1 ⴹⵗ ⴹⵢ ⵙ ⵏⴶⵔⵓ ⵜⵆⵜ ⴹⵜ ⵎⵛⵏⴰ ⵙⵤⴶⵤⵏⵏⴰ ⵓⴹⵢ ⵏⴶⵔⵓ ⵍⵈⵔ ⴶⵔⵏⵗ ⴹⵎⵛⵏⴰ ⵙ ⵜⵔⵢⵜ ⵏⵎⵍⵏⵏⴰ ⵗⵢⵙⴰ ⵍⵎⵙⵈ⵰ 2 ⵜⵔⵢⵜ ⵏⵍⵎⵙⵈ ⵙ ⵏⴶⵔⵓ ⵔⵈⵎⵜ ⵙ ⵙⵀⵀ ⵏⵤⴶⵤⵏⵏⴰ⵰ ⵔⵈⵎⵜⵏ ⵏ⵿ⵜⴰ ⴼⵍⵏⵏⴰ⵰ ⵏⴹⵓⵜ ⵎⵔⵏ ⵜⵎⴰ ⵓⴰ ⵏⴶⴰ ⴹⵗ ⵜⵏⵢⴰ ⵏⵎⵛⵏⴰ ⵏ⵿ⵜⴰ ⵎⵙⵏ ⵀⵔⴶⵏⵏⴰ⵰ 3 ⴹⵏⴶ ⵓⵏ ⴼⴹⴰ ⵏⵙⵀⵔⴶ ⴾⴹ ⵏⵂⴰ ⵜⵙⵙ⵿ⵜ ⴼⵍⵙ ⵏⵙⵏ ⵙ ⵜⵙⵙ⵿ⵜ ⵏ⵿ⵜⴰ ⴹⵜⵜⵓⵢⵜ ⵤⵎⵔⵜ⵰ 4 ⵤⵎⵔⵜ ⵜⵏ ⵎⵔⵏ ⵏ⵿ⵜⴰ ⴹⵏⵜⵂⴾⵜ ⵜⵛⵜ ⵏⵢⵜⴹⵏ ⵍⵏⵏ ⵍⵎⵗⵏⴰ ⵎⵔⵏ ⵙ ⵏⵆⵍ ⵢⵜⴹⵏ ⵍⵏⵏ ⵍⵎⵗⵏⴰ ⵓⵔ ⵤⴰ ⵏⵎⵤⵢ ⴹⴶⵢ ⵏⵜⵎⴰ ⴹⵗ ⵎⵛⵏⴰ⵰

5 ⵎⵛⵏⴰ ⵎⵔⵏ ⵓⵔ ⵙⵔⵎⴶ ⵢ ⴹⵗⵙ ⴶⵏ ⵜⵎⴰ ⴹ ⵜⵔⵏⵜ ⵜⴹⵏⵢⵜ ⵓⵍⵏⵏⴰ ⵙ ⵜⵔⵢⵜ ⵏⵏ⵿ⴼⵙ ⵓⴰ ⵤⴹⴶⵏ ⵓⴰ ⴹⵏⵗⵜⵓⴾⴼⵏ⵰ 6 ⴼⵍⵙ ⵂⵔⵓⴰ ⴹⵏⵗⵓⵔ⵿ⵜⵆⵍ ⵍⴼⵢⴹⵜ ⵓⵍⵢⵜ ⴹ ⵎⵜ ⵍⵎⵙⵈ ⴼⵍ ⴹⵍⵍ ⵏⵢⵜⴹⵏ ⵓⵔ ⵏⵤⴶⵤⵏ ⵙ ⵎⵛⵏⴰ ⴹⵗ ⵍⵓⵆ ⵓⴰ ⵙⴾⵜ ⵎⵛⵏⴰ ⵢⵓⵏ⵰ 7 ⵤⵓⵜ ⵢ ⵤⵆⵀⵍⵏ ⴹ ⵜⵀⴰ ⴾⴹⵗ ⴼⵍ ⴹⵍⵍ ⵏⵓⴹⵏ ⵗⴹⵏ⵰ ⵎⵌⵙ ⴼⵔⴶ ⵓⴹⵏ ⴹ ⵆⵀⵍ ⵜⵎⵜⵏ⵿ⵜ ⴼⵍ ⵓⴹⵏ ⵍⵗⵏ⵰ 8 ⵎⵛⵏ ⵎⴾ ⴹⴰ ⵓⵙ ⴹⵏⵗⵙⴾⵏⴰ ⵎⵛⵏⴰ ⵜⵔⴰ ⵜⴰ ⴹⵏⵗⴶⴰ ⵂⵔⵓⴹⴰ ⵏⵎⵙ ⵏⵙⵀⴾⴹⵏ ⴹ ⵀⴰ ⵍⵎⵙⵈ ⴼⵍ ⴹⵍⵍⵏⵏⴰ⵰

