Id ash d Luke Oꞌohana ab Amjed g Jiosh Alidag
1
Matsh haschu ahgk am ha oꞌohani
1-4 Ni-nawoj map ab si tatchua g Jiosh:
Ab apsh kaiham ihda s-kehg haꞌichu ahga ab amjed g Jiosh alidag mach ab s-wohochud. Kunt am wo haꞌichu m-oꞌohani ab amjed mapt hekaj wo s-ap s-mahchk. Hegam mash am neid o am t-ahgid ab amjed. Kut muꞌi am s-ap oꞌoha hegai mo haschu am t-ahgid. Nt ahni am si i hoa wehs ihda k hekaj am wo m-oꞌohanid k am baꞌich haꞌichu wo m-ahgi ab amjed.
Matsh hema wo i wuhshani k am wo i ha apꞌech g Jiosh hemajkamga
5 Amjed atsh ab i shohshonwua ihda mash eda g Herodbad am d kownal Judea chekshani ch ed am ha dahm g Tutuligo hemajkam. Sh am hema d ha-pahlig ch hab chehgig Zacaria. Sh g wehmaj kihkam hab chehgig Elisabed. Idam ash ab d amjedkamaj hegai mash d ha-shohshonbad g papal ch hab chehgig Aaron. Kush g Zacaria ab hema d amjedkam mash hab chehgig Abia. 6 Kush idam Zacaria ch Elisabed am si oid g s-apꞌekam ch s-ap am hab junihim wehs hegai mo g Jiosh ab ha chehani g Tutuligo. 7 Kutsh wabsh okst ihda Elisabed k pi ha mahmadt. Tsh g Zacaria hab waꞌap kelit.
8 Kutsh hema tash am i e ai matsh g Abiabad amjedkam am hab wo juh g e-chikpan geꞌe cheopi ch ed. 9 Kumtsh am i kei g Zacaria matsh am wo ha mehmhei g s-ap uhw kuhbhondakud. Tsh am i wah cheopi ch ed. 10 Kush am jeg ed gegok g hemajkam ch e hoꞌigeꞌidahun.
11 Tsh am cheopi ch ed hema i e chehgi g anghil Zacaria tahgio k ash ab kehk s-apkojed abai mash ab kuhbhoni g s-ap uhw kuhbhondakud. 12 Tsh am i nei g Zacaria k si e todsid k si s-ehbeni ihda.
13 Kush wabshaba hab kaij g anghil, “Pi g am shaꞌi e todsid, Zacaria. Jiosh at kah g m-hoꞌigeꞌidahuna. T g m-wehm kihkam wo wa hema madt. T d wo cheojk. Kupt hab wo chehch John. 14-15 Jiosh at ab a wo si has elidad. Kut pi koi wo mahsi. T g Jiosh ab wo mah g Hekia S-apꞌekam Gewkdag. Kupt heg hekaj wo si s-hehgigk. T g muꞌi hemajkam hab waꞌap wo si s-hehgigk mat hekid wo mahsi. Kut ihda em-aliga pi hekid wo ihꞌed hegai mo s-nawmdag. 16 ch muꞌi ab wo i ha nohnogi g Tutuligo hemajkam ab Jiosh wui. 17 T koi in hu wo i wuhsh g Jiosh si Kehsha jewed dahm. T g em-aliga ia wehpeg wo ahgachugad mat in wo i wuhsh. T g Hekia S-apꞌekam Gewkdag ab wo mah g gewkdag heg wehhejed hab masma mo wa ab mahkch g Elijabad. Kut hab wo ha juh g hemajkam mat ab wo si pihk e elidad ha hekaj g e-aꞌaliga k hegam hab wo ha juh mo d pi apꞌekam mat ab wo kaihamad g ha-amichudadag hegam mo d s-apꞌekam. Neh, bat masma am wo i ha apꞌech g hemajkam heg wehhejed jiwhiadaj g Jiosh si Kehsha.” Neh, bash kaij hegai anghil.
