1 Ka Ikonium ni ka Paul ne Barnabas kpenꞌ Jew dim laꞌasug doogin pianꞌ hale ka nidib bedego, Jew dim ne bane kaꞌ Jew dim la niŋ Winaꞌam yadda. 2 Amaa ka Jew dim bane pu diꞌe pianꞌad la daam bane kaꞌ Jew dim la ye ba kis nidib bane dol Winaꞌam la. 3 Ka Paul ne Barnabas zinꞌini anina yuug ka pianꞌad Zugsob la yela ne sukpiꞌeuŋ. Ka Zugsob tisi ba paŋ ka ba tum tuumnyalima ka li paꞌal nidib la ye Winaꞌam popielim labaar la ane sida. 4 Ka teŋ la nidib pudug. Ka sieba bood Jew dim ka sieba bood Paul ne Barnabas.

5 Ka Jew dim ne bane kaꞌ Jew dim ne ba kpeenmnam bood ye ba diis Paul ne Barnabas nyan ka lobi ba ne kuga. 6 Ka ba baŋ li ka zo keŋ Likaonia soꞌolim, Listra ne Derbe teensin ne ba teŋbibisin 7 n mool labasuŋ la anina.

8 Ka dau daa zinꞌi Listra ni ka pu tunꞌe kenna. O daa ponꞌolim ne o biilimin sa ka nam pu keŋe. 9 Ka o kelis Paul pianꞌad la. Ka Paul gos o kii ka baŋ ye o niŋ Winaꞌam yadda ka na tunꞌe nye laafe, 10 ka yel o ne kukotitaꞌar ye, “Duom ziꞌen.” Ka dau la ianki ziꞌen ka keŋ.

11 Ka nidib bedego la nye Paul n tum siꞌel la, ba tans ne Likaonia pianꞌad ye, “Winaꞌamnam sigi ti saꞌan na wenne nidib ne.” 12 Ba daa pudi ba Winaꞌamnam bedego la yuda, ka yinni buon Zeus ka yinni la me buon Hermes. Ka ba buol Barnabas ye Zeus, ka buol Paul ye Hermes, on daa a pianꞌad kpeenm la zug. 13 Ka Zeus puꞌusum doog daa be teŋ la tuon. Ka Zeus baꞌamaan ne nidib la tenꞌes ye ba ane wina, ka mor naꞌaraad ne tiis puum n keŋ teŋ la zaꞌanoorin na n bood ye ba maal maana n tis Winaꞌam Tumtumnib Barnabas ne Paul.

14 Amaa Paul ne Barnabas n wum ban niŋ siꞌem la, ba aanse ba meŋ fuud ka kpenꞌ nidib la soogin tansid ye, 15 “Ti zuanama, bo ka ya niŋid neꞌenama? Tinam me ane nidib wenne yanam ne. Ti ye ti mool labasuŋ la n tisi ya ye ya bas line kaꞌa sidaa, ka fendigi dol Winaꞌam one voe ka maal saazug ne dunia ne moꞌar ne line be li ni wusa la. 16 Kudumin la, Winaꞌam daa ke ka buudi wusa doli ba meŋ sueya, 17 amaa ka lee niŋ tuumsuma ye nidib baŋ o yela. O tisidi ti saa, ne bunib saŋa ye ti dii tig ka mor sumalisim.” 18 Laꞌam ne pianꞌ bama la, li daa toe ka ba giŋ nidib la ka ba ku maal maan la n tisi baa.

19 Ka Jew dim yi Antiok ne Ikonium teensin kena nyaŋ ke ka nidib la doli ba n lobi Paul ne kuga, ka vuug o yiisi teŋin la, ka tenꞌes ye o kpine. 20 Amaa ka nyaꞌandolib la laꞌase gilig o ka o due kpenꞌ teŋin la. Ka beog nie la ka Paul ne Barnabas keŋ Derbe teŋin.

21 Ka Paul ne Barnabas mool labasuŋ la Derbe teŋin, ka nye nyaꞌandolib bedego anina, ka leb Listra ne Ikonium ka nyaan leb Antiok ni, 22 ka kpemis bane niŋ Yesu yadda la n saꞌani ba ye ba kpelim niŋ Yesu yadda, ka yet ye, “Li nar ka ti namis yiiga ka naan kpenꞌ Winaꞌam naꞌamin.” 23 Ka ba gaŋ kpeenmnam tis yadda niŋidib bane laꞌas teŋ teŋ wusa ka lo noor n ka puꞌus Winaꞌam, ka noki ba niŋ Zugsob one ka ba niŋ yadda la nuꞌusin la, 24 ka gaadi yi Pisidia teŋin n paae Pamfilia teŋin na.

25 Ka ban mool Winaꞌam pianꞌad la Perga teŋin la ka gaadi sig Attalia teŋin. 26 Anina ka ba kpenꞌ aaruŋ n keŋ Antiok teŋin zinꞌikan ka nidib la daa sos Winaꞌam yelsum n tisi ba laꞌam ne tuum kan ka ba naae la zug. 27 Ka ba paae n laꞌas yadda niŋidib la ka yeli ba Winaꞌam tum siꞌel ne ba, ne on maal suer ye bane kaꞌa Jew dim niŋ o yadda la, 28 ka zinꞌin ne ba yuug.