15
Yesu, Pilate Aunaona i Mahiri
(Matthew 27:1-2,11-14; Luke 23:1-5; John 18:28-38)
1 Hubahubanai boiboghi gudutaupuyoweina* ghaeghaehi, babada maitehi ma raugagayo tauvihanahanapuweina ma Tauviꞌogatara* atapuhi hi viꞌogatara. Ma hi viꞌanina po tauvighaviya Yesu hi panipani ma hi naiyei, po hi amverenei Pilate* Pilate yana Caesar i vinei po mai Judea i badehi. auwarina. 2 Ma i raubayadei ipa, “Tam mai Judea* ahi Guyau?”
Ma Yesu i paribeei ipa, “Ee, tam aiwa u ririweiya nanaꞌarena.”
3 Ma gudutaupuyoweina ghaeghaehi wavu maghamagha Yesu hi verei. 4 Yamna aubaina Pilate i raubayadanameei ipa, “Apo ma amparibeeyana bo eꞌegha? U inanai wavu maghamagha he vereverem.” 5 Ma Yesu gamona i pota, yamna aubaina Pilate i amhuna duma.
Mai Judea* hi Ghohei da Yesu ina Hiraghe
(Matthew 27:15-26; Luke 23:13-25; John 18:39–19:16)
6 Borima emosi emosi auhinenina Verauvira Torehana* marana, yana Pilate a mumuga po rava emosi paniyei e oheꞌohei rava ahi rauhogharei. 7 Ma na au marana yana rava emosi wavana Barabbas yana au deri, tauna mai Rome* ahi taniwaga tauvighaviyeina maitehi, hi amtaraihoghara po hi vihiraghena ma hi panihi. 8 Ma rava maghamaghauhi hi neꞌi po Pilate hi vibaghai po aiwa aubaihi ita dewai, me mara maghamaghauna i dewadewaiya nanaꞌarena.
9 Ma Pilate i raubayadehi ipa, “O ghoheꞌu po mai Judea* ahi Guyau a ohei?” 10 Ma i hanapuwana dumei da gudutaupuyoweina* ghaeghaehi, Yesu hi unurei aubaina hi amverenei auwarina. 11 Ma gudutaupuyoweina ghaeghaehi yana rava maghamaghauhi hi raihunahi, po Pilate Barabbas ita ohei.
12 Anima Pilate i raubayadanameehi ipa, “We ravana Yesu, o ririwa da tauna mai Judea ahi Guyau, aiwa o ghoheghoheꞌu po auwarina a dewai?”
13 Ma hi vighorenaeme hipa, “Ma tuparatui!”
14 Ma Pilate i raubayadehi ipa, “Aiwa aubaina! Aiwa i dewa boꞌai?”
Ma hi otuꞌotu ghirighiriyana ma hipa, “Ma tuparatui!” 15 Ma Pilate i ghohei da rava maghamaghauhi ita raikaohahi, aubaina Barabbas i ohei aubaihi. Anima tauvighaviya i riwehi po Yesu hi kwapui, ma hi taravaina naiyei tuparatuna aubaina.
Tauvighaviya Yesu hi Vijiboghi
(Matthew 27:27-31; John 19:2-3)
16 Tauvighaviya Yesu hi taravaina ruiyei, taniwaga Pilate a animaꞌae waigarina auhinenina, anima tauvighaviya atapuhi hi ghoreboinihi. 17 Ma gara waipiyopiyovina hi viꞌoteni me guyau, ma ghoroghorova waidonadonana hi viri po me kunuteiya ma hi viꞌoteni. 18 Anima hi vikare po vijiboghei hi ateꞌatei, ma nimahi hi vohepai ma hipa, “A tarahiyauwem mai Judea* ahi Guyau ma maꞌevavahagha.” 19 Kwapuwei unuꞌununa hi raviravi ma hi hovahovai, ma aunaona aetutuhiyei hi raupari ma vijiboghei hi rauduneei. 20 Maranai hi vijibogha vorovei yana garana waipiyopiyovina hi gagi, ma gara gharinei hi viꞌotenameei, ma hi taravaina naiyei tuparatuna aubaina.
