10
1 M baꞌabiise, m bood ne m sunf wusa ka sosid Winaꞌam ye m meŋ buudi nye faangir. 2 M miꞌ ka yeli ba yela ye ba dol Winaꞌam ne ba sunf wusa, ka ba dolim la lee pu yi sida miꞌilim nii. 3 Ba ziꞌ suer kane ka Winaꞌam ket ka nidib a popielim dim o tuone, ka bood ba meŋ sueya, ka linzug ba pu noki ba meŋ n lo ne Winaꞌam suere. 4 Kiristo ke ka wada la naae, ka Winaꞌam na ke ka on mekama niŋ o yadda la, na a popielim daan o tuon.
Buudi wusa na tunꞌe nye faangir la yela
5 Moses da sob popielim line yi wada dolim ni la yela, ye, “One siak wada noyelug la na nye nyovur li dolim poogin.” 6 Ka ba da sob popielim line yi yadda niŋir Winaꞌam ni la yela ye, da yeli fu meŋ ye, anoꞌon na du arazana ni? (Li gbin ane ye, anoꞌon na du arazana ni ye o ke ka Kiristo sig na?) 7 Bee, da yeli fu meŋ ye, anoꞌon na sig kpiꞌimnam teŋin? (Li gbin ane ye o keŋ ke ka Kiristo vuꞌug kumin na.) 8 Ka li me sob ye, Winaꞌam pianꞌuk kpiꞌe uf ka be fu noorin ne fu sunfin. Li ane Winaꞌam pianꞌuk yadda niŋir la yela ka lin la ka ti moon. 9 Fu yaꞌa yel ne fu noor paalo ni ye Yesu ane Zugsob la, ka siaki fu sunfin ye Winaꞌam da vuꞌug o kumin, fu na nye faangir. 10 Ti siaki ti sunfin ye Yesu ane Zugsob la, linzug ka ti lieb popielim dim Winaꞌam tuon, ka yeli li ne ti noor, ka linzug ka ti nye faangir. 11 Li sobne Winaꞌam gbauŋin ye, “On mekama niŋ Kiristo yadda la, ku di nyan o zugo.” 12 Gaŋir kaeꞌ Jew dim ne bane kaꞌ Jew dim la nii. Zugsob la ane Jew dim Zugsob, ka me a bane kaꞌ Jew dim la Zugsob, ka pesig o yelsum tis bane wusa sos suŋir o saꞌan. 13 Li sob Winaꞌam gbauŋin ye, “On wusa sos suŋir Zugsob la saꞌan na nye faangir.”
14 Nidib yaꞌa pu niŋ o yaddaa, ba na niŋ wala sos suŋir o saꞌane? Ka ba yaꞌa pu wum labaar o yelaa, ba na niŋ wala niŋ o yadda? Soꞌ yaꞌa kaeꞌ na moon labaar laa, nidib na niŋ wala wumi li? 15 Ka Winaꞌam yaꞌa pu tum bane moon labaar la naa, labaar na niŋ wala moole? Li sob Winaꞌam gbauŋin ye, “Bane moon labasuŋ la ken ne malis bedego.”
16 Ka li kaeꞌ nidib wusa siak labasuŋ laa. Azaya da sob Winaꞌam gbauŋin ye, “Zugsoba, ba biꞌela siaki ti labaar la.” 17 Yadda niŋir yitne labaar la wumug ni, ka Kiristo labaar la yela ket ka nidib wum labaar la.
18 M ye m buꞌosi ya neꞌeŋa ye, ya tenꞌes ye nidib pu wum labaar laa? Sida ba wumya. Li dolne lin da sob Winaꞌam gbauŋin siꞌem la ye,
“Nidib wumi ba kukoya ne ba pianꞌad dunia zinꞌis wusa.”
19 M na lem buꞌosi ya ye, ya tenꞌes ye, Israel dim pu gbanꞌe Moses n sob siꞌel la gbin bee? Sida ba da gbanꞌeya. Moses da yel ye,
“Winaꞌam yel Israel dim ye,
‘M na ke ka ba mor fufum ne nidib bane kaꞌa ba buudi,
ka ke ka ba sunf due ne buudi bane a yalimnam ka pu gbanꞌad yela gbin nee.’ ”
20 Ka Azaya mor sukpiꞌeuŋ ka me yel ye,
“Winaꞌam yel ye,
‘Nimbane pu ied m la, nye m,
ka m paꞌal m meŋ tisi ba.’ ”
21 Ka yel Israel dim yela ye,
“M bood bedego ye m diꞌe ya daar wusa
ka ya lee ane nimponannib
bane pu siakidi m noore.”