2 Ee te linanja o ha’emberakoo,

vaho natrao-fipoke am-balantsy ao

o ha’ampohekoo!

3 Fa ho nandikoatse ty lanja’

ze kila faseñe an-driak’ ao:

Aa le nitsoretoke t’ie nivolañe.

4 Fa amako ao o ana-pale’

i El-Sadaio;

inome’ ty troko ty vore’e;

miatreatre ahiko o harevendreveñan’

Añahareo.

5 Mitreñe hao ty borìke ly

t’ie amañ’ahetse,

ke mirohake hao ty añombe

ambone’ i hane’ey?

6 Ho kamaeñe tsy aman-tsira hao

t’ie nàmoñe?

mafiry hao ty tapotin’atoly?

7 Ifoneñan-troko ty hitsopeke;

hoe lintseñe t’ie siloke.

8 Ehe te niazoko i halalikoy; te hatolon’Añahare i salalaekoy,

9 ee te ho non’ Añahare

ty handemok’ ahiko,

te ho hahà’e ty fità’e hañitoa’e ahy!

10 Zao ty ho nañohò ahiko; hahavontitirako tsy aman-tretrè ty fanaintaiñañe;

te tsy niliereko ty nafè’ i Masiñey.

11 Aia ty haozarako te hitamà?

Inoñe ty ho figadoñako, t’ie hahaliñe?

12 Haozaram-bato hao ty hafatrarako?

Torisike hao ty sandriko?

13 Hera tsy amako ty fañimbàñe ahiko,

ke nasiotse amako ty famotsorañe?

14 Mañeva ho ferenaiñan-drañe’e

ty mpisotry,

ndra te napo’e ty fañeveñañe

amy El-Sadai.

15 Manao hakalitahan-torahañe

amako o rañekoo,

hoe saka misorotombake

vaho mimosaoñe,

16 ie angonkòña’ i ranon-kavandray,

naho am-pietaham-panala.

17 Ie matrovoke le mianjiñe,

ie faosa vaho mimiañe an-toe’e.

18 Miolakolak’ am-pañaveloañe iereo,

mb’an-kakoahañe mb’eo vaho mimeatse.

19 Nipaia’ o mpivovotse boak’ i Temào,

nitamà’ o mpitavea’ i Sebào.

20 Nilonjetse t’ie nahatoky;

nitangòke te nipok’eo.

21 Toe manahake zay nahareo henaneo;

oni’ areo ty hekoheko le miriatsandriñe.

22 Nanao ty hoe vi’raho?

Añendeso, ndra,

Itambezo am-bokàñe

amo vara’ areoo

23 Ehe, ampipolitiro am-pitàn-drafelahy,

ke: Jebaño am-pità’ o fanalolahio ty fiaiko?

24 Anaro raho, le hitsiñe; atoro ahy ty nandilarako.

25 Toe mahasibeke ty saontsy to !

Fe inoñe ty ho toiñe’

ty fifanoitoi’areo?

26 Ke te o reha’oo ro vente’e

vaho tioke avao ty lañonam-pamoe’ piaiñe?

27 Eka, ndra iambotraha’ areo

ty bode-rae vaho haletake ty rañetse.

28 Ehe henteo henaneo,

hera mpandañitse añ’atrefa’ areo raho.

29 Mibalintoàña, le ko mandilatse;

Eka mifosera, fa vantañe o ahikoo.

30 Manan-tahy hao ty lelako?

Tsy apota’ ty lañilañiko hao ty hankàñe?