1 Nannanna m sobidne yeti ya bada diib yela. Ti miꞌ ye yaname yel siꞌem ye, ti wusa mor miꞌilim la, ane sida. Miꞌilim ketne ka ninsaal duꞌosidi o meŋ. Amaa noŋir kpeꞌeŋidne nidib. 2 Soꞌ yaꞌa tenꞌes ye on miꞌ siꞌel, o miꞌilim nan pu paae wuu lin suꞌum ye o naan miꞌin siꞌem laa. 3 Amaa nid yaꞌa noŋ Winaꞌam, Winaꞌam miꞌ o, ka gosid o.

4 Aa to, m yeti ya ne bada diib yela. Ti miꞌ ye baꞌar ane bun line pu voeya, ka me miꞌ ye Winaꞌam yinni maꞌaa be. 5-6 Hale siꞌelnam yaꞌa be agol bee teŋin, ka ninsaalib buon ye Winaꞌamnam, tinam miꞌ ye Winaꞌam yinni be. Hale ka li a sida ye siꞌelnam bedego be ka ninsaalib buon ye winaꞌamnam ne zugsobnam, amaa Winaꞌam yinni be, ka ane ti Baꞌ one maal siꞌel wusa ka on zug ka ti voe. Ka ti lem miꞌ ye Zugsob yinni maꞌaa be. O ane Yesu Kiristo, ka ti nyovur ne siꞌel wusa yi ne o ni na.

7 Ka li kaꞌ soꞌ wusa miꞌ neꞌeŋa. Ninsieba miilim bada hale ka ba yaꞌa di baꞌar diib ba kpelim tenꞌesid li yela ye li sid ane baꞌar diib. Ba potenda pu kpiꞌema, ka ba tenꞌes ye diib la miligi ba ne. 8 Diib pu ke ka ti malis Winaꞌam. Ti yaꞌa pu dii, li pu ket ka ti kpelim nyaꞌaŋa, ka ti yaꞌa di, li pu ket ka ti gat tuone.

9 Amaa guꞌusimi ka ya yolisim kan ka ya more na di bada diib la, da ke ka nidib bane potenda Winaꞌam ni pu kpiꞌem la kpenꞌ tuumbeꞌed ni. 10 Dau one yadda pu kpiꞌem neꞌeŋa yela, yaꞌa nye fun one mor miꞌilim, ka fu be baꞌamaalug zinꞌigin n dit diib, neꞌeŋa ku ke ka o di baꞌar diib bee? 11 Ka fun miꞌilim la na ke ka fu baꞌabiig on yadda pu kpiꞌema ka Kiristo kpii o zug la saꞌam. 12 Fu yaꞌa niŋid wala n tum tuumbeꞌedi saꞌam fu baꞌabiig on yadda pu kpiꞌema, fu tumne tuumbeꞌed n poꞌogid Kiristo. 13 Dinzugo diib yaꞌa ke ka m baꞌabiig tum tuumbeꞌed m meŋ kudin ku onb niꞌim yaꞌasa, ka m da ke ka m baꞌabiig kpenꞌ tuumbeꞌed ni.