10
1 Wada kan ka Winaꞌam da tis Jew dim la nwaasne bunsuma line a ameŋa ka na kena la, ka lee kaꞌ yinni ne line a ameŋa laa. Bozugo ba da maan maana yuum yuum ka li pu ke ka bane liꞌel Winaꞌam la lieb suꞌum nyain ne. 2 Li yaꞌa kaꞌa ala, ba naani basin maana tisib, ka maluŋ yaꞌa da keen ka bane puꞌusid la liebin nyain, ba ku lem miꞌin tuumbeꞌed siꞌa ba potenda nii. 3 Amaa ka maan bama tiensidi ba tuumbeꞌed yela yuum yuum; 4 ka naꞌaraad ne buus ziim ku nyaŋe kad tuumbeꞌede.
5 Dinzug Kiristo n da kenn dunia ni na la, o da yel Winaꞌam ye,
“Fu pu bood maana ne piini,
amaa ninsaal niŋgbiŋ kane a man la.
6 Fu pu mor sumalisim ne konbid piini line nyuꞌed ne bugum bee maana line a tuumbeꞌed yela.
7 Ala ka m yel ye m Zugsoba,
man kena ye m tum fu boodim a siꞌem la
wuu lin sob siꞌem fu gbauŋ puugin mam yela la.”
8 Ka o yel yiiga ye, “M pu bood konbid piini line nyuꞌed ne maan ne piini wusa, ka li pu malis man suunre.” O yel neꞌeŋa hale baa ban dol wada suer maani li laa. 9 Ka yuꞌun yel ye, “Gosima, m kena ye m niŋ fu boodim.” Winaꞌam kpiis yiiga malima la, ka ziꞌel line tiaꞌal la. 10 Ka Yesu n niŋ Winaꞌam boodim ka noki o meŋ niŋgbiŋ maal maan tis o vuguri zug la, ka ti lieb Winaꞌam nidib ka a nyain.
11 Ka maalmaanib wusa ziꞌe ba tuuma ni daar wusa n maan maan kane a yinni noor siꞌem pendigid ka lin ku nyaŋe yiis tuumbeꞌede. 12 Ka Kiristo da tis o meŋi n maal maan vuguri, nidib tuumbeꞌed yela line na siak saŋa wusa, ka yuꞌun zinꞌi Winaꞌam datiuŋ, 13 n ti paae saŋkan ka o dataas lieb o noba gbauŋ. 14 Ka maan vuguri la ke ka bane ka o ke ka ba lieb Winaꞌam nidib la a suꞌum nyain saŋa wusa.
15 Ka Winaꞌam Siig Suŋ me dii o kaset n tisi ti ka ye man Zugsob yel ye,
16 “Neꞌeŋa a nonaar kan ka m na maal ne ba,
dabis ban nyaꞌaŋ.
M na niŋi m wada la ba sunya ni
ka sobi li ba yaꞌamin.”
17 Ka lem paꞌas ye,
“Man kudum ku lem tenꞌesi ba tuumbeꞌed ne ba taal yela yaꞌase.”
18 Ka Winaꞌam n yiisi ba tuumbeꞌed n bas la, li pu len nar ye ba maal maan tuumbeꞌed yela.
Tinam na liꞌel Winaꞌam siꞌem la yela
19 M baꞌabiise, tinam baŋ ye ti yuꞌun mor sukpiꞌem n na kpenꞌ Winaꞌam zinꞌigin Yesu ziim la yela, 20 line ka o noki maal suepaal ameŋa line gat lin daa giŋ Winaꞌam doog la line aa o niŋgbiŋ. 21 Ka tiname mor maalmaan titaꞌar one gur Winaꞌam yidim. 22 Dinzugo keli ka ti liꞌel Winaꞌam ne ti sunf ne yadda niŋir line kpiꞌem ne ti sunya line ka ziim zuꞌasug ke ka siꞌel line a beꞌed tenꞌesug da be ti potenda ni, ne ti niŋgbina pier ne kuꞌosuŋ. 23 Ka ti gbanꞌe kiŋ kiŋ tiꞌir kan ka ti yel paalo la, bozugo Winaꞌam one ziꞌel noor la a sida sob. 24 Ti tenꞌesimi ti taab yela ka kpeꞌeŋidi taaba n mor noŋilim ne tuumsuma. 25 Ka da bas taaba laꞌasug wuu sieba niŋid siꞌem laa, amaa ka kpeꞌeŋ taaba, bedego yaname nye ka Yesu ken daar la liꞌel la.
26 Ka maana pu lem be n na kad tuumbeꞌede, ti yaꞌa diꞌe Winaꞌam sida la ka kpelim niŋid tuumbeꞌed ne ponꞌosim. 27 Asee ka ti mor dabiem potenꞌer ne saria kadib ne bugum line ye li di Winaꞌam dataas ne nimmua la. 28 Soꞌ yaꞌa da saꞌam Moses wada la, ka kasetib ayi bee atanꞌ be, ba ku zo o nimbaanliga, asee o daana kpi. 29 One neꞌes Winaꞌam Biig la, ka nok nonaar ziim line ket ka o a Winaꞌam nid la niŋid yoo yoog ka tuꞌud Siig Suŋ line paꞌan Winaꞌam yelsum la, namisug na a wala. Asida, on din na gaad ala. 30 Ka ti miꞌ one yel ye, “Sam yier ane m din ka man na yo li.” Ka len yel yaꞌas ye, “Zugsob la na kadi o nidib saria.” 31 Li ane yeltoog tis one lu Winaꞌam one voe la nuꞌusin.
32 Ka tenꞌesimi saŋsiꞌen yanam n da nye Winaꞌam yelsida la. Ya modig ne sukpiꞌem ka nye namisug bedego ka nyaŋe ziꞌen kiŋ kiŋ. 33 Ka saŋsiꞌa ka ba tuꞌudi ya ka namisidi ya nidibin. Ka ya lem ziꞌen ne ya taaba bane ka ba namisi ba ala la. 34 Ka ya zo bane be sarega ni la nimbaanlig, ka maal sumalisim ne bane faann ya laꞌad, ka ya miꞌ ye ya meŋ mor laꞌasuma line gat neꞌeŋa line ku saꞌam.
35 Dinzugo da basi ya sukpiꞌem line mor nyood bedego la. 36 Ka li nar ye ya mor sumodigir ye ya niŋ Winaꞌam boodim ka diꞌe o noziꞌelug la. 37 Ka li sob ye, Winaꞌam yel ye,
“Li kpelim biꞌela, ka one ken na la, kena,
ka li ku yuuge.
38 Ka man popielim dim na voe
ne ba yadda niŋir zug.
Ka soꞌ yaꞌa nyobugidi lebid nyaꞌaŋ,
man sunf ku malis ne on daana.”
39 Tinam kaꞌa bane nyobugid lebid nyaꞌaŋ ka saꞌam la, amaa ti ane bane niŋ yadda ka paam faangir.