1 «عِ شَ عِ شُي عِتٍ عَلْ سَرَ قٍ شُي،

عَ قَلَقٍ رَ ﭑ مَ حَمَ بّ عٍ بَرَ مُرُتَ،

يَشُبَ بْنسْي بَرَ يُنُبِ سْتْ.

2 لْشْ يٌ لْشْ عٍ يَ رَقِندِشِ ﭑ مَ.

عَ لُشِ نّ عَلْ عٍ وَ مَ ﭑ وَشْنيِ نَن كٌلٌنقٍ،

عَلْ حَمَ نَشَن وَ مَ تِنشِنيِ شْن،

نَشَن مُ فبِلٍنشِ عَلَ شَ يَامَرِ قْشْ رَ.

عٍ ﭑ مَشَندِ مَ كِيتِ تِنشِنشِ سَقٍ رَ،

عَ لُشِ نّ عَلْ عٍ نَ وَ عَلَ شَ مَكْرّ عٍ رَ.»

3 «كْنْ عٍ عَ قَلَمَ، ‹مُنقٍ رَ مُشُ سُنمَ، كْنْ عِ مُ عَ سُشُمَ؟

مُنقٍ رَ مُشُ مُشُ سُيِدِ مَ عِ بّ، كْنْ عِ مُ عَ تٌمَ؟›

ﭑ شَ عَ قَلَ وٌ بّ وٌ شَ سُنيِ كُي وٌ وٌ يّتّ وَشْنقٍ نَن تُن نَبَمَ،

وٌ كٌتٍ شْرْشْي دْشْ وٌ شَ وَلِكّيٍ شُن مَ.

4 وٌ سُنشِ تّمُي نَشّ، وٌ وٌ بٌرٍ فٍرٍ مَ،

وٌ سْنشْي رَتٍمَ، وٌ وٌ بٌرٍ بْنبْ مِشِ كٌبِحَ كُي.

ﭑ مُ نَ سُنيِ مْولِ سُشُمَ قٍوٌ!

5 ﭑ وَ مَ سُنيِ نَشَن شْن، نَ قِندِ مَ مِشِ شَ سُيِدِ نَن تُن نَ؟

مِشِ عَ تِفِ تِقٍ بْشِ، عَلْ مَالٍ مْشِ قٌيٍ نَشَن رَ مَشَمَ،

نَ كٍرٍن قِندِ مَ سُنيِ رَ؟

سُننُنيِ دُفِ رَفٌرٌقٍ مِشِ مَ، شُبٍ تٍقٍ مِشِ شُنيِ رَ،

نَ شِلِ قَلَمَ سُنيِ قَنيِ نَشَن نَقَن عَلَتَلَ مَ؟»

6 «ﭑ وَ مَ سُنيِ مْولِ نَشَن شْن،

وٌ شَ فبِلٍن تِنشِنتَرٍيَ قْشْ رَ، وٌ شَ كٌتٍ شْرْشْي بَ مِشِ شُن مَ.

فٍيلِمَنِ شَ شْرّيَ، كٌتٍ شْرْشْي شَ بَ مِشِ شُن مَ.

7 وٌ شَ دٌنسٍ قِ كَامّتْي مَ،

وٌ شَ شِدٍ قِ مِشِ مَ عَ مُ نَشَن يِ،

وٌ شَ دُفِ رَفٌرٌ مِشِ مَ عَ مُ نَشَن يِ،

وٌ نَشَ عَ لُ وٌ نفَشَكٍرٍنيِ شَ سِفَ عَ بّلّشّ عِفٍلِ رَ.

8 نَ كُي وٌ يَنبَمَ نّ عَلْ سُبَشّ لٌولٌي،

وٌ يَلَنمَ مَقُرٍن مَقُرٍن،

وٌ شَ تِنشِنيِ كٌلٌنمَ نّ وٌ يَ رَ،

عَلَتَلَ شَ نْرّ وٌ كَنتَمَ نّ وٌ شَنبِ رَ.

9 نَ تّمُي وٌ عَلَتَلَ مَشَندِ مَ نّ، عَ قَ نَ سُشُ.

وٌ نَ عَ شِلِ عَ شَ وٌ مَلِ، عَ وٌ شَ شِلِ رَتِنمَ نّ، ‹ﭑ نَ بٍ.›»

«شَ وٌ مُ مِشِ تْورْ مَ،

شَ وٌ مُ مِشِ تْوحّفّمَ،

10 شَ وٌ كَامّتْي مَلِمَ،

شَ وٌ تْورْ مِشِ كِمَ،

نَ كُي وٌ يَنبَمَ نّ دِ مِ كُي، وٌ قَ دِ مِ كَنَ عَلْ سٌفٍ يَنيِ تَفِ.

11 عَلَتَلَ وٌ رَحّرّ مَ نّ تّمُي بِرِن،

عَ وٌ هَيِ قَنمَ نّ وٌ بّ هَلِ تّمُي شْرْشْي كُي.

عَ سّنبّ قِمَ نّ وٌ مَ،

وٌ قَ لُ عَلْ لَاكْي يٍ مُ شْرِ مَ نَشَن مَ.

12 وٌ شَ حَمَ قَمَ نّ وٌ شَ يِرٍ كَنَشِيٍ تِدٍ عَلْ عَ سِنفٍ.

عٍ قَمَ نّ وٌ شِلِ قَلَدٍ، ‹تَا بِلِتِيٍ، بَنشِتِيٍ، نُن تَا يَلَنمَيٍ.›»

13 «شَ وٌ مَلَبُي لْشْي سّرِيّ رَبَتُ،

شَ وٌ مُ وٌ وَشْنقٍ رَبَ ﭑ مَ لْشْي سّنِيّنشِ كُي،

شَ وٌ سّيوَ نَ لْشْي شَ قٍ رَ،

وٌ عَ بِنيَ وٌ شَ حّرّ كِ قَنيِ رَ،

وٌ مُ تِن وْيّنيِ قُقَقُ رَ،

14 نَ كُي وٌ قَمَ نّ سّيوَدٍ عَلَتَلَ شَ قٍ كُي،

ﭑ قَ وٌ شَ قٍ عِتٍ وٌ شَ بْشِ قَنيِ مَ،

وٌ شَ حّلّشِنيِ نَ وٌ بٍنبَ يَشُبَ كّ نَن نَ.»

عَلَتَلَ شَ مَسٍنيِ نَن نَ كِ.