraꞌuma Hariḡa
26 Elisabetaꞌa ene tiroteꞌe enogano bato 6 radirotene, Badiꞌaꞌa tuḡure viga Gabiriera Galilea habaꞌa Nazareta neḡano Maria vaḡe ovoe tuḡuniro. 27 Mariaꞌe ohoze teite ize mene baziroteꞌe nogobaḡa. Aniꞌe Davida mariga vazeḡa ꞌahoga niḡa Iosefa teite iraꞌauniro. 28 Gabirieraꞌa Maria vaḡe onairotene, ani niro, raenaꞌa, “Badiꞌaꞌa manoḡa ḡanateꞌe roḡaeḡa! Matuꞌoꞌi! Zuhiꞌa Boroꞌe ḡae teite radiuꞌohe.” 29 Maria ani eꞌe igirotene, zaguzagaro zu adaꞌadaniro, ebu 'Ḡoere ꞌadi hugaꞌe nagini?' rae zamarinu. 30 Ebu tuḡure vigaꞌa ninaꞌa, “Maria! Ago rihanoꞌi! Mazaḡa Badiꞌaꞌe ḡae mazao matuꞌeꞌohe. 31 Ḡianoꞌi! Ḡaꞌe ene teꞌadu ubugo ꞌahoga fureniꞌuma ebu niḡaꞌe Iesu rae turahiꞌuma. 32 Aniꞌe niḡa boro reꞌuma ebu vazeꞌa aniꞌe Badiꞌa ḡihiꞌa ubuga rae reꞌuma. Ebu ane vouḡa kini Davida teige, Zuhiꞌa Boro Badiꞌaꞌa aniꞌe kini rae reꞌuma. 33 Aniꞌa Isaraela azaḡa† Giriki, Iakobo neḡa kiniḡa tugutuguḡa re onamiꞌuma, zu ibito ziniꞌeteꞌe mene hauḡiꞌuma.” 34 Ebu Mariaꞌa tuḡure viga ninaꞌa, “Eꞌe ohoze teite bazoga ize aḡuꞌa. Nougenouge uguḡaniꞌa fureraꞌuma?” 35 Ebu tuḡure vigaꞌa naenaeninaꞌa, “Vine Zaḡoḡaniꞌa ḡae vaḡe ovaiꞌuma, zu Badiꞌa ḡihiꞌa gigiꞌaꞌe ḡae zauha ḡadiꞌuma. Eꞌanoꞌo fureraꞌuma tahiꞌaḡaꞌe zaḡoḡa reꞌuma zuni Badiꞌa ubuga rae huniꞌuma. 36 Ḡianoꞌi! Ḡa nabugo Elisabeta zuni vouḡa ebu aniꞌe gabani rae huniro. Rehano ene ohozeḡa teadu izidi bato 6 ꞌai maha. 37 Badiꞌaꞌe gau niduꞌa haḡaoga idaḡa!” 38 Ebu Mariaꞌa tuḡure viga ninaꞌa, “Eꞌe Zuhiꞌa Boro tuḡure roḡaeḡa. Ḡaeꞌa rataꞌaꞌe eḡe mazao fureraune manoḡa.” Ebu tuḡure vigaꞌa ani mazaonoꞌo vaḡiniro.
Mariaꞌa Elisabeta Vaḡe Onamiro
39 Eꞌe ḡarugano Maria ani ḡarihe iḡunadu Iudea guniꞌa neḡa ꞌahoga onamiro. 40 Ani feuradu Zakaria ne diuḡiro. Ebu Elisabeta niro, raenaꞌa, “Manoḡahehe?” 41 Elisabetaꞌa Maria ago igirotene, ubugaꞌe isi zamaḡano hagariro, ebu Vine Zaḡoḡaniꞌa Elisabeta mazao iriꞌaviro. 42 Ebu aniꞌa Maria ḡihau ninaꞌa, “Badiꞌaꞌa manohuga ḡaneha. Ḡaeꞌa roḡae niduꞌa vitizoga. Ḡaꞌa fureniteꞌe tahiꞌaḡa zuni Badiꞌaꞌa manohuga haꞌuma. 43 Eḡe Zuhiꞌa Boro viꞌaꞌe eḡe vaḡe onaeha! Badiꞌaꞌa eḡe veize manoḡa boro haḡaeha! 44 Eꞌe ḡa ago egatene, eḡe isi zamaḡano tahiꞌa kobeꞌaꞌe matuꞌeꞌenaꞌa hagareha. 45 Ḡaꞌe Badiꞌa manohuga hideꞌeteꞌe roḡaeḡa, mazaḡa Zuhiꞌa Boroꞌa ḡaniroteꞌe ḡoeꞌa mae ḡihiniro.”