9 ⴹⴹ ⵤⵎⵙ ⵎⵔⴹⴰ ⵏⴶⵔⵓ ⵜⵆⵜ ⵙ ⵜⵔⵢⵜ ⵏⵤⵏⵢ ⵏⵍⵎⵙⵈ ⵎⵏⵎⴾ ⵙ ⴹⵏⵗ ⵓⵔ ⵤⵙⴼⵙⵓ ⴹⵗ ⵍⵂⵎ ⵏⵎⵛⵏⴰ⵰ 10 ⴼⵍⵙ ⴹⴹ ⵤⵎⵙ ⵂⵔⵓⴰ ⵏⵎⵙ ⵤⵏ⵿ⴶⴰ ⵏⵎⵛⵏⴰ ⴹⴰ ⵏⴶⴰ ⴹⵔⵙ ⵍⵈⵔ ⵙ ⵜⵔⵢⵜ ⵏ⵿ⵜⵎⵜⵏ⵿ⵜ ⵏⵀⵔⵔⵏⵜ ⵎⵏⵎⴾ ⵙ ⵓⵔ ⵤⴰ ⵏⴶⵔⵓ ⴼⵙⵏ ⵙⵙⵀⵀ ⵏ⵿ⵜⵎⴹⵔ⵿ⵜ ⵏⵀⵔⵔⵏⵜ ⵎⵔⴹⴰ ⴹⵔⵙ ⵏⴶⴰ ⵍⵈⵔ⵰ 11 ⵎⵔⵏ ⵢⵏ ⵔⵜ ⵙ ⵎⵛⵏⴰ ⴼⵍ ⵏⵙⴼⵍⴰ ⵙ ⵜⵔⵢⵜ ⵏⵎⵍⵏⵏⴰ ⵗⵢⵙⴰ ⵍⵎⵙⵈ ⵙⵏ⵿ⵜⴰ ⴹⵏⵗⴶⵏ ⵎⵔⴹⴰ ⵍⵈⵔ ⴹⵎⵛⵏⴰ⵰ ⵏ⵿ⵜⴰ ⴹⵏ ⴹⵗ ⵀⵔⴶⵏⵏⴰ⵰

12 ⵎⴰ ⵜⵙⴾⴰ ⵤⴰ ⵀⵜⵓ ⵜⵏ⵰ ⴹⵢ ⵤⴰ ⵙ ⵜⵔⵢⵜ ⵏⵓⴹⵏ ⵢⵏ⵿ⴹⴰ ⵙ ⴹⴶⵤ ⵀⴾⴹ ⴹⵏⵜ ⵀⴾⴹ ⵎⵔⵏ ⵏ⵿ⵜⴰ ⴹⵓⵢⵏ ⵜⵎⵜⵏ⵿ⵜ⵰ ⵎⴾⵏ ⴹⵗ ⵙ ⵜⵎⵜⵏ⵿ⵜ ⵜⵍⵢ ⵢⵢⵜⴹⵏ ⴾⵍ ⴼⵍⵙ ⴾⵜⵏⵙⵏ ⴶⵏ ⵀⴾⴹⵏ⵰ 13 ⵏ⵿ⵜⴰ ⵀⴾⴹ ⵍⵢ ⵂⵔⵓⴰ ⴹⴰ ⵓⵔ ⴹⵤⵤⵀⵜ ⵎⵛⵏⴰ ⵛⵔⵗⵏⵜ ⴼⵍ ⵏⵀⵢ ⵎⵙⴰ ⵎⵔⵏ ⵀⴾⴹ ⵓⵔ ⵈⵙⵀ ⵙ ⵜⵓⵔⵍⴰ ⵛⵔⵗⴰ⵰ 14 