22 Beꞌro Israe curuacjãrã Gedeṍrẽ aꞌtiro nicãrã niwã:

—Mʉꞌʉ ʉ̃sãrẽ madianita masã doca níꞌcãrãrẽ yʉꞌrʉowʉ. Tojo weegʉ ʉ̃sã wiogʉ sãjãña. Mʉꞌʉ põꞌrã, mʉꞌʉ pãrãmerã mʉꞌʉ beꞌro dutisirutuato, nicãrã nimiwã.

23 Gedeṍ peꞌe narẽ yʉꞌticʉ niwĩ:

—Niweꞌe. Yʉꞌʉ, tojo nicã yʉꞌʉ macʉ̃ mʉsã wiogʉ nisome. Õꞌacʉ̃ peꞌe mʉsã wiogʉ nigʉ̃sami, nicʉ niwĩ. 24 Narẽ aꞌtiro ninemocʉ niwĩ:

—Aꞌtiro peꞌe sẽrĩꞌi. Mʉsãnʉcʉ̃ mʉsã madianita masãrẽ ẽꞌmaꞌquere omopica tuusãase beꞌtorire oꞌoya, nicʉ niwĩ. Titare ismaelita masã* 8.24 Ĩꞌaña Gn 37.25-28 docapʉ ojaꞌquere. yucʉ marĩrõcjãrã na omopica tuusãase beꞌtorire uru meꞌrã weecãrã niwã. 25 Na “Jaʉ, mʉꞌʉrẽ eꞌcatise meꞌrã oꞌorãti”, nicãrã niwã. Tojo níca beꞌro niꞌcã suꞌticasero nucũcãpʉ sẽeocũu, na suraranʉcʉ̃ omopica tuusãase beꞌtori na bocaꞌquere ti casero buꞌipʉ peocãrã niwã.

27 Te uru meꞌrã Gedeṍ niꞌcãrõ camisa, omocãrĩ marĩrõ weecʉ niwĩ. To camisare cʉ̃ ya macã Ofrapʉ cũucʉ niwĩ. Beꞌro nipeꞌtirã Israe curuacjãrã Õꞌacʉ̃rẽ ẽjõpeoronojõ oꞌorã, to camisa peꞌere ẽjõpeocãrã niwã. Tojo weerã Gedeṍ, tojo nicã cʉ̃ acawererã ñaꞌarõ yapaticãrã niwã.

28 Tojo weese meꞌrã Israe curuacjãrã madianita masãrẽ docaqueꞌacã weecãrã niwã. Na ne apaturi tutuarã waꞌanemoticãrã niwã majã. Tojo weerã Gedeṍ catiri curare cuarenta cʉ̃ꞌmarĩ Israe curuacjãrã soose meꞌrã nicãrã niwã.

29 Madianita masãrẽ docaqueꞌacã wééca beꞌro Gedeṍ, “Jerubaal” na ninoꞌgʉ̃, cʉ̃ ya macãpʉ nisetigʉ waꞌacʉ niwĩ. 30 Cʉ̃ pãjãrã nʉmosãnumia cʉoyugʉ, setenta ʉmʉa põꞌrãticʉ niwĩ. 31 Apego Siquẽcjõ, cʉ̃ cʉoꞌco, cʉ̃ nʉmo nitigo meꞌrã, niꞌcʉ̃ põꞌrãticʉ niwĩ. Cʉ̃rẽ Abimelec wãme õꞌocʉ niwĩ.

32 Gedeṍ bʉcʉ ẽjãyʉꞌrʉgʉ, wẽrĩcʉ niwĩ. Cʉ̃ pacʉ Joáre yááca tutipʉ cʉ̃rẽ sĩosõrõcũuocãrã niwã. Ti tuti Ofra, Abiézer ya curua ya macãpʉ nicaro niwʉ̃.

33 Gedeṍ wẽ́rĩ́ca beꞌro maata Israe curuacjãrã apaturi Õꞌacʉ̃rẽ ẽjõpeoduꞌu, Baal peꞌere ẽjõpeocãrã niwã tja. Niꞌcʉ̃ Baal-berit wãmetigʉre ẽjõpeocãrã niwã. 34 Õꞌacʉ̃ nipeꞌtirã Israe curuacjãrãrẽ ĩꞌatuꞌtiꞌcãrãrẽ docaqueꞌacã weecʉ niwĩ. Tojo weemicã, Õꞌacʉ̃ na wiogʉ níꞌcʉre acoboja waꞌacãrã niwã. 35 Tojo nicã, Gedeṍ, Jerubaal na ninoꞌgʉ̃, Israe curuacjãrãrẽ peje añuse weemicã, na peꞌe cʉ̃ acawererãrẽ añurõ pajañaꞌticãrã niwã.