1 Farisee dim nid yinni da be, ka o yuꞌur buon Nikodemus. O da ane Jew dim kpeenm. 2 Dau kaŋa da kenn Yesu saꞌan na yuꞌuŋ n yel ye, “Paꞌana, ti miꞌ ye fu ane paꞌan one yi Winaꞌam saꞌan na, bozugo soꞌ ku nyaŋe tum tuum ban ka fu tum nwaa, asee Winaꞌam be on sob ni.”

3 Ka Yesu lebis n yel o ye, “Ameŋa meŋa ka m yet uf ye, li yaꞌa kaꞌ ka ba maligim duꞌa uf yaꞌase, fu ku kpenꞌ Winaꞌam soꞌolim la nii.”

4 Ka Nikodemus buꞌos o ye, “Soꞌ na niŋ wala lem duꞌa nid kane kudug yaꞌase. O na lem tunꞌe kpenꞌ o ma poogin, n lem n duꞌa yaꞌase?”

5 Ka Yesu lebis o ye, “Ameŋa meŋa ka m yet uf ye, nid kane n pu duꞌa ne kuꞌom ne Siiga, o ku nyaŋ kpenꞌ Winaꞌam soꞌolim nii. 6 Bun kane duꞌa ne niŋgbiŋ ane niŋgbiŋ, ka bun kane n duꞌa ne Siig la ane siig. 7 Da ke ka li lidig uf ne man yel ye, li suꞌum ka fu lem duꞌa la zugo. 8 Pebisim daꞌad n kenne lin bood siꞌel, ka fu wum lin vuud la, ka ziꞌ lin yi zinꞌisiꞌa bee lin ken zinꞌisiꞌa. One duꞌa ne Siig me ane ala.”

9 Nikodemus lebis n buꞌos o ye, “Bun kaŋa na niŋ wala maali?”

10 Ka Yesu lebis n buꞌos o ye, “Fu ane Israel kpeenm one paꞌan nidib, ka ziꞌ nwaa? 11 Ameŋa meŋa ka m yet uf ye, ti pianꞌadne tinam miꞌ siꞌel, ka di kaseta n tis tinam n nye siꞌel. Amaa ya pu siaki ti pianꞌad laa. 12 M yaꞌa yeli ya dunia nwa yela, ka ya pu siaki, wala ka m na yeli ya arazana yela, ka ya siaki? 13 Soꞌ nam ziꞌ n du arazana n be anina, asee one yi arazana ni n sig na la, one a Ninsaal Biig la. 14 Wenne Moses n da be moog soogin la, ka zaŋ waaf n zakn agol siꞌem la, ala men ka ba na zank Ninsaal Biig la. 15 Ka one niŋ o yadda na nye nyovur dine ka naare.”

16 Winaꞌam noŋ dunia hale ka o tum o biyimir la n tis na. Ka one niŋ o yadda la, ku bodige, amaa o na nye nyovur dine kaꞌ naare. 17 Ala zug Winaꞌam pu tum o Biig dunia ni na ye o koos dunia dim beꞌede, amaa ye dunia nye faangir o maꞌasim zug. 18 Ka one niŋ o yadda la, ba ku koos o beꞌede. Amaa one pu niŋ o yadda la, Winaꞌam pun koos o ne beꞌed, on pu niŋ Winaꞌam biyimir yadda la zug. 19 Ka antuꞌa kaŋa nwa yet ye, one ke ka dunia a nyain la kena, ka nidib bood lik n gaad o, ba tuumbeꞌed la zug. 20 On mekama tum tuumbeꞌed kis ne neesim la belim ka pu kenne li nii, o tuuma la na ti nie yela. 21 Amaa on mekama tum line a ameŋa la, kene neesim la ni na, ye o tuumsuma nie ka nidib baŋ ye li ane Winaꞌam tuuma.

22 Neꞌeŋa nyaꞌaŋ ka Yesu ne o nyaꞌandolib la keŋ Juuda teŋin ka kpelimi anina ka su nidib kuꞌom. 23 Ka Joon me da be Aenon teŋin line kpiꞌe Salim teŋin n suud nidib kuꞌom, bozugo kuꞌom da be ani bedego. Ka nidib bedego kena ka o suu ba. 24 Saŋkan la ba da nam pu kpenꞌes o sarega nii. 25 Ka noŋgbanwaꞌar yi Joon nyaꞌandolibin ne Jew dim nid yinni kuꞌom suub yela. 26 Ka ba kenn Joon saꞌan n yel o ye, “Paꞌana, gosima, one ka fu daa pianꞌ o yela la, ka o daa kenn fu saꞌan Joodan moꞌar nyaꞌaŋ la suud nidib kuꞌom, ka nidib wusa kenne o saꞌan.”

27 Ka Joon lebis o ye, “Soꞌ ku nyaŋe diꞌe siꞌela asee line ka Winaꞌam tis o. 28 Ya meŋ na di kaset ye m yel ye, ‘Li kaꞌa mane a Kiristo laa. Amaa ba tumi m ka m gaadi o tuon na.’ 29 Poꞌadaan soꞌe o poꞌa paal la, ka poꞌadaan la zua n ziꞌe ka wum o pianꞌad la, ka mor sumalisim bedego, bozugo on wum poꞌadaan la kukor la zug. M mor sumalisim bedego. 30 Li nar ka on du ka man sie.”

31 One yi agol na la gat siꞌel wusa, ka one be dunia ni ane dunia nid ka pianꞌad dunia yela. One yi arazana ni na ka gat siꞌel wusa la, 32 pianꞌad on wum ka nye siꞌel, amaa soꞌ pu diꞌe o pianꞌad laa. 33 One diꞌe o pianꞌad la paꞌal ye Winaꞌam a yelsida daan. 34 On ka Winaꞌam tum na la pianꞌadne Winaꞌam labaar, Winaꞌam tis o Siig Suŋ line kaꞌa makir la zug. 35 Ti Baꞌ Winaꞌam noŋi o Biig la ka zaŋ siꞌel wusa niŋi o nuꞌusin. 36 One niŋ o Biig la yadda mor nyovur line kaꞌ benne. Ka one pu siak Biig la noore, ku nye nyovure, ka Winaꞌam supeen lee na bene on sob zugin.