1 Mboe niheo amako ty tsara’ Iehovà nanao ty hoe: 2 O ana’ ondatio, atrefo ty vohi-tSeire vaho itokio, 3 ami’ty hoe: Hoe ty tsara’ Iehovà Talè: Ry Vohi-tSeire, atreatrèko rehe, vaho hatora­kitsiko ama’o ty tañako hampangoakoahako azo ho tane bangý. 4 Fonga ho rotsaheko o rova’oo le ho vahiny rehe vaho ho fohi’o te zaho Iehovà; 5 amy t’ie nitan-keloke nainai’e naho nanolotse o ana’ Israeleo ami’ty haozaram-pibara amy andron-kekoheko’ iareoy, amy sam-pigadoñan-kaloloañey; 6 kanao velon-dRaho hoe t’Iehovà Talè, le hañentseñako lio, hañoridañe azo ty lio; toe niheje’o ty lio’o, vaho lio ro hañotioty azo. 7 Le hampangoakoaheko naho ho babangoañeko t’i Seire, vaho haitoako ama’e ty miranga naho ty mimpoly. 8 Hatse­feko zamañe o vohi’eo, an-kaboa’o ey naho am-bavatane’o ao; vaho an-tsaka’o iaby ao ty hikorovoha’ o zinevom-pibarao. 9 Hampangoakoaheko nainai’e naho tsy hatroatse ka o rova’oo; vaho ho fohi’o te Zaho Iehovà.

10 Amy te ihe nanao ty hoe, Ho ahiko i fifelehañe roe rey naho i tane roe rey, ho tavane’ay; fe tao t’Iehovà. 11 Aa kanao velon-dRaho hoe t’Iehovà Talè, le ho toloñeko amy haviñerañe naho amy fikirañañe nitoloña’o an-karafelahiañey, vaho ho fohi’ iereo te zaho ty nizaka azo. 12 Le ho fohi’o te Zaho Iehovà ty naha­tsanoñe ty fifosa nanoe’ areo amo vohi’ Israeleo ami’ty hoe: Kanao nengañe bangiñe, le natolotse antika habotseke. 13 Niebo­tsebotse amako am-bava rehe, vaho nampitoabore’o rehake; hene tsinanoko. 14 Hoe ty nafè’ Iehovà Talè: Toly ndra hirebeke ty tane-bey toy naho koaheko rehe, 15 manahake ty nirebeha’o amy lovan-anjomba’ Israeley, t’ie nangoakoake; zay ka ty hanoako azo; ho bangìñe ka rehe, ry Vohi-Seire, naho i Edome iaby, eka ie iabike; vaho ho fohi’ iereo te Zaho Iehovà.