18 Kush g Zacaria hab kaij, “Nt has hig masma wo si s-ap s-mahchk machs wo hema bei g ali natt pi kekelt?”
19 Sh hab kaij g anghil ab wui, “Dani Jiosh chikpandam, Gabriel. Kut ab ni-cheha mant ia wo m-ahgi ihda si s-hehgig haꞌichu ahgaj. 20 Kupt eda pi ab hu ni-wohoch. T heg hekaj hab wo m-juh mapt pi wo shaꞌi e nako maps wo ha neokad iaꞌi amjed am hugkam mat hab wo e juh ihda mani m-ahgid.” Neh, bash kaij hegai anghil.
21 Sh eda heg oidam am chum nenida g hemajkam g Zacaria ch si has i elid k hab kaij, “A t has e juh k pi oi ab hu i wuhsh?”
22 Tsh am hu hebai ab hahawa i wuhshani k chum neo am ha wui k wabsh pi shaꞌi e nako. Sh am ha hekaj wabsh i amich g hemajkam matki ab haꞌichu e chehgi wui no pi ab wabsh i ha magwuid g e-nowikaj ch pi ab hu has shaꞌi kaij.
23 Tsh am wabsh i chum huhug g tash mat heꞌes tash am hab wo juh g e-chikpan. Tsh gam uhpam hih e-kih wui.
24-25 Kush amai i mia amjed matsh woꞌiwua g ali. Kush am wabsh s-ap e tahtk ch am e ehstokch g Elisabed e-kih ed hetasp mashad hab kaijhim, “Chum ani hekid si ni-elid mani pi ha mahmadt. Kutki wabshaba id hab ni-juni g Jiosh k hekaj gam hu hab i juh g si ni-edadag am hemajkam ha-nena ed.”
Matsh wo mahsi g Jiosh alidag ia jewed dahm
26-27 Neh, tsh am him k am d i chuhdp mashad am i dahm matsh am woꞌiwua g Elisabed mad. Tsh g Jiosh am chea hegai anghil mash d Gabriel matsh am wo uꞌapa g haꞌichu ahgaj hema wui g chehia.
Sh hab chehgig ihda chehia Mary ch am kih heg eda kihhim mash d Nazareth ch am eda g Galilee chekshani. Sh am hema ep d kihkam ch hab chehgig Joseph ch atsh wo hohnt hegai Mary. Idam ash ab hema d amjedkam mash kownalibad ch hab chehgig David.
28 Kutsh koi e ai matsh wo e hohont. Tsh am jiwia hegai anghil Mary wui k hab kaij, “Si g s-hehgigk Mary. Jiosh at ab i s-m-hoꞌigeꞌid k am wo i m-wehmt.”
29 Tsh am wabsh i pi amich mas haschu hab ahg k si e kudu heg hekaj.
30 Sh hab ep kaij g anghil, “Pi g am shaꞌi e todsid, Mary. Ab at i m-mah g Jiosh g hoꞌigeꞌidadag. 31 Kut am wabsh wo e nahto g ali m-eda k wo mahsi k d wo cheojk. Kupt hab wo chehch Jesus. 32 Kut d wo si s-has haꞌichuk no pi d alidaj g Jiosh. T g Jiosh am wo i kei mat d wo kownalk am kehkud ed g e-shohshonbad David. 33 Kut chum hekid d wo ha-kownaligk g Jiosh hemajkamga. Pi at hekid wo huhug g kownaltaligaj.” Neh, bash kaij g anghil.
34 Sh hab kaij g Mary ab wui, “Nt has hig masma wo ge madt mani d wabsh kia chehia ch pi koi ha kun?”
35 Sh g anghil ab wui hab kaij, “Jiosh at ab wo cheha g Hekia S-apꞌekam Gewkdag. T heg hab wo juh g Jiosh gewkdagkaj. Mt heg hekaj wo s-mahchk mat d wo si hekia s-apꞌekam alik ch d wo Jiosh alidagk.
