1 Lina paasid noor atanꞌ daan ka m na kena kaae ya. “Soꞌ yaꞌa mor taal ne o tiraan ka li a antuꞌa, li nar ka on daana mor kasetib ayi bee atanꞌ.” 2 M yet bane tum tuumbeꞌed la ne bane kpelim la wusa ye, m yaꞌa kena m ku zo ya soꞌ nimbaanliga. Man daa bee ya saꞌan noor ayi daan ni la, m daa pun yeli ya neꞌ. Ka mam kaꞌa ya saꞌan nannanna la, m na lem yeli ya neꞌ yaꞌas. 3 Yanam bood ye ya baŋ ye Kiristo tisi m suer ka m pianꞌad neꞌ la, li kaꞌa ye o koꞌoŋ paŋ ye o maali ya siꞌela, amaa o mor paŋ hale ya ni. 4 Li a sida ye on da be dapuudir zug la o da kaꞌa paŋa, ka kpi. Ka li lee ane Winaꞌam paŋ la ke ka o voe. Ka tinam a yinni ne Kiristo la ti me kaꞌa paŋa, ka Winaꞌam paŋ la ke ka ti laꞌam voe ne Kiristo ka tum ne o paŋi ya saꞌan.

5 Peligimini ya poog gos ye ya sid niŋ Kiristo yadda. Kpansimini ya meŋ ka Kiristo be ya ni. Li yaꞌa kaꞌa alaa ya lu ne. 6 M mor potenꞌer ye ya na baŋ ye tinam kaꞌ nimbane bas Winaꞌam dollim. 7 Ti sosid Winaꞌam ya zug ka ya da tum line a beꞌede. Kaꞌa ye ti duꞌosidi ti meŋ tiname nyaŋ makir laa, amaa ye ya maal line a suꞌum, hale baa li yaꞌa wenne tinam lu ne. 8 Ti ku nyaŋe niŋ siꞌel line pu dol Winaꞌam sida suer laa, asee yelsida la maꞌaa. 9 Tinam yaꞌa tadig ka yanam lee mor paŋ, ti mor sumalisim. Ka sosid Winaꞌam ye ya beilim wusa na a suꞌum. 10 Ka man kaꞌa ya saꞌan la ka m sobid neꞌeŋa tisidi ya ye m yaꞌa ti kena, li pu nar ye m zaŋ Zugsob la tisi m paŋ siꞌa la n tum ne sutoogo. O tisi m o paŋ la ye m suŋi ya ka kaꞌ ye m saꞌami yaa.

11 Baꞌasugo, m baꞌabiise, kelisimi man yet siꞌel la, ka tiake ya tuuma, ka more potenꞌer yinni, ka be ne sumalisim, ka Winaꞌam one tisid noŋilim ne sumalisim, na bee ya saꞌan.

12 Puꞌusimi taaba ne noŋilim puꞌusug. 13 Winaꞌam nidib wusa puꞌusidi ya.

14 Ti Zugsob Yesu Kiristo yelsum ne Winaꞌam noŋilim na bee ya wusa saꞌan, ka ya me na a yinni ne Winaꞌam Siig Suŋ la. Kpelimi suꞌum.