Tawúratɩ na Injiila dɛ́ɛ fɔɔlɩ́nɩ MAATÉWU 2

Tɩlɩ́ɖa túbu‑dɩnáa wɔɔgɔ́nɩ bokúu bú Yeésu tɛ́ɛ́dɩ.

(Lúk. 2.8-20)

1 Baalʊ́rʊ Yeésu Bɛtɩlɛhɛ́m tɛɛ‑biyá kɔwɛ Yudée laadɔ́ɔ‑daá nɛ́‑daá gɛ, sáátɩ wenkí wénɖíi kowúrɔ́ɔ nɛ́. Baalʊ́rʊ yɩ wɔ́rɔ́ nɛ́, ngɛ tɩlɩ́ɖa túbu‑dɩnáa bɛɛgbɛ́lɛ́m wɩlásɩ‑dɛ́ɛ boɖé nɛ́ baagálɩ́ɩ́ná wɩ́sɩ yaagalɩɩɖɛ́ fáráńdɩ́ batála Yerusalɛ́m tɛ́ɛ́dɩ‑daá. 2 Ngɛ bɔɔbɔ́ɔ́zɩ sɩsɩ: «Yahúúɖúwá‑dɛ́ɛ wúro baalʊ́rʊ yɩ nɛ́, ɩwɛ lé? Káma ɖáagáná ɩdɛ́ɛ wɩlɔɔ́ ɖoo wɩ́sɩ yaagalɩɩɖɛ́ fáráńdɩ́ nɛ́ gɛ ɖɔ́ɔ́gɔ́nɩ sɩ ɖukúu yɩ tɛ́ɛ́dɩ.» 3 Wúro Eróódi waanɩ́ɩ bɩlɛ́ nɛ́, ngɛ ɩlaakáarɩ waagʊrʊ́ ɩ́na Yerusalɛ́m zamɔ́ɔ rɩ́ŋa. 4 Ngɛ woodúúzi ‑dɛ́ɛ kʊ́bɔnáa rɩ́ŋa na ɩbɔ́ɔ́zɩ wɛ sɩsɩ lé gɛ sɩ balʊ́rʊ ? 5 Ngɛ bɛlɛ́ boobúsi yɩ sɩsɩ: «Bɛtɩlɛhɛ́m, Yudée laadɔ́ɔ‑daá, káma bɛɛ wentí Ɩsɔ́ɔ waaŋmatɩná nɔɔ́ nɛ́ nɖɔ́:

6 «Nyɔ́ɔ́ Bɛtɩlɛ́hɛm Yudée laadɔ́ɔ‑daá,

ńdɛ́kɛ́ɛ tɛɛ‑biyá bɩɩdɔɔrɩná kɛ Yudée laadɔ́ɔ‑dáa nɛ́,

káma nyɔ́ɔ́ nyádáá gɛ wúro

weení sɩ ikéti mɛ́dɛ́ɛ zamɔ́ɔ nɛ́ sɩ ɩlɩɩná."»

7 Ngɛ Eróódi weeyéle bayáa tɩlɩ́ɖa túbu‑dɩnáa bɛɛgbɛ́lɛ́m wɩlásɩ‑dɛ́ɛ boɖé nɛ́ súmúú‑daá, ɩbɔ́ɔ́zɩ wɛ sáátɩ wenkí ɖéyi‑ɖéyí wɩlɔɔ́ waɖʊ kalɩ́ɩ nɛ́. 8 Ngɛ weeyéle bɛɖɛ́ɛ Bɛtɩlɛhɛ́m bɩka ɩtɔ́ wɛ sɩsɩ: «ibó ɩbɔ́ɔ́zɩ ɩtɩlɩ́ bú ɩmʊ́ ɩɖɩdáarɛ ɖéyí‑ɖéyí. A mɩ́ɩ́ná yɩ iyéle mandɩlɩ́, na mɔ́ɔ́ ɖʊ́dɔ mobó mogógúu yɩ tɛ́ɛ́dɩ.»

9 Wúro waaŋmátɩ wɛ bɩlɛ́ bɩtɛ́ nɛ́, bɔɔgbɔ́ɔ nɩ́bááwʊ. Ngɛ baana wɩlɔɔ́ wenká baagáná kɛ wɩ́sɩ yaagalɩɩɖɛ́ nɛ́ baazá‑daá kɛ́nɖɛɛ́. Kaadála lénlé bú wɛ nɛ́, ngɛ kaazɩ́m. 10 Baana wɩlɔɔ́ bɩlɛ́ nɛ́, ngɛ bɩɩbá bɩlá wɛ niíni. 11 Ngɛ baazʊ́ʊ ɖaána‑daá bɔmɔɔná bú na ɩgɔɔ Marɩyáma. Ńna gɛ baagá baɖʊ́ná‑rɔ bokúu bú tɛ́ɛ́dɩ, bobóɖi bagbɩná‑daá balɩzɩ́ siká, bánvʊʊdɩ́ nɛ́, na tulaarɩ́ banÿaá kɩ sɩsɩ nɛ́. 12 Ngɛ Ɩsɔ́ɔ waabásɩ wɛ́ ɖooziré‑daá sɩsɩ bákábɩ́sɩ Eróódi‑jɔ́; ngɛ bɔɔgbɔɔná nɩ́bááwʊ nakɩ́rɩ babɩ́sɩ balaadɔ́ɔ‑daá.

Ísífu wɔɔgbɔ́ɔ bú na ɩgɔɔ bese bɛɖɛ́ɛ Mɩ́sɩ́ra

13 Bɛɛɖɛ́ɛ wɔ́rɔ́ nɛ́, ngɛ Ɖádʊ́ʊ Ɩsɔ́ɔ‑dɛ́ɛ waaɖʊ ɩlɩ́ɩ Ísífu‑rɔ ɖooziré‑daá ɩtɔ́ yɩ sɩsɩ: «kʊrʊ́, kpɔɔ bú na ɩgɔɔ ise ɩɖɛ́ɛ Mɩ́sɩ́ra. Cɔɔ ńna hálɩ sáátɩ wenkí sɩ mɔdɔ́ nya sɩsɩ ngábɩsɩ nɛ́, káma wɔ́ngɔnɩ́ ɩcáa bú sɩ ɩkʊ yɩ.» 14 Isífu waagʊrʊ́ ɩkpɔ́ɔ bú na ɩgɔɔ nuvoowú bɛɖɛ́ɛ Mɩ́sɩ́ra. 15 Wɔɔjɔ́ɔ ńna hálɩ Eróódi ɩkɔ́nɩ ɩsɩ́. Bɩɩlá bɩlɛ́ gɛ na wentí Ɩsɔ́ɔ waaŋmatɩná nɔɔ́ sɩsɩ: «Mááyáa mebiyaalʊ́ sɩsɩ ɩ́lɩ́ɩ Mɩ́sɩ́ra» nɛ́ ikóódi.

Wúro Eróódɩ weeyéle bakʊ bíya abaaláa.

16 waadɩlɩ́ sɩsɩ tɩlɩ́ɖa túbu‑dɩnáa bɛɛgbɛ́lɛ́m wɩlásɩ‑dɛ́ɛ boɖé nɛ́ boodúúli yɩ nɛ́, ngɛ waabá ɩyɛ́ɛ baaná. Ngɛ waava wɛ́ɖɛ sɩsɩ bákʊ́ bíya abaaláa rɩ́ŋa bɔwɛná bɩ́ɩ́zɩ nasɩ́lɛ ngbɔ́ɔ ngédi nɛ́ Bɛtɩlɛhɛ́m na kɩdɛ́ɛ fáráńdɩ́wá‑daá. Bɩ́ɩ́zɩ sɩḿ sɩdaá gɛ tɩlɩ́ɖa waawɩ́lɩ sɩsɩ bánlʊrʊ́ʊ bú ɩmʊ́. 17 Bɩɩlá bɩlɛ́ gɛ na wentí Yeremíya waavʊ́ńŋmátɩ sɩsɩ:

18 «Baanɩ́ɩ lowú nakɩ́rɩ Raamáa tɛ́ɛ́dɩ‑daá,

wíídi na mɛɛdɩrɛ gɛ bɩgɛ́ɛ.

Rasɩ́ɩ́la wénwii kʊ ɩdɛ́ɛ bíya,

ɩdánjaa bɛbɛ́ɛ́lɩ yɩ, káma ibíya waazɩ́» nɛ́, ikóódi.

Ísífu na Marɩyáma na bu baagábɩ́sɩ Nazarɛ́ɛ́tɩ.

19 sɩ́m wɔ́rɔ́ gɛ Ɩsɔ́ɔ‑dɛ́ɛ waaɖʊ ɩlɩ́ɩ Ísífu‑rɔ ɖoozire‑daá Mɩ́sɩ́ra laadɔ́ɔ‑daá. 20 Ngɛ wɔɔdɔ́ Ísífu sɩsɩ: «Kʊrʊ́, kpɔɔ bú na ɩgɔɔ nbɩ́sɩ laadɔ́ɔ‑daá, káma wenbá bánvʊnjáádɩ sɩ bakʊ bú nɛ́ baazɩ́.» 21 Ngɛ Isífu waagʊrʊ́ ɩkpɔ́ɔ bú na ɩgɔɔ ɩbɩ́sɩ Israyɛ́ɛ́lɩ laadɔ́ɔ‑daá. 22 Amá waanɩ́ɩ sɩsɩ Arɩkelawɔ́ɔ́sɩ Eróódi biyaalʊ́ wénɖíi kʊ kowurɔ́ɔ ɩjaa wɔ́rɔ́ Yudée laadɔ́ɔ‑daá nɛ́, bɩɩlá yɩ nɩndáárɛ ńna boɖé. Ngɛ Ɩsɔ́ɔ waaŋmatɩná yɩ ɖoozire‑daá ɩɖɛ́ɛ Galilée fáráńdɩ́‑daá. 23 Ngɛ woobó ɩcɔ́ɔ tɛ́ɛ́dɩ bánÿaá tɩ sɩsɩ Nazarɛ́ɛ́tɩ nɛ́ tɩdaá. Bɩɩlá bɩlɛ́ gɛ na wentí waavʊ́ńŋmátɩ sɩsɩ: «Sɩ bayáa yɩ gɛ sɩsɩ » nɛ́, ikóódi.