36 “Neh, s-mahch ap mat heki hu okst g m-hajuni Elisabed k pi ha mahmadt. Kut eda g Jiosh ab s-hoꞌigeꞌel. Kut g cheoj ali wo bei. K d chuhdp mashad hemu mat am woꞌiwua g ali. 37 Kupt id amjed wo s-mahchk mat wo e nako g Jiosh mat am hab wo juh hegai mo haschu hab e ahgahim.” Neh, bash kaij g anghil.
38 Kush hab hahawa kaij g Mary, “Neh, dani piongaj g Jiosh. K am wa s-apꞌe mat am hab wo juh g e-tatchui ab ni-ab” Tsh gam hahawa hih g anghil ab amjed.
Matsh am i chehgim g e-hajuni g Mary
39-40 Tsh ab ha hekaj i e nako g Mary mat am wo chehgim g Elisabed. Sh hegam Elisabed ch Zacaria am kih mash am hema kihhim kaꞌakwulk ch ed am Judea chekshani ch ed. Tsh am jiwia Mary ha-kih am k ab ha-ihm.
41 Tsh am i kah g Elisabed k ab taht matsh g madaj am si al i banimme eda. Tsh g Hekia S-apꞌekam Gewdag ab si i mah g gewdag. 42 Kush hekaj si s-hehgigam hab kaij ab wui g Mary, “Neh, ab atki si i s-m-hoꞌigeꞌel g Jiosh baꞌiwechkim mo chum hedai uwi. Kutki wo mahsi m-amjed hegai mash ab mahks g si geꞌe s-apꞌekam. 43 Kuptki d wo jeꞌejk hegai mat d wo ge t-kownalig. Kuni si s-ap ni-tahtk mapt iaꞌi ni-chehgim. 44 Neh, am at si i banimme g ni-mad mant am i m-kah mapt ab ni-ihm. K heg hekaj am ni-chehgid g Jiosh mo ab si s-m-hoꞌigeꞌid. 45 Woho at hab wo e juh hegai mo ab m-chehgid g Jiosh. K d si geꞌe hoꞌigeꞌidalig mapt ab i s-wohoch.” Neh, bash kaij g Elisabed.
Matsh g Mary ab i hehgchul g Jiosh
46 Kush g Mary hab kaij:
“Ab ani si hehgchulid g Jiosh
47 ch si s-ap ni-tahtk mo d ni-doꞌibiakam.
48-49 Dani wabsh shoꞌigkam.
Kut eda ab si has i ni-elid k si geꞌe haꞌichu ab hab ni-juni g si geꞌe e-gewkdagkaj.
T Hab iꞌajed chum hekid hab wo chei g hemajkam imhab aꞌahidag oidam mat ab si i s-ni-hoꞌigeꞌel g Jiosh.
Do si hekia s-apꞌekam g Jiosh
50 ch eda iaꞌi aꞌahidag himdam oidch si pihk e elid ab wehs ha wui hegam mo ab si has i elid.
51 T am wo chehgi g si geꞌe e-gewkdag k wo has gewito hegam mo si e hahaschud
52-53 k wo ha wohppoꞌi g kokownal g ha-gewdag k g s-kakais s-ha-kaisdag gam hu hab wo i juh k wabshaba g shoꞌigkam ab has wo i ha elid k heg ab wo i ha mah mo haschu i s-kehgaj ha wehhejed.
54-55 Neh, bash wa am ha ahgid g t-shohshonbad ged hu i Abraham amjed matsh id am hab wo e juh.
Ab o i t-wehmt g Jiosh ahchim mach ab d ha-amjedkam k ab wehs t-wui si pihk e elid iꞌajed chum hekid.”
56 Neh, bash hahawa g Mary ch amjed am ha wehm dakahim waik mashad ab ch gam hahawa hih uhpam.
57 Tsh am hahawa i e ai. Tsh madt g Elisabed. Kush d cheoj ali. 58 Sh g hajunij ch hugidaj an kihkam si s-hehgig wehmaj am i kaiok matsh g Jiosh ab si i s-hoꞌigeꞌel.