ⴹⵔ ⴶⴰ ⵓⵏ ⴹⴰ ⵢⴰ ⵜⵎⵜⵏ⵿ⵜ ⵜⵍⵢ ⵜⵈⴾⵎ ⴹⵗ ⴹⵏⵜ ⴹⵀⵤⵏ ⵗⵔ ⴹⵎ ⵂⵔ ⵎⵙⴰ⵰ ⵜⵍⵢ ⵂⵔⴾⴹ ⵢⵢⵜⴹⵏ ⵓⵏ ⵓⵔ ⵏⴶⴰ ⵀⴾⴹ ⵍⵏ ⴹ ⵓⵏ ⴹⵎ ⵙⵏ⵿ⵜⴰ ⵂⵏ ⵍⵎⵜⵍ ⵏⵓⴰ ⴹⵤⵙⵏ⵰

15 ⵎⵛⵏ ⵜⵎⵤⵔⵢⵜ ⵏⴹⵎ ⵓⵔ ⵜⵍⴰ ⴹⵜⵂⴾⵜ ⵜⴰ ⴹⵏⵗⴶⴰ ⵎⵛⵏⴰ ⵙⵔⵈⵎⵜⵏⵜ⵰ ⵜⴹⵜ ⵙ ⵢⵜⴹⵏ ⴶⵜⵏⵏ ⵀⵜⵏ ⴼⵍ ⴹⵍⵍ ⵏ⵿ⵜⵎⵤⵔⵢⵜ ⵏⵓⴹⵏ ⵢⵏ⵿ⴹⴰ ⵜⵎⵙⵏ ⴹⵎ⵰ ⵎⴰ ⴹⵔ ⴶⴹⴰ ⴶⵜ ⵏⵔⵈⵎⵜ ⵏⵎⵛⵏⴰ ⵜⵎⵙⵜ ⵜⵂⴾⵜⵏⵜ ⵜⴰ ⴹⵜⵙⵜ ⵙ ⵜⵔⵢⵜ ⵏⵓⴹⵏ ⵢⵏ⵿ⴹⴰ ⵜⵎⵙⵏ ⵗⵢⵙⴰ ⵍⵎⵙⵈ⵰ ⵔⵈⵎⵜ ⵜⵏ ⴹⵜⵂⴾⵜ ⵜⵏ ⵓⵔ ⵍⵏⵜ ⴹⴾⴹ ⵎⵔⵏ ⵓⴹⵏⵜⵏ ⵢⵜⴹⵏ ⴾⵏⵏⵏ ⴶⵜ⵰ 16 ⵓⴰ ⴹⵜⵜⵓⵢ ⵜⵂⴾⵜ ⵏⵎⵛⵏⴰ ⵓⵔ ⵍⴰ ⴹⵓⴰ ⴹⵓⵢ ⵀⴾⴹ ⵏⵓⴹⵏ ⵢⵏ⵿ⴹⴰ⵰ ⴹⴼⵔ ⵀⴾⴹ ⵓⴰ ⴶⴰ ⴹⵎ ⵎⵛⵏⴰ ⵓⴹⵀ ⵙⵛⵔⵗⵏⵜ ⵢⵜⴹⵏ ⴾⵍ⵰ ⵜⵂⴾⵜ ⵎⵔⵏ ⵜⴰ ⴹⴶⴰ ⵎⵛⵏⴰ ⵜⵆⵜ ⵙ ⵜⵜⵓⵢ ⵢⵜⴹⵏ ⵎⵔⵏ ⵜⵙⴹⵓ ⴹⴼⵔ ⵙ ⴶⵏ ⵢⵜⴹⵏ ⵜⵎⵤⵔⵢⵜ ⵜⴶⵜ⵰ 17 ⵍⴾⵏ ⵙ ⵜⵎⵤⵔⵢⵜ ⵏⵓⴹⵏ ⵢⵏ⵿ⴹⴰ ⴹⵜⵓⵢⵜ ⵙ ⵜⵈⴾⵎ ⵜⵎⵜⵏ⵿ⵜ ⴹⵏⵜ ⵙ ⵜⵔⵢⵜ ⵏⵓⴹⵏ ⵢⵏ⵿ⴹⴰ ⵓⵏ⵰ ⵎⵛⵏ ⵙ ⵜⵔⵢⵜ ⵏ⵿ⵗⵢⵙⴰ ⵍⵎⵙⵈ ⵗⵙⵏⵜ ⴶⵔⵓⵏ ⵢⵜⴹⵏ ⴶⵔⵏ ⵓⵏ ⵓⵍⵏ⵰ ⵢⵜⴹⵏ ⵓⵏ ⴶⵔⵓⵏⵏ ⵔⵈⵎⵜ ⵓⵔ ⵏⵍⴰ ⴹⴾⴹ ⴹⵜⵂⴾⵜⵏⵜ ⵜⵂⴾⵜ ⵜⵆⵜ ⵓⵏ ⴹⵢ ⴹ ⴹⵔⵏ ⵈⴾⵎⵏ ⴹⵗ ⵙ ⵜⵔⵢⵜ ⵏⵓⴹⵏ ⵢⵏ⵿ⴹⴰ ⵜⵎⵙⵏ ⵗⵢⵙⴰ ⵍⵎⵙⵈ⵰

18 ⴹⵗ ⴹⵢ ⴾⴹ ⵜⵎⵤⵔⵢⵜ ⵏⵓⴹⵏ ⵢⵏ⵿ⴹⴰ ⵜⵓⵢⴹⵓ ⵜⴹⵀ ⵙⵢⵜⴹⵏ ⴾⵍ ⵓⴹⵢ ⵢⵜⴹⵏ ⴾⵍ ⴹ ⴶⵔⵓⵏ ⵜⵆⵜ ⵜⵂⴾⵜ ⵜⵎⴹⵔ⵿ⵜ ⵙ ⵜⵔⵢⵜ ⵏⵎⵤⵍ ⵗⴹⵏ ⵏⵓⴹⵏ ⵢⵏ⵿ⴹⴰ⵰ ⵎⵤⵍ ⵓⵏ ⵜⵎⵜⵏ⵿ⵜ ⵏ⵿ⵗⵢⵙⴰ ⵍⵎⵙⵈ ⵜⵎⵙⵏ⵰ 19 ⵤⵏ⵿ⴹ ⵎⴾ ⵙ ⵜⵎⵤⵔⵢⵜ ⵏⵓⴹⵏ ⵢⵏ⵿ⴹⴰ ⵜⵓⵢⴹⵓ ⵙ ⵆⵍⵏ ⵢⵜⴹⵏ ⴶⵜⵏⵏ ⵏⵙⵀⴾⴹⵏ ⵎⴾⵏ ⴹⵗ ⵙ ⵀⵔⴹⴶ ⵏⵓⴹⵏ ⵢⵏ⵿ⴹⴰ ⴹⵤⵓⵢⵏ ⵙⵢⵜⴹⵏ ⴶⵜⵏⵏ ⴹ ⴶⵔⵓⵏ ⵜⵆⵜ ⴹⵜ ⵎⵛⵏⴰ⵰

20 ⵛⵔⵗⴰ ⵎⵔⵏ ⵙⴹⵓ ⴼⵍ ⴹ ⵜⵜⵢ ⵜⵎⵤⵔⵢⵜ ⵓⵍⵏ⵰ ⵎⵛⵏ ⵀⴾⴹⵏ ⵙ ⴶⵜⵏ ⴹⵗ ⴹⴶ ⴹⵏⴶⵙⵏ ⴹⵜⵙⴼⵍ ⵔⵈⵎⵜ ⵏⵎⵛⵏⴰ⵰ 21 ⴹⵗ ⴹⵢ ⴹⴹ ⵤⵎⵙ ⵀⴾⴹ ⵈⴾⵎ ⴼⵍ ⴹⵏⵜ ⴹⵓ ⴹⵜⵎⵜⵏ⵿ⵜ ⵓⴹⵢ ⵔⵈⵎⵜ ⵏⵎⵛⵏⴰ ⴹⴰ ⴹ ⵜⵈⴾⵎ ⵜⴹⵓ ⴹⵜⵆⵜ ⴼⵍ ⴹⵏⵗⵜⴾⴼⵓ ⵜⵎⴹⵔ⵿ⵜ ⵜⴰ ⵜⵗⵍⵍⵜ ⵙ ⵜⵔⵢⵜ ⵏⵎⵍⵏⵏⴰ ⵗⵢⵙⴰ ⵍⵎⵙⵈ⵰