1 Vuꞌun Pabloun, ilocꞌ iꞌayan ta yoꞌnton stuc ti Dios ti jech jcholcꞌopune, ti jech tacbilun yuꞌun ti Jesucristoe. Ta jtsꞌibaboxuc talel ti jcarta liꞌe ta atojolic voꞌoxuc ti yuꞌunoxuc xa ti Diose, ti achꞌunojic ti Cristo Jesuse, ti nacaloxuc ta jteclum Efesoe. 2 Ichꞌic sbendición ti Jtotic Diose schiꞌuc ti Cajvaltic Jesucristoe. Acꞌo yacꞌboxuc jun avoꞌntonic.

3 Laꞌ jlequil-cꞌopontic ti Diose, ti jaꞌ Stot ti Cajvaltic Jesucristoe. Yuꞌun laj xa yacꞌbotic ti ep ta tos chꞌul bendición ti oy ta vinajel ta sventa ti jech junotic schiꞌuc ti Cristoe. 4 Cꞌalal muꞌyuc to ox meltsajem ti banomile, tꞌujbilotic xa onoꞌox yuꞌun ti Dios ta sventa ti Cristoe, yoꞌ jech muꞌyuc jmultic ta xijcꞌot ta stojol. 5 Ta sventa scꞌuxul yoꞌnton ti Diose, voꞌne xa onoꞌox chapanbil jcꞌoplaltic ti ta xijcꞌot ta snichꞌnab stuc ta sventa ti Jesucristoe jech chac cꞌu chaꞌal snopoj onoꞌox ta yoꞌntone. 6 Jech o xal un, laꞌ jlequil-cꞌopontic ti Diose ti mu noꞌox albajuc ti yutsilal yoꞌntone, ti laj yacꞌbotic ti schꞌul bendición ti jech oyotic ta stojol ti scꞌuxubinbil Nichꞌone. 7 Ti jech echꞌem scꞌuxul yoꞌnton ti Diose, jech o xal laj scoltaotic ta sventa ti icham ti Snichꞌone, yoꞌ jech ta jtatic perdón yuꞌun ti jmultique. 8 Ti Diose laj xa yacꞌ quiltic ti mu noꞌox albajuc ti scꞌuxul yoꞌntone. 9 Yuꞌun laj yacꞌ jbijiltic ta snaꞌel ti cꞌusi mucul to ox yuꞌune, ti jaꞌ stuc laj svaꞌan sba ta spasel ti cꞌusi ta scꞌane. 10 Ati vaꞌi sꞌelan ta spas ti Diose, jaꞌ ti oy bu jun cꞌacꞌal ti snopoj onoꞌox ti Diose ti ta xcꞌotic ta jun ta sventa Cristoe, scotol ti cꞌusitic oy ta vinajele schiꞌuc ti cꞌusitic oy ta banomile.

11 Ti jech lijpasotic ta jun schiꞌuc ti Cristoe, voꞌne xa onoꞌox tꞌujbilotic yuꞌun ti Diose, yoꞌ jech ta xquichꞌtic ti jrextomentotic ti albil scꞌoplal ta xaqꞌue. Ti jech taje, jaꞌ coꞌol schiꞌuc jech chac cꞌu chaꞌal ti oy onoꞌox ta yoꞌnton ti Dios ti ta spas ti cꞌu sꞌelan lec ta xil ti stuque. 12 Jaꞌ jech laj spas ti Dios ta jtojoltique, yoꞌ jech ta sta ti ichꞌbil ta mucꞌ ta xcꞌot ti smucꞌul stsatsal cuꞌuncutic ti jꞌisraeluncutique, jaꞌ ti baꞌyel laj jpat coꞌntoncutic ta stojol ti Cristoe. 13 Jaꞌ jech ti voꞌoxuc jyanlumoxuque laj achꞌunic ti cꞌalal laj avichꞌic albel ti ta xcoltavan ti Cristoe. Jech lapasic ta jun schiꞌuc ti Cristoe. Yoꞌ jech ta xvinaj ti yuꞌunoxuc ti Diose, laj yacꞌboxuc avichꞌic aselloalic, jaꞌ ti Chꞌul Espíritue, ti albil onoꞌox scꞌoplal ta xaqꞌue. 14 Ti Chꞌul Espíritu ti laj quichꞌtique, jaꞌ svinajeb ti ta xquichꞌtic ti jrextomentotic ti yaloj onoꞌox ti Dios ti ta xaqꞌue. Jaꞌ to ta xquichꞌtic cꞌalal mi laj staic ti slecubtaselic scotol ti yuꞌuntaque, yoꞌ jech ichꞌbil ta mucꞌ ta xcꞌot smucꞌul stsatsal ti Diose.

15 Jech o xal ti cꞌalal laj caꞌi ti achꞌunojic ti Cajvaltic Jesuse, ti cꞌux ta xavaꞌiic scotol ti buchꞌutic yuꞌuntac ti Diose, 16 mu xquicta jba ta yalbel vocol ti Dios ta atojolique. Yuꞌun tey onoꞌox oyoxuc ta coꞌnton cꞌalal ta jcꞌopon ti Diose. 17 Cꞌalal ta jcꞌopon ti Dios yuꞌun ti Cajvaltic Jesucristoe, ti Dios ti oy yutsilale, ta jcꞌanbe ti acꞌo xayacꞌboxuc abijilic yoꞌ jech ta xavaꞌiic lec ta avoꞌntonic stalel ti Diose. 18 Ta jcꞌanbe ti Diose ti acꞌo sjamboxuc ti snopobil avuꞌunique, yoꞌ jech ta xavaꞌiic lec cꞌusi ti spatobil avoꞌntonic ti jech laꞌicꞌatique, yoꞌ jech xtoc ta xavaꞌiic lec ta avoꞌntonic ti mu noꞌox albajuc yutsilal slequilal ti rextomento ti ta xacꞌbe ti buchꞌu yuꞌuntaque. 19 Jaꞌ jech xtoc ta jcꞌanbe ti Diose ti acꞌo avaꞌiic lec ta avoꞌntonic ti mu bisbiluc smucꞌul stsatsal ti Diose ti jaꞌ ta xꞌabtej ta jtojoltic ti jech jchꞌunojtique. 20 Ti smucꞌul stsatsal ti Dios taje, jaꞌ onoꞌox ti smucꞌul stsatsal ti laj yacꞌ iluc cꞌalal laj xchaꞌcuxes ti Jesucristoe, yoꞌ tey laj yacꞌ chotluc ta sbatsꞌi cꞌob ti ta vinajele. 21 Jech o xal un, ti Cristoe iꞌacꞌbat sbain scotol ti ángeletic ti tey ta vinajele, ti yichꞌoj yabtelique, ti tsots xuꞌ yuꞌunique, ti jpas mantaletique. Jaꞌ jech xtoc iꞌacꞌbat sbain scotol ti ajvaliletic liꞌ ta sba banomile schiꞌuc cꞌusiuc noꞌox ta xtale. 22 Scotol ti cꞌusitic oye iꞌacꞌbat ta yoc ta scꞌob ti Cristoe. Jaꞌ jech xtoc iꞌacꞌbat sbain ti jchꞌunolajeletique. Jaꞌ iꞌoch ta banquilal Ajvalil yuꞌunic. 23 Yuꞌun scotol ti jchꞌunolajeletique jaꞌ sbecꞌtal ti Cristoe. Yuꞌun yichꞌojbe stalel scuxlej stuc ti Cristoe. Scotol ti cꞌusitic oye jaꞌ yuꞌun ti Cristoe.