Yesu hi Tuparatui
(Matthew 27:32-44; Luke 23:26-43; John 19:17-27)
21 Au tayaha rava Cyreniyei wavana Simon, Alexander ma Rufus amahi, ꞌwapuwei i neneꞌi ma tauvighaviya hi hegari, po Yesu a korosi iꞌavarai. 22 Dobu ana wava Golgotha nahidana hi naiyei, anona yana Unu Tetetena.† Tetete aniꞌinanana me unu aubaina hi ghorei po Unu Tetetena. 23 Ma hi raudadana po wine,* mer maiteni viravirana‡ Wine ma mer yana muramura viuva tauvunuina. hi verei ma umana i geduꞌaiyei. 24 Anima hi tuparatui ma ana gara aubaina aupouhi hiyavei hi vikayokayo, po hita inanai aiya apo metauna ghutana ita vaini. 25 Na madeghana yana maratomtom, ahubena ma ausiporina§ 9:00 a.m.; Naꞌi yana yayata a madegha vitonuina. ma hi tuparatui. 26 Ma hi wavuiya tuyeghana hi tuturatui au korosi, girumana ipa: “Mai Judea* ahi Guyau”. 27 Anima taudanene ruwagha Yesu maitena hi tuparatuhi, emosi au ahoꞌohohina ma ghehauna au ahokehana. 28 Ma aiwa hi dewadewaiya yana peroveta ponana i raimoinai ipa, “Hina inanai yana tauna me taudewaboꞌa.” ✡ Isaiah 53:12
29 Rava hi nae ma hi neꞌi ma unuꞌunuhi hi kwajikwajiyei ma hi jiboghi hipa, “Habe tam upa Maimaituwa ana Numa* ma goruhi ma maratom tonugha aumurina ma vowameei. 30 Habe marina ma hagumeem po korosiyei ma hopuꞌi!”
31 Wate nanaꞌarena gudutaupuyoweina* ghaeghaehi ma raugagayo tauvihanahanapuweina aupouhi hi jibogha vivira hipa, “Rava ghehauhi i viyawahanihi ma apegha emoꞌemosina po tauna ina hagumei. 32 Habe we Kerisona Maimaituwa a Vinevine Waiyawahanana,* mai Israel ahi Guyauna, marina korosiyei ina hopuꞌi, po ta inana ma ta vitumaghanei.” Ma na taudanenehi Yesu maiteni hi tupatuparatuhi wate hi jiboghi.
Yesu i Hiraghe
(Matthew 27:45-56; Luke 23:44-49; John 19:28-30)
33 Maranai madegha au unuborita,* 12:00 p.m.; Ahubenai yana taraiwaguvara ghaeghaena dobu i puruyaghohi, ma i nae po ahubenai ma aubigai ausiporina.† Mai Judea ahi nota 3:00 p.m. yana yayata a madegha nima emosi ma nimagigi wahepari auhinenina. 34 Ma na madeghana au damona yana Yesu ponana i raꞌata ma i taraghabara ipa, “Eloi, Eloi lama sabatani?” Anona yana, “Aꞌu Maimaituwa, Aꞌu Maimaituwa, aiwa aubaina u votere ahareꞌu?” ✡ Psalm 22:1
35 Maranai rava taumahiri hi nonori yana hipa, “Ona nonori Elijah e ghoreghorei.” 36 Ma rava ghehauna i ruba po gara hogihogirana i vaini, po wine* waighorana auwarina i raitowai, ma au kwapu i terei ma i viyoyo ghaiyei Yesu au ipirina, po ita umai, ma ipa, “Marina ta voterei ma ta iyauwei, mepapo Elijah ina neꞌi po korosiyei ina tere hopunei.” ‡ Psalm 69:21i riwa da Keriso wine waighorana hi verei po ita umai.
37 Ma Yesu ghaeghaenaꞌava i taraghabara ma i hiraghe.
38 Ma Maimaituwa ana Numa* auhinenina aniraughaghara garana autepana ma i wanawanatevaiya, yana i hopu po aurabena ma i rauruwaghei. 39 Nahidana mai Rome* ahi tauvighaviya badana i mahimahiri Yesu aunaona, yana i inanai me i hiraghenei. Yamna aubaina ipa, “Moina dumana we ravana yana Maimaituwa Natuna!”
