1  Dan 7.2-3, 7.7, Lep 12.3, 17.3, 17.7-12 Mɨdaknɨŋ nɨgɨnek, tap ladek tek olap, ñɨg solwala nab okok nɨb mɨdɨl aplan jakak. Kɨmɨg ne anep kugul lɨl, mablod anep wajɨlem ak lɨl gak. Kɨmɨg cheg nag ak anep wajɨlem ak, mablod day keke lɨ yek. Pen kɨmɨg ne anep kugul ak, God nop agjuwep yɨb ogɨnap tɨk lel yek. 2  Dan 7.4-6, Lep 12.4, 12.9, 16.10 Tap ladek anɨb ak, pusi ladek awl yɨbɨl olap, lepat apal tek ak pen, tob ne okok chen beya tob kɨles tek lak, meg mɨgan ne ak chen layon meg mɨgan tek lak. Pen kɨpi awl ak, ne tap ladek anɨb anop bak lɨl mɨdɨl agek, tep nop ak dɨl, bɨawl mɨdɨl, binɨb kuŋay yɨbɨl nep kɨlop kodɨlɨg gek amnak. 3  Lep 13.12-14, 17.8 Tap ladek anɨb ak, kɨmɨg nop olap, ned pɨsnep ñag lel kumak tek lak ak pen, tepayaŋ suŋ lak. Anɨgek, binɨb lum awl mɨdupsek gos gos lɨl, nop kɨdek gɨlak. 4  Lep 18.18 Binɨb anɨb okok, kɨli kɨpi awl ak ne tap ladek nop bak lek bɨawl yek ak nɨŋɨd nɨm, yɨb nop dad aplanɨlak. Pen tap ladek yɨb nop abe dad aplanɨlɨg takaw nop ak kɨdek gɨlɨg agɨlak, Tap anɨb awl bɨawl ke yɨbɨl mɨdeb, binɨb ogɨnap ne ayɨp penpen gɨnɨgel tek ma lup agɨlak.

5  Lep 11.2, 12.6 Pen God ne tap ladek anɨb anop ñɨnen kelɨgek, takan 42 amnɨgab ak. Dan 7.8, 7.25, 11.36 Binɨb okok kɨlop kod mɨdɨl, God nop agjulɨg, yɨb ne ke dad aplanɨlɨg gɨ yonɨmuŋ. 6  Lep 12.12 Ne anɨgɨl God nop agjuwak. God yɨb nop agjuwɨl, tep nop mɨdeb alaŋ agjuwɨl, binɨb man ne alaŋ mɨdebal okok kɨlop agjuwɨl gak. 7  Dan 7.21, Lep 11.7, 11.18, 12.17, 17.15 Pen God ne tap ladek nop ñɨnen kelɨgek, binɨb God yɨl yelak okok ayɨp penpen gɨl kɨlop ñag juyokak. Ñag juyokɨl, binɨb okok mɨdupsek kɨlop kod yek. Binɨb jɨj keke mɨdebal tek, wak keke lup tek, takaw yɨbɨl keke apal tek, man keke mɨdebal tek kɨlop kod yek. 8  Kis 32.32, Sng 69.28, Dan 12.1, Plp 4.3, Lep 3.5, 5.6, 17.8, 20.12-15, 21.27 Binɨb mɨdupsek tek, tap ladek anɨb ak yɨb nop dad aplanɨl kɨdek gɨnɨgabal. Pen bɨlel bɨlel man ma alwol gɨlak ñɨn ak, God binɨb pel yenɨgabal agɨl, yɨb kɨlop mɨj ayaŋ ñu kɨl tɨkak. Mɨj anɨb ak, Chag Sipsip Ñɨluk ñag lel kumak ak mɨj ne. Binɨb anɨb okok nep, tap ladek anɨb anop kɨdek ma gɨnɨgabal.

9 Nɨbi binɨb tɨmud sek ak nɨgɨnɨmɨb. 10  Ais 33.1, Jer 15.2, 43.11, Mat 26.52, Lep 14.12 Binɨb God kalabus amnɨgel agɨl nɨgup okok, kalabus amnɨgabal. Binɨb tu palawl ak dɨl puŋɨlel kumnɨgel agɨl nɨgup okok, tu palawl ak dɨl puŋɨlel kumnɨgabal. Tap anɨb ak gɨnɨgeb ñɨn ak, binɨb God yɨl mɨdebal okok, kɨli God nop nokom gos lɨnɨgɨlɨg chɨg tep gɨl mɨdɨlɨg nɨm, gel amnɨmuŋ.

