1 Tukpeedug la nyaꞌaŋ ka Paul buol yadda niŋidib la laꞌas n kpeꞌemise ba ka keesi ba ka yi keŋ Masedonia. 2 Ka kpemisid yadda niŋidib bane be teŋ bane wusa ka o daa doli gaad la, ka nan paae Akaia teŋin na 3 zinꞌin anina nwadisa atanꞌ, ka tiꞌeb ye o kpenꞌ aaruŋ n keŋ Siriya teŋin, ka wum ye Jew dim gbanꞌe potenꞌebeꞌede o yela. Ka linzug ka o tenꞌesi gbanꞌe ye o lebi yi Masedonia. 4 Ka Pirus biig Sopata one yi Berea teŋin na la, daa dol o laꞌam ne Tesalonika nidiba ayi, Aristarkus ne Sekundus, ne Derbe teŋ nid ka o yuꞌur buon Gaius, ne Tikikus ne Trofimus, babayi bane yi Asia teŋin na la, ne Timoti. 5 Ka ba gaad tuon n guri ti Troas teŋin. 6 Ka bodobodo kane kaꞌ dabin maluŋ laꞌasug dabisa nyaꞌaŋ la, ka ti kpenꞌ aaruŋ n naam Filipi teŋin, ka daba anu daar ka ti paae bane be Troas teŋin la ka zinꞌin anina daba ayopoi.

7 Ka Alasidaar yuꞌuŋ yinni ka ti laꞌas ye ti di Zugsob diib. Ka Paul daa bood ye o due beog kane nied la, ka pianꞌa tis nidib la ka yuꞌuŋ kena sodig. 8 Ka fitla bedego daa be girimbiisa dokan ni ka ti laꞌas la. 9 Ka dasaŋ soꞌ on yuꞌur daa buon Yutikus daa zinꞌi doog la takoro zug. Ka Paul kpelim pianꞌad la ka gbeꞌum gbanꞌ o, ka o gbisi naam agol doogin la n lu teŋin na. Ka ba uk o due ka o pun kpi sa. 10 Ka Paul sig teŋin keŋ toꞌoto bibug o ka ye, “Da ke ka li paki ya; ka o kpen vuꞌusid.” 11 Ka o lebi du gbenꞌes bodobodo di, ka sons ne ba yuug. Ka beog nie ka o basi ba ka keŋ. 12 Ka ba dol dasaŋ la kul. Ka o voe. Ka li niŋi ba sumalisim bedego.

13 Ka ti kpenꞌ aaruŋ deŋ Paul tuon n keŋ Assos teŋin, on ye o keŋ ne noba la zug. 14 On tuꞌosi ti Assos teŋin la o laꞌam kpenꞌ aaruŋ la ne ti keŋ Mitilene teŋin. 15 Ka beog nie ka ti yi Mitilene teŋin keŋ Kios teŋ baba. Ka beog nie yaꞌas ka ti paae Samos teŋin na. Ka li yimbeogun yaꞌas ka ti paae Miletus teŋin, 16 Paul daa bood ye o be Jerusalem ka Pentekost daar naan paae la, o daa luak Efesus teŋin, on pu bood ye o yuug Asia soꞌolim ni la zug.

17 Ka Paul naam Miletus ni tolim Efesus teŋin ye yadda niŋidib kpeenmnam la tuꞌos o na. 18 Ka ban paae o saꞌan na la, ka o yeli ba ye, “Ya miꞌ man daa tum siꞌem, man daa be ya saꞌan saŋa wusa, lin yi daar kan ka m paae Asia soꞌolim ni la. 19 M sigisi m meŋ tum Winaꞌam tuuma ne nintoꞌom, hale laꞌam ne mane nye makir bedego Jew dim saꞌan la. 20 M kpeꞌeŋi m meŋ n mool yela wusa line na suŋi ya ka paꞌali ya paalo ni ne ya yaan, 21 ka pianꞌ ne nimmua n tis Jew dim ne bane kaꞌ Jew dim ye ba fendigim dol Winaꞌam ka niŋ Zugsob Yesu yadda.

22 “Ka nannanna m siak Winaꞌam Siig Suŋ noor ye m waꞌane Jerusalem ka ziꞌ line na niŋ m aninaa. 23 M miꞌ ye teŋ kane ka m ken la wusa, Siig Suŋ la paꞌani m ye ba na lo m ka namisi m ka kpenꞌesi m sarega ni. 24 Amaa m zaŋ m meŋ nyovur ka li kaꞌ siꞌeli tisi ma, man naae m tuuma ban ka Zugsob Yesu tisi m ye m mool Winaꞌam popielim labasuŋ la.

25 “M miꞌ ye baa ya yinni ku lem nye m yaꞌase, yanam bane ka m mool Winaꞌam naꞌam yela ya saꞌan la. 26 Dinzug ka m yeti ya zinkaŋa ye ya yinni yaꞌa bodig m baꞌa lem kaeꞌ o ni la. 27 Mam mooli tisi ya Winaꞌam yela wusa ka pu suaꞌ siꞌela. 28 Guꞌusimi ya meŋ ka gur nimbane wusa ka Winaꞌam Siig Suŋ la guꞌuli ya la. Guri Winaꞌam nidib ban ka o daꞌ ne o Biig la ziim la. 29 M miꞌ ye m yaꞌa basi ya, nimbeꞌednam na kenn ya saꞌan na n gbanꞌe ya wuu zaŋkuaꞌar yiti gbanꞌad konbid siꞌem la. 30 Ka saŋa na kena ka ninsieba ya soogin na maꞌ damaꞌam piꞌe yadda niŋidib la keŋ ba saꞌan. 31 Dinzugo guꞌusimi ya meŋ ka tenr ye yuma atanꞌ nwa ka m saꞌane ya nintaŋ ne yuꞌuŋ wusa ne nintoꞌom ka pu base.

32 “Ka nannanna m zaŋi ya niŋ Winaꞌam nuꞌusin ne o popielim pianꞌad la yela line na paas ya yadda niŋir ka ke ka ya laꞌas ne Winaꞌam ninsoma n diꞌe yelsum. 33 M daa pu mor yaꞌamleog ne soꞌ anzurifa bee salima bee fuude. 34 M tum ne m meŋ nuꞌus n diisidi m meŋ ne m dolim taas la. 35 M paꞌali ya siꞌel mekama wusa ni ye, asee ka ya suŋ tadimnam ne ba tuuma poogin wenne man daa niŋ siꞌem la, ka tenr pianꞌad lin ka ti Zugsob Yesu daa yel la ye, ‘Sumalisim bedego bene one tisid n gat one diꞌed.’ ”

36 Ka Paul n pianꞌ naae la ka igin teŋin ne ba wusa puꞌus. 37 Ka ba wusa kaasi bibug Paul ka kees o. 38 Ba sunya daa saꞌam hale on yel ye, ba ku lem nye o la. Ka ba biel o keŋ aaruŋin la.