40 Nahidana waivine auririva hi mahiri ma hi iyaꞌiyau. Auhinenihi yana Mary Magdalene§ ‘Magdalene’ anona yana ‘meyagai wavana Magdala’. ma Mary tauna yana James haburuna ma Joses* Au Matthew 27:56, ‘Joseph’ i raugheꞌetei. ‘Joseph’ ma ‘Joses’ yana ravana emosina wavana ma girumana au Matthew tapuna ma au Mark tapuna. ayohi, ma Salome.† Salome yana Zebedee awana ma James ma John ayohi. Ona inana Matthew 27:56 ma Mark 10:35 auwarihi. 41 Maranai tauna au Galilee yana hi muritagho naiyei, ma a rauhoghara hi dewadewai, ma waivine maghamaghauhi maitena hi ghegheꞌi au Jerusalem yana wate tauhi nahidana.
Joseph, Arimathiyei a au Kokowaga* Yesu i Terei
(Matthew 27:57-61; Luke 23:50-56; John 19:38-42)
42-43 Ma nahidana yana rava Arimathiyei ana wava Joseph yana Tauviꞌogatara emosi, wate tauna yana aniviꞌateꞌate, ma Maimaituwa a vitaniwaga vouna* i paꞌipaꞌiyei. Ma we marana yana madegha i yoriyori ma vovaimaiha marana i kwahakwaha, ma viyagohina maratomna i tutugheregherei, aubaina a tepamahirina ma i nae po Pilate i vibaghai Yesu tupuwana aubaina.‡ Mai Judea* ahi viyagohina ana mara yana Paraide aubigaina ei kare ma Satade aubigaina e kwahakwaha. Mai Judea ahi raugagayo e ririwa, da rava e hirahiraghe yana na maratomna emosina hina ghuruvi. Aubigai viyagohina ei kare, aubaina po Joseph, yana Yesu tupuwana terenana i vipaparanei. 44 Ma Pilate yana i ghohori maranai i nonori da Yesu i hiraghe, aubaina tauvighaviya ahi bada i ghorei po i raubayadei da Yesu boiboghi i hiraghe bo eꞌegha. 45 Maranai tauvighaviya ahi bada auwarina i nonori da moina, yana Yesu tupuwana Joseph auwarina i viꞌaninei.
46 Po Joseph gara wakewakekena i gimarai, ma Yesu tupuwana hi tere hopunei, yana gareina hi humai ma au kokowaga* hi terei. Ma ghaꞌima hi tahiruiyei po me duyuwa auhinenina hi terei. Anima ghaꞌima ghaeghaena hi vitovitovirei po mataꞌetana hi rautomeni. 47 Mary Magdalene ma Mary, Joses ayona,§ We Maryna yana au Mark 15:40 ma Mark 16:1. yana mepa Yesu tupuwana hi enoiya yana hi inanai.
*15:1: Pilate yana Caesar i vinei po mai Judea i badehi.
†15:22: Tetete aniꞌinanana me unu aubaina hi ghorei po Unu Tetetena.
‡15:23: Wine ma mer yana muramura viuva tauvunuina.
§15:25: 9:00 a.m.; Naꞌi yana yayata a madegha vitonuina.
✡15:28: Isaiah 53:12
*15:33: 12:00 p.m.; Ahubenai
†15:33: Mai Judea ahi nota 3:00 p.m. yana yayata a madegha nima emosi ma nimagigi wahepari auhinenina.
✡15:34: Psalm 22:1
‡15:36: Psalm 69:21i riwa da Keriso wine waighorana hi verei po ita umai.
§15:40: ‘Magdalene’ anona yana ‘meyagai wavana Magdala’.
*15:40: Au Matthew 27:56, ‘Joseph’ i raugheꞌetei. ‘Joseph’ ma ‘Joses’ yana ravana emosina wavana ma girumana au Matthew tapuna ma au Mark tapuna.
†15:40: Salome yana Zebedee awana ma James ma John ayohi. Ona inana Matthew 27:56 ma Mark 10:35 auwarihi.
‡15:42-43: Mai Judea* ahi viyagohina ana mara yana Paraide aubigaina ei kare ma Satade aubigaina e kwahakwaha. Mai Judea ahi raugagayo e ririwa, da rava e hirahiraghe yana na maratomna emosina hina ghuruvi. Aubigai viyagohina ei kare, aubaina po Joseph, yana Yesu tupuwana terenana i vipaparanei.
§15:47: We Maryna yana au Mark 15:40 ma Mark 16:1.