11  Lep 11.7 Pen tepayaŋ nɨŋɨd nɨgɨnek, tap ladek tek olap sek, man nab ayaŋ nɨb aplan jakak. Mablod ne omɨŋal ak, chag sipsip ñɨluk mablod tek lak ak pen, takaw ne ak, kɨpi awl tek agak. 12 Ne tap ladek ned nɨb anop wog gɨñeb yek. Tap ladek ned nɨb, nop ñag lel nɨm kumak ak pen tep yek ak, ne tap ladek kɨdeyɨl ak nop bak lek bɨawl yek. Bɨawl yek ak nɨŋɨd nɨm, binɨb man okok mɨdupsek nebneb gek, kɨli tap ladek ned nɨb anɨb anop yɨb dad aplanɨlak.

13  Lo 13.1-3, 1 Kin 18.24-39, 2 Kin 1.10-12, Mat 24.24, 2 Te 2.9 Pen tap ladek kɨdeyɨl ak ne tap mageptek kuŋay yɨbɨl gak. Binɨb nɨg yelaknɨŋ, ne gek, mab mɨŋɨlaŋ ak wɨsɨp alaŋ nɨb lum awl owak. 14  Lo 13.1, 13.4, 2 Te 2.9-10, Lep 12.9, 19.20 Pen God ne tap ladek kɨdeyɨl anop ñɨnen kelɨgek, binɨb lum awl nɨb okok nɨg yelaknɨŋ, kɨlop yepɨs yepɨs gin agɨl, tap mageptek anɨb okok gek, nɨŋɨd yɨbɨl gup agɨl nɨgɨlak. Pen tap ladek anɨb ak, binɨb lum awl kɨlop mɨdupsek agak, Tap ladek nedil tu palawl ak ñag lel nɨm kumak ak pen, kɨm mɨdeb ak yɨb nop dad aplanɨmɨb agak. Dad aplanɨg, kawnan nop tek agnɨgep olap gɨlɨnɨmɨb agak. Agek, kawnan anɨb ak tek olap gɨlɨlak. 15  Dan 3.4-6, Lep 16.2, 19.20, 20.4 Pen God ne tap ladek anop ñɨnen kelɨgek, tap ladek kɨdeyɨl ak, añɨŋ lep ne ak tap won anɨb anop pugek, tɨkjakɨl kɨm mɨdɨl, takaw agɨl agak, Yad bɨawl. Yɨp nokom kɨgom yɨmɨl, gos nɨŋɨd kɨdek gɨnɨmɨb agak. Anɨb agek, binɨb nop kɨdek ma gɨlak okok, agek mɨdupsek ñag paklɨlak. 16  Lep 14.9, 19.20, 20.4 Pen tap ladek kɨdeyɨl ak, ne binɨb yɨb yek okok yɨb ma yek okok, tap kuŋay yek okok tap ma yek okok, binɨb wog gɨñeb bɨawl olap muk okok mɨdebal okok binɨb wog gep bɨawl olap muk okok ma mɨdebal okok, kɨlop mɨdupsek agak, Yad nɨbop kod mɨdebin tek, kɨjɨkɨl yad ak nɨbop tɨkɨnɨgayn agak. Agɨl, mɨdupsek kɨjɨkɨl ne ak tɨkak. Ogɨnap kɨjɨkɨl ne anɨb ak ñɨn yɨpɨd kɨd ak tɨkak, ogɨnap nebeŋ alaŋ tɨkak. 17  Lep 14.9-11, 15.2, 16.2, 19.20, 20.4 Pen binɨb kɨjɨkɨl ne anɨb ak ma tɨkak okok, tap tawnɨg gɨnɨgel tek ma lak. Kɨjɨkɨl tɨkak anɨb ak nɨm, yɨb akaŋ namba ne ak.

18  Lep 15.2, 17.9, 21.17 Binɨb gos teplep nepal okok, takaw jɨj anɨb ak pɨyow nɨgɨnɨgel tek mɨdeb. Nɨgtep gɨl nɨm, tap ladek anɨb ak, namba ne jɨj ak nɨgɨnɨgabal. Namba anɨb ak, bɨ olap yɨb ne ak mɨdeb. Namba anɨb ak nɨm, 666.