1 Oniño te hifelek’ an-kavañonañe

ty mpanjaka,

vaho hifehe an-katò o roandriañeo.

2 Le hanahake ty fipalirañe

ami’ty tioke t’indaty,

naho hoe fitampiñañe ami’ty lihits’ orañe,

hoe rano mitsiritsioke an-tane kànkañe,

hambañe ami’ty tevam-bato ialofañe

an-tane kirikintañe ao.

3 Le tsy hakipe ty fihaino’ o mahaisakeo;

vaho hitsendreñe ty ravembia mahajanjiñe.

4 Haharendre-kilala

ty fivetsevetse bei-àreke,

hiaren-tsaontsy ty famele’ o mènekeo.

5 Tsy hatao vañoñe ka ty dagola,

le tsy hatao matarike ty tsivokatse;

6 Amy te mivolam-­borosode ty gege,

mikitro-draha raty ty tro’e,

hitoloñe tsy aman-Kake,

hivolañ’ ota am’ Iehovà,

kefohe’e ty tro’ i saliko,

vaho kapaihe’e ty fitovi’ i taliñiereñey.

7 Tsy vente’e ty harao’ o tsivokatseo;

kiniae’e loza an-tambaimbaiñe

o rarakeo,

ndra te mivolan-to i misotriy.

8 Misafiry fatarihañe ty matarike,

naho i fatariha’e ty ijadoña’e.

9 Miongaha ry rakemba miagarègañeo,

janjiño o feokoo;

ry anak’ampela mitabonìtseo

anoloro sofiñe o lañonakoo.

10 Ho ampoheke nahareo

te peake ty taoñe tovoñañ’ andro

ry tsidaredareo;

fa tsy hamokatse o vaheo,

tsy ho toly i fanontonañey.

11 Mititititiha, ry miaiñañoleñañeo, mimahimahiña ry miandrañandrañeo; maña­metsametsà, miboridaña,

misikina gony an-tohake

12 Mikabokaboha araña

ty amo tonda nisoao,

naho amo vahe niregoregoo,

13 ty amy tane-hoba’ ondatikoy,

ie itiriam-patike naho hisatse;

eka, ty amo anjomba mitsinjakeo

vaho i rova mandia taròbay.

14 Fa kòake i anjombam-panjakay,

babangoañe i rova ­nitsi­tsike ondatiy;

fa lakato nainai’e ty haboa

naho ty fijilovañ’abo

fa fitsamboañam-birike lý

naho fiandraza’ o lia-raikeo

15 ampara’ te adoañe amantika

ty Arofo boak’ añ’abo,

ie ho tete-­kobokara ty ratraratra,

vaho atao ty hoe ala ty tonda vokatse.

16 Himoneñe am-patrambey ao

amy zao ty hatò,

vaho hañialo an-tonda kobokara ao

ty havantañañe.

17 Hamokatse fierañerañañe

ty havañonañe,

hahatoly fianjiñañe naho fatokisañe

nainai’e ty hamarentane.

18 Hitoboke

añ’akibam-pañanintsiñe ondatikoo,

naho am-pipaliran-tsoa,

vaho am-pitofàñe mipendreñe.

19 Manahake te mihotrake

ty amy havandray i alay;

t’ie harèke ambane i rovay.

20 Haha nahareo mpitongy

añ’olon-drano iabio,

o mampidada ty tombo’ o añombeo

naho o borìkeo.