59 Kush am d i gigiꞌik tash g ali. Kumtsh wo pahl hikuch mo d ha-himdag. Tsh am e chehm g hemajkam k hab wo chum chehch Zacaria am oidk g ohgaj. 60 Kush wabshaba hab kaij g jeꞌej, “Pi atsh g e-ohg oidk wo chehgigk ch wabshaba hab wo chehgigk John.”
61 Sh hab kaij hegam, “Pi o hedai hab shaꞌi chehgig g m-hajuni,” 62 ch amjed ab wabsh i chum kakke g ohgaj mat am wo ha ahgi mas has wo chehch.
63 Sh heg hema ha tahni g oꞌohanakud. Mtsh hema mah. Kutsh id an oꞌoha, “Bo chehgig John”. Tsh wehsijj si e totods. 64 Kutsh am waꞌi hekaj s-ap neok k ab si ihm g Jiosh ch ab si hoꞌigeꞌid. 65 Tsh wehsijj ab si has el g Jiosh hegam mo an ha wehgaj kih. Tsh gan hu aꞌai s-e mai am Judea chekshani ch ed mat has i e juh. 66 Ab ash si s-hoꞌigeꞌid g Jiosh ihda ali. Kush wehsijj hegam mash am kah am si i oidahim ch hab kaij, “Kus has mahs wo haꞌichuk ihda ali?”
Matsh baꞌich ah g Zacaria matsh haschu has wo e juh
67 Kutsh g Hekia S-apꞌekam Gewkdag g si geꞌe gewkdag ab i mah g Zacaria. Tsh heg am si s-hewelim neok k gam hu baꞌich ah mat haschu has wo e juh hab kaijch:
68 “Ab ant wo si i hehgchul g s-apꞌekam t-kownalig Jiosh.
E o nahtokch mat wo t-doꞌibia ahchim mach d hemajkamgaj
69 ch atsh hekaj am hema wo i maskogi mat d wo t-doꞌibiakamk.
Heg at ab d wo kownal Davidbad amjedkamk ch wo uꞌukch g si geꞌe gewkdag.
70-71 Kekelibad Jiosh haꞌichu i tashogiddam o heki hu am ahgachug matsh g Jiosh wo t-doꞌibia ab ha amjed g t-obga ch hegam mo s-t-kehꞌid.
72 Ab at wo i s-t-hoꞌigeꞌel g Jiosh mash wa hab masma ha ahgid g t-shohshon.
73-74 Bash si kaij ab Abrahambad wui mat wo t-doꞌibia ab ha amjed g t-obga.
Tt hab pi hedai wo ehbidad ch ab si s-ap wo ihmad g Jiosh.
75 ch wo s-apꞌek am nenaj ed ch am hab wo junihid g s-apꞌekam chum hekid.
76-78 Ihda ni-sulijga at d wo Jiosh haꞌichu i tashogiddamk ch wo ha ahgi g Jiosh hemajkamga mat g Jiosh ab wo s-ha hoꞌigeꞌid k gam hu hab wo i juh g pi ap ha-chuꞌijig k wo ha doꞌibia ab amjed g s-koꞌok ha-namkidadag.
Kut heg hekaj wo e nahtokchid mat g doꞌibiakam am wo i e maskogi.
Id at am wo i wuhsh Jiosh t amjed k ab wo t-mah g amichudadag.
79 hab masma mo g tash ab i chechshshaj ch ab t-mamka g tonlig.
Ab ach wa hihim t-namkidadag wui mat g Jiosh gam hu hab wo i t-juh heg hekaj pi ap t-chuꞌijig.
Kut wabshaba g t-doꞌibiakam ab wo i t-chehgi matt has masma am wo i t-apꞌech Jiosh wui.”
Neh bash kaij g Zacaria.
80 Kutsh si s-gegokim i geꞌeda g ali am e tashogid mo am Jiosh tatchui oidch him. Kush am hebai d i himdam, tsh gm hu i e gawulkai tohono jewed ch ed k am haꞌichugkahim ch ab ai mat am i e maskogi Tutuligo ha wui.

© 2010 WBT