Mariaꞌa Zuhiꞌa Boro Matuꞌo Haro
46 Ebu Mariaꞌa reiro, raenaꞌa,
“Eḡe Zuhiꞌa Boro niguneꞌohe!
47 Ebu zamaheꞌe eḡe sauꞌanonoꞌo ḡaboheꞌeteꞌe Badiꞌaḡa mazao matuꞌe rudauꞌohe,
48 mazaḡa eꞌe tuḡure roḡaeḡa zu nihe zuhuꞌa rehano, Badiꞌaꞌa e mene aḡutaro.
Izidionoꞌo onamo mada niduꞌa, vaze niduꞌaꞌa reꞌuma, raenaꞌa, 'Gaꞌe Badiꞌaꞌa manohuga ḡaneꞌohe!'
49 mazaḡa inaraḡo gigiꞌa Badiꞌaḡaniꞌa gau boro eḡe veize haḡaeha. Ebuni aniꞌe zaḡoḡa!
50 Badiꞌaꞌe ane gubazeꞌeteꞌe azaḡa zu ze mariga niduꞌa vetuḡaziꞌohe.
51 Aniꞌe evoꞌa inaraḡa hina gau gigiꞌaḡa haḡairo, ebu zeḡe bare mae ḡihizeꞌeteꞌe azaḡa hegoze ḡururuziro.
52 Aniꞌe kini zeḡe ehoro habaꞌanonoꞌo hegoze vaḡiziro, ebu nize mae ovoeꞌeteꞌe azaḡa mae ḡihiziro.
53 Aniꞌa vinizeꞌeteꞌe azaḡa ḡau manoḡa zenadu ze idararo. U maꞌora azaḡaꞌe ꞌevore isoḡa tuḡuze onamiro.
54-55 Badiꞌaꞌa emeḡe vouḡa Aberahamo zu ane mariga veize ḡoitoriro, raenaꞌa, 'E zae izidiꞌonoꞌo mada tuḡutuḡu vetuḡaziꞌeꞌuma.'
Ebu izidi aniꞌa ḡoitoriroteꞌe ḡoeꞌa zamaradu eḡe zu ane Isaraela tuḡure azaḡa danafiro.”
56 Ebu Maria ani Elisabeta teite bato uḡidu radadu bare neḡa onamiro.
Ioane Babatisoꞌa Fureraro
57 Elisabetaꞌa ene maꞌeteꞌe madaḡa meirotene, ani ubuga fureniro. 58 Ebu neḡa azaḡa zu nabuganiꞌa Elisabetaꞌe Badiꞌaꞌa manohuga boro haroteꞌe egadu ze ane teite matuꞌiro. 59 Ebu mada 8 meirotene, ze tahiꞌa ꞌadi ahiꞌa ogaḡa rana iḡuri haḡaeꞌeteꞌe haḡaiḡa‡ Aꞌe Isaraela azaḡa haḡai, Badiꞌa ḡoitoriroteꞌe vazeḡa rae ihozifine. ḡianifine onairo. Zeḡe tahiꞌa ꞌadi niḡaꞌe moga Zakaria ni turahihi reiro. 60 Rehano viꞌaniꞌa ziro, raenaꞌa, “Mene, ani niḡaꞌe Ioane rae turahiꞌuma.” 61 Ebu zeꞌa naenaeninaꞌa, “Ioanehe? Ḡa nabugo boꞌaḡano ni ꞌadiꞌe oꞌoꞌa!” 62 Ebu ze ꞌevore hina moga ḡoreniro. “Ḡaꞌa zamareꞌetene, niḡa iniu rae reꞌuma?” 63 Ebu Zakariaꞌa ire rafaḡa umidadu eꞌe rana mirihiro. 'Niḡaꞌe Ioane reꞌuma.' Zeꞌa eꞌe horonirotene, zeḡe niduꞌa zaguzagaro. 64 Eꞌe madaḡano Zakaria hebeꞌa ꞌai zogone nahanadu ḡoerirotene agoḡaniꞌa buaro, ebu Badiꞌa niguniro! 65 Ne azaḡa niduꞌa naginiꞌa fureraroteꞌe horonadu riharo. Ebu Iudea guniꞌa neḡa azaḡa niduꞌa zuni eꞌe hari niduꞌa igiro. 66 Eꞌe igiroteꞌe azaḡa niduꞌaꞌe ꞌahige zamariro. 'Tahiꞌa ꞌadiꞌe zama moneo vaze nagiḡa reꞌuma?' Mazaḡa Zuhiꞌa Boro ꞌevore gigiꞌaḡaniꞌa hubehune ane mazao radiunu.
Zakariaꞌa Badiꞌa Niguniro
67 Eꞌe enoḡano Vine Zaḡoḡaniꞌa Ioane moga Zakaria zamao irivaꞌiro, ebu aniꞌa Badiꞌaꞌonoꞌo ḡoere reiro, raenaꞌa,
68 “Zuhiꞌa Boro Isaraela azaḡa Badiꞌa mazao matuꞌo hanoꞌi! Mazaḡa aniꞌe Isaraela azaḡa vaḡe onadu danaziro, ebu agire azaḡa evoraꞌonoꞌo mae vaḡiziro.
69-70 Aꞌe ibite Badiꞌaꞌa ane peroveta zaḡoḡa azaḡa hebeonoꞌo reiroteꞌe ḡoeꞌaniꞌa hudaro. Badiꞌaꞌe emeḡe sauꞌaonoꞌo ḡabofifine, ane tuḡure vazeḡa Davida marigaꞌonoꞌo Keriso tuḡuniro.
71 Kerisoꞌe emeḡe agire azaḡa mazaonoꞌo ḡabofiꞌuma, ebu emeḡe heꞌeheꞌefeꞌeteꞌe azaḡa evoraꞌonoꞌo mae vaḡifiꞌuma.
72 Badiꞌaꞌe vouḡafe vetuḡaziro, ebu zeḡe teite ḡoitoriroteꞌe ḡoeꞌa zamariro,
73 aꞌe vouḡafe Aberahamo mazao ḡoitoriroteꞌe ḡoeꞌa.
74 Badiꞌaꞌe emeḡe agire azaḡa evoraꞌonoꞌo mae vaḡifiꞌuma, eꞌanoꞌo emeḡe mene rihauꞌenaꞌa, ane gau haḡaiꞌuma.
75 Ebu emeḡe ḡabone zamaḡano, zamafe niduꞌa Badiꞌa hanadu ane zamao haḡai duduḡa daꞌo haḡaeꞌenaꞌa, gauḡa haḡaiꞌuma.”
76 Ebu Zakariaꞌa ubuga ninaꞌa,
“Ioane ubude, ḡaꞌe Hitagahune Badiꞌaḡa veize gauꞌeteꞌe peroveta vazeḡa rae huḡadiꞌuma, mazaḡa ḡaꞌe Zuhiꞌa Boro ibi ruhiboga veize ane zamao onamiꞌuma.
77 Ebu vaze haḡai sauꞌaꞌonoꞌo ḡabone ziniꞌeteꞌe ibiḡa Isaraela azaḡa ihoziꞌuma.
78 Badiꞌaꞌa emeḡe vetuḡafi rufeꞌeteꞌe uꞌano, emeḡe ḡabofoga veize Keriso tuḡuniꞌuma. Madaꞌa iḡunadu hitanaꞌonoꞌo emeḡe rana agaḡaniꞌa hiauꞌeteꞌe teige, Kerisoꞌa onaiꞌuma.
79 Ebu Kerisoꞌa uzabo zu rune zamaḡano radiuꞌeteꞌe agaḡa ziniꞌuma, ebu uniho manoḡa ibiḡano ibitofiꞌuma.”
80 Eꞌe enoḡano Ioane ꞌai bororaro, ebu vine moneo inariro. Ani haba bohaꞌano radiudo, onamo Isaraela azaḡa mazao feure haraminu.